ប្លែកៗ
អន្តរជាតិ
អាមេរិក៖ ក្រោយចូលលួចឥវ៉ាន់ ចោរម្នាក់ជ្រុលខ្លួនគេងលក់នៅលើសាឡុងម្ចាស់ផ្ទះ
× ម្ចាស់ផ្ទះនៅក្នុងរដ្ឋផ្លរីដា បានប្ដឹងប៉ូលីសដើម្បីចាប់ខ្លួនចោរម្នាក់ បន្ទាប់ពីបុរសម្នាក់នេះដេកលក់នៅលើសាឡុងនៅក្នុងបន្ទប់ទទួលភ្ញៀវរបស់គាត់ នៅពេលដែលគាត់ចុះមកពីជាន់លើពេលព្រឹកឡើងនោះ។ នេះបើយោងតាមការផ្សាយរបស់សារព័ត៌មាន 10 News ។
ប្រភពដដែលបានផ្សាយថា លោក Timothy Bontrager ត្រូវបានចោទប្រកាន់ពីបទចូលទៅក្នុងផ្ទះរបស់គេដោយគ្មានការអនុញ្ញាត នៅវេលាពាក់កណ្ដាលយប់។ បន្ទាប់ពីងងុយដេកខ្លាំងពេក មកបុរសវ័យ ២០ ឆ្នាំរូបនេះ សម្រេចចិត្តគេងនៅលើសាឡុងនៅក្នុងផ្ទះដែលគាត់បានលួចចូលមួយភ្លែត ។ ប៉ុន្តែចោរម្នាក់នេះបាន គេងជ្រុលរហូតដល់ម៉ោង ៧: ៣០ ព្រឹកនៅថ្ងៃបន្ទាប់ជាពេលដែលម្ចាស់ផ្ទះ ចុះពីជាន់ខាងលើមកក្រោម។
ស្ត្រីជាម្ចាស់ផ្ទះ បានសួរបុរសនោះថា តើគាត់កំពុងធ្វើអ្វី? ហើយបុរសជាចោរម្នាក់នោះ បានសុំអភ័យទោសម្ចាស់ផ្ទះចំពោះទង្វើរបស់គាត់។ ប៉ុន្តែស្ត្រីជាម្ចាស់ផ្ទះដែលមិនបង្ហាញអត្តសញ្ញាណ ហៅប៉ូលិសមកចាប់បុរសម្នាក់នេះ។
បន្ទាប់មកលោក Bontrager បានដើរជុំវិញបន្ទប់ ព្រមទាំងព្យាយាមភៀសខ្លួនចេញកន្លែងកើតហេតុ ប៉ុន្តែប៉ូលីសក៏បានមកដល់ ខណៈពេលដែលស្ត្រីជាម្ចាស់ផ្ទះនោះ បានបញ្ជាក់ថាគាត់បានបាត់កាបូប ប័ណ្ណបើកបរ កាតឥណទាន និងកាតឥណពន្ធ របស់គាត់ផងដែរ។ ប៉ូលីសបានចាប់ខ្លួនបុរសម្នាក់នោះ នៅពេលដែលរូបគេកំពុងដើរនៅលើផ្លូវក្បែរផ្ទះនោះ៕
© រក្សាសិទ្ធិដោយ thmeythmey.com