ជាតិ
បទវិភាគ
នយោបាយជាតិ
លោកនាយករដ្ឋមន្ត្រី ហ៊ុន សែន និងលោក សម រង្ស៊ី ចេញពីកិច្ចប្រជុំសភាកាលពីថ្ងៃទី៩ ខែមេសា ទាំងស្នាមញញឹម
× វប្បធម៌ «មានសែន អត់ស៊ី» ឬ «មានស៊ី អត់សែន» ប្រហែលជាចាកចេញទៅតាមទេវតាឆ្នាំចាស់ព្រះនាង គោរគៈទេវី ហើយ។ សម្រាប់ឆ្នាំថ្មី ឆ្នាំមមែ សប្តស័ក ពុទ្ធសករាជ២៥៥៩នេះ ព្រះនាង រាគ្យសៈទេវី ច្បាស់ជាមិនសូវឈឺព្រះកេសឡើយ ពីព្រោះមេដឹកនាំគណបក្សនយោបាយធំៗពីរនៅកម្ពុជា បានលើកឡើងពីភាពវិជ្ជមាននៃវប្បធម៌សន្ទនា ដែលបាននាំឲ្យពួកគេសម្រេចបានកិច្ចការធំៗមួយចំនួននារយៈពេលចុងក្រោយនេះ។ វប្បធម៌ «មានសែន មានស៊ី» កាន់តែលេចច្បាស់ឡើង ខណៈមេដឹកនាំបក្សនយោបាយទាំងពីរ មានវត្តមានរួមគ្នាជាប្រវត្តិសាស្ត្រនាពិធីបើកអង្គរសង្ក្រាន្តនៅខេត្តសៀមរាប នាថ្ងៃទី១៤ ខែមេសា។
បន្ទាប់ពីរដ្ឋសភា បានសម្រេចអនុម័តសមាសភាពសមាជិកថ្មីនៃគណៈកម្មាធិការជាតិរៀបចំការ បោះឆ្នោត (គ.ជ.ប) កាលពីថ្ងៃទី៩ ខែមេសា លោកនាយករដ្ឋមន្ត្រី ហ៊ុន សែន នៃគណបក្សប្រជាជនជាតិកម្ពុជា បានអះអាងថា ស្ថានការណ៍នយោបាយរបស់កម្ពុជាបានឈានទៅដល់ចំណុចផ្តាច់ព្រ័ត្រ។ ស្របពេលជាមួយគ្នា ប្រធានគណបក្សសង្គ្រោះជាតិ លោក សម រង្ស៊ី បានលើកឡើងថា កាយវិការរបស់មេដឹកនាំបក្សទាំងពីរ គឺជាសារវិជ្ជមានសម្រាប់ជនរួមជាតិ។ ក្នុងសារជូនពរនាឱកាសបុណ្យចូលឆ្នាំ លោក សម រង្ស៊ី បានសរសេរថា វប្បធម៌សន្ទនា បាននាំឲ្យមានការបង្កើតស្ថាប័ន គ.ជ.ប ថ្មី និងការដោះលែងសកម្មជននយោបាយពីពន្ធនាគារ។
អ្វីដែលគួរឲ្យកត់សម្គាល់នោះ នាឱកាសបុណ្យចូលឆ្នាំថ្មីប្រពៃណីជាតិ ក្រៅពីផ្ញើសារជូនពរគ្នាទៅវិញទៅមក គេសង្កេតឃើញមន្ត្រីគណបក្សនយោបាយទាំងពីរ ក៏បានចុះសាកសួរសុខទុក្ខគ្នាទៅវិញទៅមកផងដែរ។ ទង្វើទាំងនេះ ពិតជាផ្តល់ក្តី រំភើបដល់ទេវតាឆ្នាំថ្មីជាមិនខាន។
ស្របពេលជាមួយគ្នានេះផងដែរ មតិមួយចំនួនយល់ឃើញថា វាជាការត្រូវរ៉ូវគ្នាតែមួយចំអិនកំពឹសតែប៉ុណ្ណោះ ពីព្រោះវាមិនមែនជាលើកទីមួយឡើយ ដែលអ្នកនយោបាយចាប់ដៃគ្នា ញញឹមដាក់គ្នា ហើយក្រោយមកបែរជាជេរគ្នា រិះគន់គ្នាទៅវិញទៅមក។
អ្នកខ្លះបានលើកឡើងថា លោកនាយករដ្ឋមន្ត្រី ហ៊ុន សែន ធ្វើជាត្រូវគ្នាជាមួយលោក សម រង្ស៊ី ក្នុងគោលបំណងបំបែកសាមគ្គីភាពរវាងប្រធានគណបក្សប្រឆាំង និងលោក កឹម សុខា ដែលជាអនុប្រធាន។ តែទោះបីជាយ៉ាងណាក៏ដោយ មេដឹកនាំបក្សសង្គ្រោះជាតិ តែងតែបង្ហាញជំហរយ៉ាងរឹងមាំថា គ្មាននោះឡើយការបែកបាក់គ្នា។
«បញ្ហានយោបាយ» ប្រៀបដូចជារឿងភាគមួយយ៉ាងដូច្នោះដែរ បើទោះបីជាសាច់រឿងបានបញ្ចប់ក៏ដោយ តែអ្នកនិពន្ធអាចបង្កើតវគ្គថ្មីមួយទៀត ដោយប្រើប្រាស់តួដដែល ជាមួយការបង្កើតបញ្ហាថ្មី។ តែរាស្ត្រខ្មែររំពឹងថា បើអ្នកនយោបាយប្រកាន់យកវប្បធម៌សន្ទនាជាមូលដ្ឋាន បញ្ហាច្បាស់ជាមិនរីករាលដាលធំនោះឡើយ។
ទាំងលោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ថ្មី និងលោក អ៊ឹម សួស្តី ប្រធាន គ.ជ.ប ចាស់ សុទ្ធតែបានលើកឡើងថា គ្មានការបោះឆ្នោតណាដែលល្អឥតខ្ចោះនោះឡើយ ប៉ុន្តែការរួមគ្នាដោះស្រាយបញ្ហាគឺកត្តាដែលនាំឲ្យមានលទ្ធផលល្អប្រសើរ។
តើការញញឹម និងការចាប់ដៃគ្នារវាងលោកនាយករដ្ឋមន្ត្រី ហ៊ុន សែន និងប្រធានគណបក្សប្រឆាំង លោក សម រង្ស៊ី គ្រាន់តែជាកាដូលួងចិត្តសម្រាប់ឱកាសឆ្នាំថ្មី ឬយ៉ាងណា? តើភាពញញឹមខាងក្រៅស្តែងចេញពីចិត្តដែរឬទេ? សូមរង់ចាំទស្សនាភាគបន្ត៕
© រក្សាសិទ្ធិដោយ thmeythmey.com