អន្តរជាតិ
ភោជនីយដ្ឋានមួយនៅញូវយ៉កបញ្ចុះតម្លៃ ១០ភាគរយ ដល់អតិថិជនដែលមិនយកទូរសព្ទចូល
× ភោជនីយដ្ឋាន Buffalo restaurant Lebro នៅក្នុងទីក្រុងញូវយ៉ក សហរដ្ឋអាមេរិក បានប្រកាសផ្តល់ជូនការចុះតម្លៃពិសេស ១០ ភាគរយ ដល់អតិថិជនណាដែលមិនយកទូរសព្ទស្មាតហ្វូនមកជាមួយពេលចូលមកញ៉ាំអាហារក្នុងហាងនេះ នៅរៀងរាល់ថ្ងៃអាទិត្យ។ នេះបើយោងតាមកាសែត New York Daily News។
លោកLee Federiconiជាម្ចាស់ភោជនីយដ្ឋានLebroបានឲ្យដឹងថាការបញ្ចុះតម្លៃនេះ វាជាគំនិតដ៏សាមញ្ញមួយដើម្បីអាចឲ្យអតិថិជនពិសារអាហារបានដោយស្ងាត់ស្ងៀម គ្មានសំឡេងទូរសព្ទរោទិ៍រំខាន។ លោកបញ្ជាក់ថា ម្យ៉ាងទៀតគឺដើម្បីឲ្យគ្រួសារមានការទំនាក់ទំនងគ្នាខ្លះ ពេលគ្មានទូរសព្ទស្មាតហ្វូននៅក្បែរខ្លួន ពួកគេអាចមានពេលវេលាជជែកគ្នាក្នុងពេលញ៉ាំអាហារ។
ដើម្បីផ្សព្វផ្សាយពីគំនិតមួយនេះឲ្យបានទូលំទូលាយ លោក Federiconi បានចាប់ផ្ដើមការបញ្ចុះតម្លៃរហូតមកដល់ចុងឆ្នាំ២០១៤បន្ទាប់បានកត់សម្គាល់ថា ជាញឹកញាប់ស្មាតហ្វូន ភ្ញៀវបានទុកទូរសព្ទរបស់គេនៅផ្ទះ ពេលមកពិសារអាហារពេលល្ងាចនៅហាងរបស់លោក ដើម្បីទទួលបានការចុះតម្លៃនេះ លោកក៏បានបន្តវារហូតដល់ពេលនេះ។ គាត់បានបង្កើតជាសញ្ញាមួយ ដាក់នៅខាងមុខភោជនីយដ្ឋានរបស់គាត់ថា «Disconnect to RECONNECT» មានន័យថា ផ្ដាច់ការទាក់ទងដើម្បីភ្ជាប់ទំនាក់ទំនងឡើងវិញ។
ចាប់តាំងពីពេលនោះមកលោកFedericoniបានសង្កេតឃើញថាប្រហែល ១ ភាគ ៥ នៃអតិថិជនដែលមកហាងគាត់នៅថ្ងៃអាទិត្យ ពួកគេបានទុកទូរសព្ទរបស់ពួកគេនៅផ្ទះ និងហើយមានអ្នកខ្លះទៀតក៏បានធ្វើដំណើរមកពីសង្កាត់ផ្សេងៗដើម្បីទទួលបានរសជាតិនៃអាហារគ្មានទូរសព្ទនៅក្បែរ៕
© រក្សាសិទ្ធិដោយ thmeythmey.com