អាជ្ញាធរបន្តឃាត់ខ្លួនវៀតណាមខុសច្បាប់ និងត្រៀមបណ្តេញចេញនៅសប្តាហ៍ក្រោយ

ជាតិ

អាជ្ញាធរបន្តឃាត់ខ្លួនវៀតណាមខុសច្បាប់ និងត្រៀមបណ្តេញចេញនៅសប្តាហ៍ក្រោយ

19, Sep 2015 , 4:45 pm

រូបភាព

ដោយ: ម៉ៅ សុផា

ជនអន្តោប្រវេសន៍វៀតណាម ចំនួន ៧នាក់ ត្រូវបានសមត្ថកិច្ចឃាត់ខ្លួន ស្ថិននៅសង្កាត់ស្រះចក ខណ្ឌដូនពេញ កាលពីថ្ងៃទី១៨ ខែកញ្ញា ម្សិលមិញ។ ជនជាតិវៀតណាមទាំង ៧នាក់នេះ អាចនឹងត្រូវបានបណ្តេញចេញពីកម្ពុជា នៅថ្ងៃសប្តាហ៍ក្រោយ។ នេះជាការបញ្ជាក់របស់លោក អ៊ុក ហៃសីលា ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ។

បើតាមលោក អ៊ុក ហៃសីលា ជនជាតិវៀតណាចំនួន ៧នាក់ ដែលលួចស្នាក់នៅ និងរកស៊ីដោយខុសច្បាប់ក្នុងព្រះរាជាណាចក្រកម្ពុជា ត្រូវបានសមត្ថកិច្ចឃាត់ខ្លួន នៅយានដ្ឋានជួសជុលរថយន្ត សង្កាត់ស្រះចក ខណ្ឌដូនពេញ។ នាយកដ្ឋានស៊ើបអង្កេត និងអនុវត្តនីតិវិធី បានបញ្ជូនជនជាតិវៀតណាមទាំងនោះទៅកាន់អគ្គនាយដ្ឋានអន្តោប្រវេសន៍ ដើម្បីធ្វើការសាកសួរចម្លើយ។

លោកបញ្ជាក់ដូច្នេះថា៖ «ជនជាតិវៀតណាមទាំងនោះគឺសុទ្ធតែជាបុរសទាំងអស់ ហើយពួកគេធ្វើការជាជាងបាញ់ថ្នាំ និងជួសជុលរថយន្ត។ ពួកគេមករស់នៅដោយគ្មានលិខិតផ្លូវការអ្វីទាំងអស់។ ដូច្នេះយើងអាចនឹងបណ្តេញពួកគេចេញពីកម្ពុជានៅថ្ងៃចន្ទ ឬថ្ងៃអង្គារ ដើមសប្តាហ៍ក្រោយ បន្ទាប់ពីក្រសួងមហាផ្ទៃសម្រេចថាបណ្តេញចេញ»។

កាលពីកន្លងទៅថ្មីៗនេះ ប្រធាននាយកដ្ឋានស៊ើបអង្កេតរូបនេះ ក៏ធ្លាប់អំពាវនាវដល់ប្រជាពលរដ្ឋគ្រប់ទីកន្លែងជួយសហការជាមួយ សមត្ថកិច្ច ក្នុងការឃាត់ខ្លួនជនជាតិវៀតណាម ដែលលួចមកស្នាក់នៅ និងរកស៊ីដោយខុសច្បាប់ក្នុងព្រះរាជាណាចក្រកម្ពុជា។ លោកស្នើឡើងដូច្នេះថា៖ «យើងចង់ឲ្យប្រជាពលរដ្ឋគ្រប់រូប ជួយរាយការណ៍ជូនកម្លាំងគនរបាល ប្រសិនបើពួកគាត់បានដឹងថា មានជនជាតិវៀតណាម កំពុងរស់នៅកន្លែងណា ដោយខុសច្បាប់ គ្មានលិខិតឆ្លងដែន ឬក៏ឯកសារត្រឹមត្រូវនោះទេ»។

សូមបញ្ជាក់ថា ជនអន្តោប្រវេសន៍ខុសច្បាប់សរុបទាំងអស់ ៤៦ជនជាតិ មានចំនួន១៨២៥នាក់នាក់ (ស្រី២៥៦នាក់) ត្រូវបានសមត្ថកិច្ចឃាត់ខ្លួន និងបណ្តេញចេញពីកម្ពុជា ដោយគិតត្រឹមរយៈពេល ៩ខែ នៅឆ្នាំ២០១៥នេះ។ ក្នុងចំណោមជនអន្តោប្រវេសន៍ទាំងនោះ មានជនជាតិវៀតណាមចំនួន១៦៤១នាក់ (ស្រី២៤៣នាក់)៕