ជាតិ
ក្រសួងរៀបចំដែនដីច្រានចោលរបាយការណ៍របស់អង្គការមិនមែនរដ្ឋាភិបាល
×
ក្រសួងរៀបចំដែនដី និងសំណង់ បានច្រានចោលរបាយការណ៍ស្រាវជ្រាវស្តីពី ការឆ្វៀលចេញសហគមន៍ក្រីក្រពីការចុះបញ្ជីដីធ្លីមានលក្ខណៈជាប្រព័ន្ធនៅក្នុងរាជធានីភ្នំពេញ របស់អង្គការមិនមែនរដ្ឋាភិបាល និងអង្គការទស្សនៈពិភពលោក។ ក្រសួងបដិសេធថា របាយការណ៍ទាំងនេះ មិនបានឆ្លុះបញ្ចាំងពីការពិតនោះឡើយ។
សេចក្ដីប្រកាសព័ត៌មាន ចុះថ្ងៃទី០៨ មេសា របស់ក្រសួងដែនដីបានឲ្យដឹងថា ក្រសួងមិនទទួលយករបាយការណ៍ស្រាវជ្រាវស្តីពី ការឆ្វៀលចេញសហគមន៍ក្រីក្រ ពីការចុះបញ្ជីដីធ្លីមានលក្ខណៈជាប្រព័ន្ធនៅក្នុងរាជធានីភ្នំពេញ នោះទេ ដោយក្រសួងយល់ឃើញថា ចំណងជើងនៃរបាយការណ៍នេះ មិនបានឆ្លុះបញ្ចាំងការពិតនោះឡើយ ។
មូលហេតុដោយសារតែរបាយការណ៍នេះរកឃើញសហគមន៍បានមករស់នៅលើដីរបស់រដ្ឋ ដែលជាកត្តាមិនអាចចុះបញ្ជីជូនបាន ដូចនេះមិនមែនជាការឆ្វៀលចេញនោះទេ។ ក្រសួងបដិសេធថា វិធីសាស្ត្រស្រាវជ្រាវរបស់អង្គការនោះ គឺជ្រើសរើសសំណាកផ្ដោតតែសហគមន៍ក្រីក្រដែលរស់នៅលើដីសាធារណៈរបស់រដ្ឋតែប៉ុណ្ណោះ ។ ហើយការសិក្សាមិនបានមកជួបសម្ភាស ឬស្វែងរកព័ត៌មានពីកម្មវិធីអនុវិស័យរដ្ឋបាលដីធ្លី ដើម្បីឲ្យព័ត៌មានមានលក្ខណៈគ្រប់ជ្រុងជ្រោយនោះទេ ។
សេចក្ដីប្រកាសដដែល បានបន្ដថា ផ្អែកលើទិដ្ឋភាពច្បាប់ដោយរបាយការណ៍ឃើញថា សហគមន៍រស់នៅលើដីសាធារណៈនោះ សហគមន៍ទាំងនោះមិនអាចក្លាយជាកម្មសិទ្ធិករបានទេ។
ទន្ទឹមនឹងនេះក្រសួងបានបញ្ជាក់ថា ការអនុវត្តជាក់ស្ដែងចុះបញ្ជីដីធ្លីមានលក្ខណៈជាប្រព័ន្ធគោលការណ៍ច្បាប់ និងនិតិវិធីជាធរមាន មានតម្លាភាព គណនេយ្យភាព ការចូលរួមអភិបាលកិច្ចល្អ។ ហើយមិនដែលឆ្វៀលសហគមន៍ណាមួយដែលបានកាន់កាប់ដីធ្លីស្របច្បាប់ និងលិខិតបទដ្ឋានគតិយុត្តជាធរមាននោះទេ ហើយក៏មិនមានការរើសអើង និងប្រកាន់និន្នាការនយោបាយឡើយ។ ក្រសួងដែនដីបន្ថែមថា មានតែតំបន់មានជម្លោះប៉ុណ្ណោះ ដែលបានឆ្វៀលចេញព្រោះមិនអាចចុះបញ្ជីជូនពួកគេបាន៕
© រក្សាសិទ្ធិដោយ thmeythmey.com