ជាតិ
សហគមកូរ៉េខាងត្បូងផ្តល់ជំនួយដល់មជ្ឈមណ្ឌលព្យាបាលមនុស្សចាស់តាមរយៈសម្តេចម៉ែ ឯកអគ្គរដ្ឋទូតកូរ៉េខាងត្បូង
× នៅថ្ងៃទី៨មិថុនាដើមសប្តាហ៍ក្រោយនេះ សហគមន៍កូរ៉េខាងត្បូងដែលមានវត្តមាននៅក្នុងប្រទេសកម្ពុជានឹងនាំជំនួយសប្បុរសធម៌១ម៉ឺនដុល្លារ និងព្យ៉ាណូឌីជីថល៣គ្រឿង ថ្វាយសម្តេចម៉ែ ដើម្បីសម្តេចម៉ែប្រទានបន្តទៅមជ្ឈមណ្ឌលព្យាបាលមនុស្សចាស់ព្រះសីហនុរាជ។
សហគមន៍ជនជាតិកូរ៉េខាងត្បូងបានជ្រើសរើសយកឱកាសនៃការថ្វាយព្រះពរចម្រើនព្រះជន្មសម្តេចម៉ែ មុនីនាថ សីហនុ ដើម្បីជូនជំនួយសប្បុរសធម៌ដែលពួកគេប្រមូលបាន ថ្វាយសម្តេចម៉ែ ដើម្បីប្រើប្រាស់នៅក្នុងមជ្ឈមណ្ឌលព្យាបាលមនុស្សចាស់ព្រះសីហនុរាជ។ នេះបើតាមសេចក្តីប្រកាសព័ត៌មានរបស់ស្ថានទូតកូរ៉េប្រចាំកម្ពុជា។
មជ្ឈមណ្ឌលព្យាបាលមនុស្សចាស់ព្រះសីហនុរាជ ដែលស្ថិតនៅក្នុងមន្ទីរពេទ្យមិត្តភាពកម្ពុជាសូវៀត ត្រូវបានសាងសង់ឡើងក្រោមព្រះរាជតម្រិះរបស់សម្តេចព្រះមហាក្សត្រី មុនីនាថ សីហនុ ដើម្បីរំឮកវិញ្ញាណក្ខន្ធព្រះបរមរតនកោដ្ឋ។ មជ្ឈមណ្ឌលនេះនឹងត្រូវសម្ពោធដាក់ឲ្យប្រើប្រាស់នៅក្នុងខែតុលាខាងមុខនេះ។
«ដើម្បីលើកកំពស់ទំនាក់ទំនងមិត្តភាពកូរ៉េ-កម្ពុជា ប្រជាពលរដ្ឋកូរ៉េដែលកំពុងស្នាក់នៅក្នុងព្រះរាជាណាចក្រកម្ពុជាទាំងអស់សង្ឃឹមថាមូលនិធិស្តួចស្តើងដែលយើងខិតខំប្រមូលអស់ពីកម្លាំងកាយចិត្តនេះ នឹងអាចចូលរួមចំណែកធ្វើឲ្យមជ្ឈមណ្ឌលព្យាបាលមនុស្សចាស់ព្រះសីហនុរាជដំណើរការបានជោគជ័យ»។ សេចក្តីប្រកាសព័ត៌មានសរសេរយ៉ាងដូច្នេះ។
សេចក្តីប្រកាសព័ត៌មានដដែលបញ្ជាក់ថា ស្ថានទូតកូរ៉េ សមាគមកូរ៉េប្រចាំកម្ពុជា សមាគមសេដ្ឋកិច្ច និងប្រជាពលរដ្ឋកូរ៉េដែលរស់នៅក្នុងប្រទេសកម្ពុជា បានប្រមូលថវិកាសប្បុរសធម៌បានចំនួន ១០៩០០ ដុល្លារ និងព្យ៉ាណូឌីជីថល៣គ្រឿង។ ជំនួយទាំងនេះហើយដែលលោកឯកអគ្គរដ្ឋទូតកូរ៉េ ប្រធានសមាគមសេដ្ឋកិច្ចកូរ៉េ និងប្រធានសមាគមកូរ៉េ នឹងត្រូវថ្វាយសម្តេចម៉ែនៅព្រឹកថ្ងៃចន្ទទី៨មិថុនានោះ៕
© រក្សាសិទ្ធិដោយ thmeythmey.com