អន្តរជាតិ
នយោបាយអន្តរជាតិ
×![]()
មេដឹកនាំរដ្ឋអាមេរិកឡាទីន បូលីវី លោក Evo Morale បានអំពាវនាវឲ្យបណ្តារដ្ឋនៅអឺរ៉ុបពិចារណាឡើងវិញ ជុំវិញការបន្តស្ថិតក្រោមឥទ្ធិពលនយោបាយរបស់សហរដ្ឋអាមេរិក។ មេដឹកនាំនេះបានចាត់ទុកអាមេរិក ជាប្រទេសចក្រពត្តិកំពុងអនុវត្តគោលនយោបាយអាណានិគមប្រភេទថ្មី ដើម្បីក្តោបក្តាប់ពិភពលោក។ ក្រៅពីរិះគន់អាមេរិក លោក Morale ក៏រិះគន់ស្ថាប័នហិរញ្ញវត្ថុលោកខាងលិច មូលនិធិរូបីយវត្ថុអន្តរជាតិដែរ។
មានសំឡេង៖
ក្នុងបទសម្ភាសន៍ជាមួយសារព័ត៌មានរដ្ឋរុស្ស៊ី លោក Evo Morale ប្រធានាធិបតីបូលីវី បានថ្លែងរិះគន់ក្រុងវ៉ាស៊ីនតោនដោយឥតសំចៃមាត់។ លោកបានផ្តល់បទសម្ភាសន៍ នៅពេលដែលលោកកំពុងស្ថិតក្នុងទីក្រុងប្រ៊ុយសែល ប្រទេសបែលហ្ស៊ិក ដើម្បីចូលរួមក្នុងកិច្ចប្រជុំកំពូលប្រទេសអឺរ៉ុប-អាមេរិកឡាទីន និងរដ្ឋការីប៊ីន។ រិះគន់មិនអស់ចិត្ត ប្រមុខរដ្ឋអាមេរិកឡាទីននេះក៏បានផ្តល់អនុសាសន៍ដល់បណ្តារដ្ឋអឺរ៉ុបឲ្យពិចារណារំដោះខ្លួនចេញពីឥទ្ធិពលនយោបាយរបស់ សហរដ្ឋអាមេរិក ដើម្បីក្លាយខ្លួនជារដ្ឋឯករាជ្យផ្នែកនយោបាយ ដែលអាចសម្រេចកិច្ចការផ្ទាល់ខ្លួនបានដោយសេរី។ លើសពីនេះលោកក៏បានសង្កត់ធ្ងន់ថា ការបង្គាប់បញ្ជារបស់ស្ថាប័នរូបិយវត្ថុអន្តរជាតិIMF ក៏ជាកង្វល់មួយរបស់ប្រទេសនៅអឺរ៉ុបផងដែរ។
លោក Morale បានថ្លែងដាស់តឿនប្រទេសអឺរ៉ុបថា ក្នុងនាមលោកជាមេដឹកនាំរដ្ឋអាមេរិកឡាទីន លោកចង់ឃើញការរួបរួមគ្នារវាងរដ្ឋអឺរ៉ុប និងរដ្ឋអាមេរិកឡាទីន ដើម្បីរំដោះខ្លួនចេញពីការគ្រប់គ្រងរបស់អាមេរិក និងការបង្គាប់បញ្ជារបស់IMF ដែលជាស្ថាប័នរបស់លោកខាងលិចនោះ។ ក្នុងក្រសែភ្នែករបស់មេដឹកនាំអាមេរិកឡាទីនេះ សហរដ្ឋអាមេរិកនៅតែគ្រោះថ្នាក់ ព្រោះអាមេរិករក្សាមហិច្ឆតាចង់បន្តក្តោបក្តាប់ពិភពលោកទាំងមូល ដោយការអនុវត្តគោលនយោបាយចក្រពត្តិ និងអាណានិគមប្រភេទថ្មីផងដែរ។
បូលីវី និងរដ្ឋអាមេរិកឡាទីនមួយចំនួនទៀត អាចរំដោះខ្លួនចេញពីអំណាចនយោបាយរបស់ក្រុងវ៉ាស៊ីនតោន និងមានលទ្ធភាពគ្រប់គ្រងកិច្ចការសេដ្ឋកិច្ចជាតិដោយខ្លួនឯង ដោយមិនរណបអ្នកដទៃ។ លោកបានថ្លែងចំអកថា រដ្ឋបាលក្រុងវ៉ាស៊ីនតោនលែងមានលទ្ធភាពប្រើប្រាស់ស្ថានទូតរបស់ខ្លួន ដើម្បីផ្លាស់ប្តូររបប ឬសម្រេចកិច្ចការនយោបាយរដ្ឋអាមេរិកឡាទីនបានទៀតហើយបច្ចុប្បន្ននេះ។
អ្វីដែលសំខាន់ប្រធានាធិបតីបូលីវី បានពិពណ៌នាពីសារៈសំខាន់នៃការចាកចេញពីឥទ្ធិពលលនយោបាយអាមេរិក ដោយលើកឡើងពីសញ្ញាវិជ្ជមានជាច្រើន នៅអាមេរិកឡាទីន។ សេដ្ឋកិច្ចរដ្ឋអាមេរិកឡាទីន នៅតែបន្តរីកលូតលាស់ ខណៈពេលដែលសេដ្ឋកិច្ចនៅអឺរ៉ុបចេះតែធ្លាក់ចុះនិងប្រឈមមុខនឹងកំណើនអ្នកគ្មានការងារធ្វើ។ វាល្មមដល់ពេលដែលអឺរ៉ុបរំដោះខ្លួនឲ្យផុតពីអំណាចអាមេរិកដូចគ្នាដែរ ដើម្បីវិបុលភាពនិងសេរីភាពទាំងអស់គ្នា។
សូមបញ្ជាក់ថា ចំណងការទូតរវាងអាមេរិក និងរដ្ឋអាមេរិកឡាទីនមិនសូវប្រសើរឡើង ជាពិសេសជាមួយបូលីវី និងវេណេហ្ស៊ុយអេឡា។ ទំនាក់ទំនងការទូតអាមេរិក និងបូលីវី កាន់តែល្អក់កករខ្លាំងក្នុងឆ្នាំ២០១៣ ក្រោយពេលដែលអាមេរិកនិងរដ្ឋអឺរ៉ុបមួយចំនួនសម្រេចបិទដែនអាកាសខ្លួនមិនឲ្យយន្តហោះមេដឹកនាំបូលីវីខាងលើឆ្លងកាត់។ ពួកគេចោទថា អតីតមន្ត្រីជាប់កិច្ចសន្យាភ្នាកងារសន្តិសុខជាតិអាមេរិក Edward Snowden ដែលកំពុងស្ថិតក្រោមការចាប់ខ្លួនដោយអាជ្ញាអាមេរិក ស្ថិតនៅលើយន្តហោះជាមួយប្រធានាធិបតីបូលីវី។ ក្រោយបញ្ហានេះកើតឡើង លោក Morale គំរាមបិទស្ថានទូតអាមេរិកនៅលើទឹកដីខ្លួនផងដែរ៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
3 ថ្ងៃ
