លោក គួច ម៉េងលី តំណាងល្បុក្កតោកម្ពុជាលើឆាកជាតិ និងអន្តរជាតិ

កីឡាជាតិ

ជាតិ

លោក គួច ម៉េងលី តំណាងល្បុក្កតោកម្ពុជាលើឆាកជាតិ និងអន្តរជាតិ

05, Sep 2015 , 8:23 am

រូបភាព

លោកវេជ្ជបណ្ឌិត គួច ម៉េងលី

ដោយ: សារព័ត៌មានថ្មីៗ

លោកវេជ្ជបណ្ឌិត គួច ម៉េងលី ត្រូវបានជ្រើសរើសឲ្យធ្វើជាប្រធានកិត្តិយសនៃសហព័ន្ធកីឡាល្បុក្កតោកម្ពុជា។ លោក គួច ម៉េងលី គឺជាស្ថាបនិកប្រធានក្រុមមប្រឹក្សាភិបាល និងជាអគ្គនាយកប្រតិបត្តិនៃក្រុមហ៊ុន Mengly J. Quach Education Holdings។ នៅព្រឹកថ្ងៃសៅរ៍ទី៥កញ្ញា លោក គួច ម៉េងលី គឺជាអធិបតីក្នុងពិធីប្រគល់ពានរង្វាន់ដល់ជ័យភាភីក្នុងការប្រកួតកីឡាល្បុក្កតោថ្នាក់ជាតិនៅពហុកីឡដ្ឋានជាតិអូឡាំពិក។

លោក វ៉ាត់ ចំរើន ដែលជាអគ្គលេខាធិការគណៈកម្មាធិការជាតិអូឡាំពិកកម្ពុជា និងជាប្រធានសហព័ន្ធកីឡាល្បុក្កតោកម្ពុជា បានអះអាងថា វត្តមានលោក គួច ម៉េងលី នៅក្នុងសហព័ន្ធកីឡាល្បុក្កតោកម្ពុជា នឹងជួយជំរុញ និងអភិវឌ្ឍន៍វិស័យកីឡាល្បុក្កតោកម្ពុជាថែមទៀត។

«ជាមួយតួនាទីប្រធានកិត្តិយសនេះ លោក គួច ម៉េងលី នឹងតំណាងឲ្យល្បុក្កតោកម្ពុជានៅគ្រប់វេទិកាជាតិ និងអន្តរជាតិ។ លោកនឹងជួយស្វែងរកការគាំទ្រនានាដើម្បីអភិវឌ្ឍន៍ល្បុក្កតោកម្ពុជា។ វត្តមានរបស់លោកគឺជាជំហរមួយរបស់សហព័ន្ធយើង»។ នេះគឺជាការពន្យល់របស់លោក វ៉ាត់ ចំរើន មុនលោកបញ្ជាក់បន្ថែមថា លោក គួច ម៉េងលី នឹងជួយរៀបចំការងាររដ្ឋបាលបន្ថែមទៀត ព្រមទាំងឯកសារល្បុក្កតោជាមួយគ្រូបង្វឹក។

លោក គួច ម៉េងលី ត្រូវបានមហាជន និងអ្នកជំនួញទទួលស្គាល់ខ្លាំងក្នុងវិស័យអប់រំតាមរយៈសាលារៀន និងវិទ្យាស្ថានអន្តរទ្វីបអាមេរិកាំង ហើយក៏បានបង្កើតកម្មវិធីមនុស្សធម៌ជាច្រើនទៀតតាមរយៈ Mengly J. Quach Foundation និង Mengly J. Quach Peace Prize ជាដើម។