លោក ម៉ម ប៊ុនហេង អំពាវនាវឲ្យឈប់ផឹកស្រាស-ស្រាថ្នាំដែលគ្មានការត្រួតពិនិត្យ

ជាតិ

សុខភាព

លោក ម៉ម ប៊ុនហេង អំពាវនាវឲ្យឈប់ផឹកស្រាស-ស្រាថ្នាំដែលគ្មានការត្រួតពិនិត្យ

13, Dec 2015 , 6:00 pm

រូបភាព

ដោយ:

រហូតមកដល់ថ្ងៃទី១២ ធ្នូម្សិលមិញ ពលរដ្ឋនៅខេត្តក្រចេះដែលពុលស្រាស និងស្រាថ្នាំ និងការបរិភោគសាច់ឆ្កែកើនឡើងដល់១៥៧នាក់ ក្នុងនោះមាន១៣នាក់បានស្លាប់។ ក្រោយមានករណីនេះផ្ទុះឡើង លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បាន អំពាវនាវឲ្យប្រជាពលរដ្ឋបញ្ឈប់ជាបន្ទាន់នូវការបិរភោគស្រាស ឬស្រាថ្នាំ ដែលផលិតដោយគ្មានការត្រួតពិនិត្យត្រឹមត្រូវ និងត្រូវបញ្ឈប់ជាបន្ទាន់នូវការបរិភោគសាច់សត្វដែលឈឺ ឬងាប់។

ចាប់តាំងពីហេតុការណ៍សង្ស័យពុលស្រាកើតឡើងនៅថ្ងៃទី១៩-២៣ ខែវិច្ឆិកា រហូតដល់ថ្ងៃទី១២ ខែធ្នូ នេះ មន្ទីរសុខាភិបាលខេត្តក្រចេះ និងក្រសួងសុខភិបាល បានតាមដាន និងចាត់វិធានការជាបន្តបន្ទាប់ ក្រោយពីមានប្រជាពលរដ្ឋនៅខេត្តក្រចេះពុលស្រាកើនឡើងដល់១៥៧នាក់ ស្រី៩នាក់ ក្នុងនោះមានអ្នកស្លាប់១៣នាក់។

ក្នុងសេចក្តីប្រកាសព័ត៌មានរបស់ក្រសួងសុខាភិបាលនៅព្រឹកថ្ងៃទី១៣ ធ្នូនេះ បានសរសេរថា លទ្ធផលវិភាគសំណាកស្រាស ដែលទទួលបានពីកន្លែងកើតហេតុរបស់មន្ទីរពិសោធន៍ជាតិនៃក្រសួងសុខាពិបាលបានរកឃើញថា ស្រាស និងស្រាថ្នាំ ដែលបងប្អូនប្រជាពលរដ្ឋបានពិសារក្នុងតំបន់ដែលកើតហេតុនេះ មានសារជាតិមេតាណុលកម្រិតខ្ពស់ ដែលធ្វើឲ្យស្លាប់។ ករណីពុលស្រាដោយសារជាតិមេតាណុល ដែលមាននៅក្នុងស្រាលើសពីកម្រិតធម្មតា (០.១៥%) អាចបណ្តាលឲ្យងងឹតភ្នែក សន្លប់ ប្រកាច់ ពិបាកដកដង្ហើម និងអាចវិវដ្តទៅស្លាប់បាន៕