ជាតិ
សង្គមជាតិ
×![]()
ភ្នំពេញ៖ បេក្ខជនពិការ ៣ រួបរួមមាន និស្សិត ឈឿន កុសល និស្សិត ជឿន គឺមហេង និង និស្សិត សុត មនោរម្យ កាលពីថ្ងៃទី២៥ខែធ្នូឆ្នាំ២០១៥បានទទួលពានរង្វាន់ក្នុងកម្មពិធីប្រកួតប្រជែងជជែកពិភាក្សា និង ការតស៊ូមតិ បន្ទាប់ពីការឡើងការពារលើប្រធានបទជាច្រើន និងឆ្លងកាត់ការជម្រុះជាច្រើនជុំរួចមក។ លោក គង់ វិចិត្រា អ្នករៀបចំកម្មវិធី បានមានប្រសាសន៍ថា សូមឲ្យមើលឃើញសមត្ថភាពរបស់ជនពិការជាជាងមើលឃើញតែភាពពិការ។
យុវជនពិការ៣រូប ទទួលជ័យលាភីក្នុងកម្មវិធីប្រកួតប្រជែងជជែកពិភាក្សា និង ការតស៊ូមតិកាលពីថ្ងៃទី២៥ ខែធ្នូឆ្នាំ២០១៥ នាសាកលវិទ្យាល័យអាស៊ីអឺរ៉ុប។ ជនពិការទាំង៣រូបរួមមាន លោក ឈឿន កុសល ជ័យលាភីលេខ១ ជានិស្សិតឆ្នាំទី២ជំនាញ IT កញ្ញា ជឿន គឹមហេង ជ័យលាភីលេខ២ ជានិស្សិតឆ្នាំទី៤ជំនាញភាសាបរទេស និង លោក សុត មនោរម្យ ជ័យលាភីលេខ៣ ជានិស្សិតឆ្នាំទី៣ជំនាញ IT។ ម្ចាស់ពានរង្វាន់ក្នុងកម្មវិធីនេះ ជ័យលាភីលេខ១ ទទួលបានប្រាក់៥០ម៉ឺនរៀល ជ័យលាភីលេខ២ទទួលបានប្រាក់៣០ម៉ឺនរៀល និង ជ័យលាភីលេខ៣ ទទួលបានប្រាក់១៥ម៉ឺនរៀល។
លោក គង់ វិចិត្រា នាយកប្រតិបត្តិអង្គការមូលនិធិកុមារពិការ និងជាអ្នករៀបចំកម្មវិធីនេះ បានប្រាប់ថា តាមការប្រកួតប្រជែងផ្នែកតស៊ូមតិនេះ លោកសង្កេតឃើញថា បេក្ខជនពិការទាំងនេះមានភាពក្លាហាន និងខិតខំស្រាវជ្រាវលើប្រធានបទ ដើម្បីបើកបង្ហាញសមត្ថភាពរបស់ពួកគេរៀងខ្លួនៗ។ លោកនិយាយថា យុវជនពិការកម្ពុជាបច្ចុប្បន្ននេះ កាន់តែមានសមត្ថភាពជាងមុន ហើយអ្នកពិការខ្លះមានភាពលេចធ្លោតាមរយៈការទទួលបានពានរង្វាន់លើឆាកជាតិនិងឆាកអន្តរជាតិទៀតផង។
ប៉ុន្តែ ជនពិការនៅតែរងការរើសអើងពីមជ្ឈដ្ឋានមួយភាគធំ ដោយសារតែកាយសម្បទារបស់ពួកគាត់។ នេះបើការមើលឃើញជាក់ស្តែងរបស់លោក វិចិត្រា មុននឹងលោកមានប្រសាសន៍យ៉ាងដូច្នេះថា៖« សូមឲ្យមើលឃើញសមត្ថភាពរបស់ជនពិការជាជាងមើលឃើញតែភាពពិការ»។ ដូច្នេះ លោកមានបំណងបង្កើតវេទិការតស៊ូមតិលើកក្រោយៗទៀត ដើម្បីផ្តល់ឱកាសដល់ជនពិការកម្ពុជា។
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
2 ថ្ងៃ
