លោក ហ៊ុន សែន បានលួចប្តេជ្ញាលាលែងពីតំណែង បើសិនជាផែនទីបោន ខុសពីផែនទីរដ្ឋាភិបាល

ជាតិ

នយោបាយជាតិ

លោក ហ៊ុន សែន បានលួចប្តេជ្ញាលាលែងពីតំណែង បើសិនជាផែនទីបោន ខុសពីផែនទីរដ្ឋាភិបាល

08, Sep 2015 , 5:16 pm

រូបភាព

ដោយ: សារព័ត៌មានថ្មីៗ

នៅរសៀលថ្ងៃទី៨កញ្ញានេះ ទូរទស្សន៍ជាតិកម្ពុជាបានផ្សាយពីការពន្យល់របស់លោកនាយករដ្ឋមន្ត្រី ហ៊ុន សែន អំពីបញ្ហាផែនទី។ បើតាមការអះអាងរបស់លោកនាយករដ្ឋមន្ត្រី បើសិនជាផែនទីកម្ពុជាដែលបារាំងឲ្យកម្ពុជាខ្ចីកាលពីថ្ងៃទី៣កញ្ញាសប្តាហ៍មុននោះ ខុសពីផែនទីផ្លូវការដែលរដ្ឋាភិបាលរបស់លោកបានប្រើប្រាស់ជាមួយប្រទេសវៀតណាមដើម្បីកំណត់ព្រំដែននោះ នោះលោកនឹងបានប្រកាសលាលែងពីតំណែង ហើយបញ្ចប់តួនាទីជានាយករដ្ឋមន្ត្រីកម្ពុជាបាត់ទៅហើយ។

លោក ហ៊ុន សែន បាននិយាយយ៉ាងដូច្នេះថា៖«ខ្ញុំបានប្តេជ្ញាចិត្តហើយថា បើផែនទីបារាំងខុសគ្នាពីផែនទីដែលចុះហត្ថលេខាជាមួយវៀតណាម ខ្ញុំនឹងប្រកាសលាលែងពីតំណែងភ្លាម មិនធ្វើជានាយករដ្ឋមន្ត្រីតទៀតទេ។ ហើយខ្ញុំនឹងចូលទៅក្នុងមន្ទីរឃុំឃាំងដើម្បីរង់ចាំតុលាការកាត់ទោស។ ព្រោះវាជាការទទួលខុសត្រូវចំពោះមុខប្រវត្តិសាស្ត្រ។ ហ៊ានស៊ី ហ៊ានសង ចិត្តជាកូនប្រុស»។

លោក ហ៊ុន សែន ដែលបានស្ថិតនៅក្នុងតំណែងនាយករដ្ឋមន្ត្រីកម្ពុជាតាំងពីឆ្នាំ១៩៨៥នោះ បានអត្ថាធិប្បាយថា ការលួចតាំងចិត្តចេញពីតំណែងនេះ គឺជាការប្រថុយប្រថានខ្លាំងណាស់សម្រាប់ជីវិតនយោបាយរបស់លោក ហើយដែលលោកបានមិនបានឲ្យភរិយា កូន និងសមាជិកគណបក្សដឹងឡើយនោះ។

នៅពេលនេះ នៅពេលដែលផែនទីកម្ពុជាដែលបារាំងគូស បានដូចគ្នាជាមួយនឹងផែនទីដែលរដ្ឋាភិបាលរបស់លោកបានប្រើប្រាស់ដើម្បីកំណត់ព្រំដែនជាមួយវៀតណាមហើយនោះ វាប្រាកដជាដល់ពេលដែលប្រមុខរដ្ឋាភិបាលត្រូវតបតទល់នឹងក្រុមប្រឆាំងលោកក្នុងសំណុំរឿងព្រំដែនហើយ។ លោក ហ៊ុន សែន បានព្រមានចាត់វិធានការលើអ្នកដែលចោទប្រកាន់រដ្ឋាភិបាលប្រើផែនទីក្លែងក្លាយ៕