ជាតិ
សេដ្ឋកិច្ច
ADB៖ ចំណូលប្រចាំឆ្នាំពលរដ្ឋកម្ពុជាកើនរហូតដល់ ១១២១ ដុល្លារអាមេរិកនៅឆ្នាំ២០១៤
× នាដំណើរទស្សនកិច្ចមកកាន់កម្ពុជា លោក Takenhiko Nakao ប្រធានធនាគារអភិវឌ្ឍន៍អាស៊ី (ADB) បានវាយតម្លៃខ្ពស់ពីការរីកចម្រើនទៅមុខនៃសេដ្ឋកិច្ចកម្ពុជា។ ក្រោយជំនួបជាមួយលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី១០ ខែមីនា លោក Takenhiko Nakao បានប្រកាសពីការពង្រឹងកិច្ចសហប្រតិបត្តិការបន្ថែមជាមួយរដ្ឋាភិបាលកម្ពុជា។ បើតាមលោកប្រធាន ADB ចំណូលប្រចាំឆ្នាំរបស់ពលរដ្ឋកម្ពុជាកើនរហូតដល់ ១១២១ ដុល្លារអាមេរិក នៅឆ្នាំ២០១៤ ។
ការសម្រេចបានកំណើនសេដ្ឋកិច្ចក្នុងរង្វង់៧ភាគរយកាលពីឆ្នាំ២០១៤របស់រដ្ឋាភិបាលកម្ពុជាទទួលបាននូវការសាទរពីសំណាក់ប្រធានធនាគារអភិវឌ្ឍន៍អាស៊ី (ADB) ។ លោក Takehiko Nakao បានថ្លែងនៅក្នុងសន្និសីទសារព័ត៌មានថា សេដ្ឋកិច្ចកម្ពុជាអាចរក្សាកំណើនប្រមាណ៧ភាគរយក្នុងមួយឆ្នាំ ក្នុងរយៈពេលមធ្យម។ លោកបានលើកឡើងថា កំណើនសេដ្ឋកិច្ចនេះ ធ្វើឲ្យចំណូលប្រចាំឆ្នាំរបស់ពលរដ្ឋកម្ពុជាកើនរហូតដល់ ១១២១ ដុល្លារអាមេរិកនៅក្នុងឆ្នាំ២០១៤ ។ ការធ្លាក់ចុះនៃអត្រាភាពក្រីក្រ និងការរក្សាបាននូវអតិផរណាជាមធ្យម ក៏ទទួលបាននូវការស្វាគមន៍ផងដែរពីសំណាក់ប្រធាន ADB។
សម្រាប់កិច្ចសហប្រតិបត្តិការឆ្នាំ២០១៥-២០១៧ ADB នឹងផ្តល់ហិរញ្ញប្បទានប្រមាណ៦៤៥លានដុល្លារអាមេរិកដល់កម្ពុជា ដែលក្នុងនោះមានហិរញ្ញប្បទានឥណទានសម្បទានពី ADB ចំនួន៥៣៥លាន ដុល្លារអាមេរិក និង ពីដៃគូអភិវឌ្ឍន៍ផ្សេងទៀតដែលផ្តល់តាមរយៈ ADB មានប្រមាណ១១០លានដុល្លារអាមេរិក ។
ជាមួយគ្នានេះ ADB ក៏គ្រោងនឹងផ្តល់ហិរញ្ញប្បទានលើកិច្ចសហប្រតិបត្តិការបច្ចេកទេសក្នុងទឹកប្រាក់សរុបចំនួនប្រមាណ១២,២៤លានដុល្លារអាមេរិកដល់កម្ពុជាផងដែរ។ លោក អូន ព័ន្ធមុនីរ័ត្ន បានវាយតម្លៃខ្ពស់ចំពោះការគាំទ្រ និងកិច្ចសហប្រតិបត្តិការដ៏ល្អរវាង ADB ជាមួយរាជរដ្ឋាភិបាលកម្ពុជា។
បើគិតចាប់តាំងពីឆ្នាំ១៩៩២មក ADB បានផ្តល់កម្ចីសម្បទាន ជំនួយឥតសំណង និងជំនួយបច្ចេកទេសចំនួន ២,១១ពាន់លានដុល្លារអាមេរិកដល់កម្ពុជា៕
© រក្សាសិទ្ធិដោយ thmeythmey.com