កីឡាជាតិ
ជាតិ
កម្ពុជា និងប៊ូតាន់ ប៉ះគ្នាក្នុងជំនួបមិត្តភាពអន្តរជាតិនាវេលាម៉ោង៦ និង៣០នាទីល្ងាចនេះ
× លោក Norio Tsokatae គ្រូបង្វឹកជម្រើសជាតិប៊ូតាន់ ដែលបានដឹកនាំមកប្រកួតជាមួយក្រុមម្ចាស់ផ្ទះជម្រើសជាតិកម្ពុជា នៅវេលាម៉ោង ៦:៣០ នាទីថ្ងៃព្រហស្បតិ៍ ទី ២០ ខែ សីហា ឆ្នាំ ២០១៥ នេះនៅទីលានពហុកីឡដ្ឋានជាតិក្នុងរាជធានីភ្នំពេញ យល់ថានេះបទពិសោធន៍សម្រាប់ក្រុមលោកមុនប្រកួតផ្លូវការមកដល់។
លើកឡើងក្នុងសន្និសីទសារព័ត៌មានម្សិលមិញនៅពហុកីឡដ្ឋានជាតិ លោកគ្រូបង្វឹកជនជាតិជប៉ុនរូបនេះយល់ថាជាឱកាសល្អសម្រាប់ក្រុមលោកពេលដែលបានប្រកួតជាមួយក្រុមដែលមានការអភិវឌ្ឍន៍លឿនដូចជាក្រុមជម្រើសជាតិកម្ពុជា។ លោកបន្ថែមថា ជម្រើសជាតិលោកប្រមូលផ្ដុំតាំងពីខែ មីនា ដើមឆ្នាំមកម្ល៉េះ ប៉ុន្តែត្រូវរំសាយទៅវិញព្រោះកីឡាករត្រូវជួយក្លិបរបស់ខ្លួនក្នុងលីកនៅប្រទេសប៊ូតាន់។ អំឡុងពេលរំសាយលោកក៏បានកោះហៅកីឡាករហ្វឹកហាត់រួមគ្នាឡើងវិញរៀងរាល់ ១ សប្ដាហ៍ជាប្រចាំ។
ចំណែកលោកគ្រូបង្វឹក Lee Tae Hoon របស់ក្រុមជម្រើសជាតិកម្ពុជាវិញគិតថា នេះក៏ជាឱកាសល្អសម្រាប់ក្រុមកម្ពុជាដែរ សម្រាប់ប្រកួតមិត្តភាពនេះ ហើយកម្ពុជានឹងប្រឹងឱ្យអស់ពីលទ្ធភាពក្នុងការប្រកួតនេះ។ បុរសជនជាតិកូរ៉េខាងត្បូងបន្ថែមថា៖ «ខ្ញុំបានមើលវីដេអូរបស់ក្រុមប៊ូតាន់ រួចហើយទាំងប្រកួតជាមួយ ស្រីលង្កា ហុងកុង ជាពិសេសប្រកួតចុងក្រោយជាមួយក្រុមជម្រើសជាតិចិន ព្រមទាំងមានទម្រង់លេងដ៏ល្អទោះបីជាចាញ់ក៏ដោយ»។
ក្រុមកម្ពុជាដែលមានសមាជិកចំនួន ២៤ នាក់បានប្រមូលផ្ដុំកាលពីថ្ងៃច័ន្ទដើមសប្ដាហ៍កន្លងទៅ ដោយស្នាក់នៅសណ្ឋាគារមួយកន្លែងក្នុងរាជធានីភ្នំពេញ ព្រមទាំងហ្វឹកហាត់នៅពហុកីឡដ្ឋាន ជាតិ។ក្រុមកម្ពុជា ត្រូវអវត្តមានកីឡាករ ប្រាក់ មុន្នីឧត្តម ព្រោះបញ្ហារបួសក្រលៀន ស្របពេលកីឡាករ ឈុន សុធារ័ត្ន, នេន សុធារ័ត្ន, ហួយ ផល្លីន និង ខ្សែការពារ សឿយ វិសាល ស្ថិតក្នុងបញ្ជីរបួសនៅឡើយ។
ជម្រើសជាតិប៊ូតាន់ ប្រកួតកម្ដៅសាច់ដុំត្រៀមជម្រុះពានរង្វាន់បាល់ទាត់ពិភពលោក 2018 FIFA World Cup Russia ប្រចាំទ្វីបអាស៊ី ក្នុងពូល C ជាមួយមហាយក្សចិន ហុងកុង កាតារ និង ម៉ាល់ឌីវ។ ចំណែកក្រុមជម្រើសជាតិកម្ពុជា ស្ថិតនៅពូល E ជាមួយជប៉ុន, ស៊ីរី, អាហ្វហ្គានីស្ថាន និង សិង្ហបុរី ។
ទូរទស្សន៍បាយ័នព័ត៌មានទទួលសិទ្ធិផ្សាយផ្ទាល់ក្នុងការប្រកួតមិត្តភាពអន្តរជាតិនេះ ស្របពេលអ្នកចង់ចូលទស្សនានៅទីលានប្រកួតផ្ទាល់ត្រូវជាវសំបុត្រ តម្លៃ ៨ ពាន់រៀល និង ២ ម៉ឺនរៀល។
តើកម្ពុជា ឬ ប៊ូតាន់ អាចយកឈ្នះក្នុងប្រកួតមិត្តភាពអន្តរជាតិដែលនឹងចាប់ផ្ដើមពីម៉ោង ៦:៣០ ល្ងាចនេះទៅ?
Tag:
ជម្រើសជាតិកម្ពុជា
World Cup 2018
© រក្សាសិទ្ធិដោយ thmeythmey.com