ពិព័រណ៍ផលិតផលនាំចេញ-នាំចូល និងខេត្តមួយផលិតផលមួយលើកទី១០ រៀបចំធ្វើចុងឆ្នាំ

ជាតិ

សេដ្ឋកិច្ច

ពិព័រណ៍ផលិតផលនាំចេញ-នាំចូល និងខេត្តមួយផលិតផលមួយលើកទី១០ រៀបចំធ្វើចុងឆ្នាំ

15, Aug 2015 , 11:19 am

រូបភាព

ដោយ: សារព័ត៌មានថ្មីៗ

ក្រសួងពាណិជ្ជកម្ម នឹងរៀបចំ«ពិព័រណ៍ផលិតផលនាំចេញ នាំចូល និងខេត្តមួយ ផលិតផលមួយ កម្ពុជាលើកទី១០កម្រិតអន្តរជាតិ រយៈពេល៤ថ្ងៃ គឺចាប់ពីថ្ងៃទី១៥ដល់ទី១៨ខែធ្នូ ខាងមុខ នៅមជ្ឈមណ្ឌលពិព័រណ៍ និងសន្និបាតកោះពេជ្រ។

ព្រឹត្តិការណ៍នេះ រៀបចំឡើងក្នុងគោលបំណងជំរុញសកម្មភាពពាណិជ្ជកម្ម និងវិនិយោគនៅកម្ពុជា ជាពិសេសការនាំចេញដែលជាផ្នែកនៃការអភិវឌ្ឍសេដ្ឋកិច្ចកម្ពុជា។ វាក៏នឹងផ្តល់ឱកាសដើម្បីជំរុញឲ្យបរិយាកាសពាណិជ្ជកម្មក្នុងស្រុកមានសន្ទុះកើនឡើង និងដើម្បីបង្កើតការតភ្ជាប់ពាណិជ្ជកម្មក្នុងស្រុក រវាងរាជធានី-ខេត្តនៅទូទាំងប្រទេស និងរវាងកម្ពុជា និងពាណិជ្ជករបរទេស។ នេះបើយោងតាមសេចក្តីជូនដំណឹងរបស់ក្រសួងពាណិជ្ជកម្ម។

ផ្អែកតាមចក្តីជូនដំណឹងដដែល នៅមានព្រឹត្តិការណ៍មួយចំនួនទៀត នឹងត្រូវរៀបចំនៅក្នុងកំឡុងពេលពិព័រណ៍នេះដែរ ដែលរួមមានវេទិកាស្តីពីវិនិយោគ និងធុរកិច្ច សិក្ខាសាលាស្តីពីការជំរុញសកម្មភាពពាណិជ្ជកម្ម ជំនួបពាណិជ្ជកម្ម និងកម្មវិធីចុះហត្ថលេខាលើកិច្ចសន្យាពាណិជ្ជកម្ម និងវិនិយោគជាដើម។

ការដាក់តាំងផលិតផលស្រូវ-អង្ករកម្ពុជា និងជំនួបរវាងពាណិជ្ជកម្មសម្រាប់អ្នកនាំចេញអង្ករកម្ពុជា ក៏នឹងរៀបចំនាពិព័រណ៍រយៈ៤ថ្ងៃនោះដែរ៕