ជាតិ
សាលារាជធានីភ្នំពេញចាប់ផ្ដើមខួងធ្វើតេស្តស្រទាប់ដី ដើម្បីសង់ស្ពានអាកាសនិងផ្លូវក្រោមដី
× សាលារាជធានីភ្នំពេញមានគម្រោងបន្ដស្ថាបនាស្ពានអាកាសចំនួន៣ និងផ្លូវក្រោមដីមួយខ្សែបន្ថែមទៀត ដើម្បីកែលម្អ និងដោះស្រាយបញ្ហាកកស្ទះចរាចរក្នុងរាជធានីភ្នំពេញ។សាលារាជធានីភ្នំពេញ បានឲ្យក្រុមការងារបច្ចេកទេស ចាប់ផ្តើមដំណើរការខួងធ្វើតេស្តស្រទាប់ដី នៅតំបន់ស្ពានអាកាសនិងផ្លូវក្រោមដីក្បាលថ្នល់ ដើម្បីត្រៀមស្ថាបនាក្នុងពេលឆាប់ៗនេះ។ នេះបើតាមទីភ្នាក់ងារសារព័ត៌មានជាតិកម្ពុជា AKP។
ប្រធានមន្ទីរសាធារណការនិងដឹកជញ្ជូនរាជធានីភ្នំពេញ លោកសាំ ពិសិដ្ឋ បានឲ្យដឹងថា គម្រោងសាងសងស្ពានអាកាស និងផ្លូវក្រោមដី ដែលសាលារាជធានីភ្នំពេញត្រៀមស្ថាបនានោះ រួមមាន ទី១.ស្ពានអាកាសស្របពីលើមហាវិថីព្រះនរោត្តមបត់ឆ្វេង ឡើងភ្ជាប់ទៅស្ពានព្រះមុនីវង្សថ្មី។ ទី២.ស្ពានអាកាសតភ្ជាប់ពីស្ពានព្រះមុនីវង្សចាស់បត់កោងស្តាំឡើងទៅចាក់អង្រែ។ ទី៣.ស្ពានអាកាសស្របពីលើមហាវិថីព្រះមុនីវង្សបត់ទៅមហាវិថីព្រះនរោត្តម រួចបត់ស្តាំឡើងស្ពានវិញ និងទី៤.ផ្លូវក្រោមដី១ខ្សែទៀត ចាប់ពីចាក់តំបន់អង្រែឆ្ពោះទៅចេញនៅមហាវិថីព្រះមុនីវង្សតែម្តង។
លោក សាំ ពិសិដ្ឋ បានបញ្ជាក់ថា ស្ពានអាកាសដែលគ្រោងសាងសងខាងលើនេះមាន បណ្តោយមិនស្មើគ្នានោះទេ គឺចាប់ពី ២២០ ទៅ២៤០ម៉ែត្រ ទទឹងចាប់ពី៥ទៅ៧ម៉ែត្រ។ ចំណែកផ្លូវក្រោមដីមានបណ្តោយ៣០៦ម៉ែត្រ ។ លោកថា គម្រោងសាងសងស្ពានអាកាស និងផ្លូវក្រោមដីបន្ថែមនេះ ដោយសារតែសាលារាជធានីភ្នំពេញ មើលឃើញថា បញ្ហាកកស្ទះចរាចរនៅតែកើតមាន នៅតំបន់ស្ពានអាកាសក្បាលថ្នល់។
ថ្លែងប្រាប់សារព័ត៌មានថ្មីៗ អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បញ្ជាក់ថា គម្រោងសាងសង់ស្ពានអាកាស និងផ្លូវក្រោមដីនេះ មិនទាន់កំណត់ពេលស្ថាបនានៅឡើយទេ ដោយត្រូវរង់ចាំការអនុញ្ញាតពីរដ្ឋាភិបាលសិន។ បើតាមលោក ឡុង ឌីម៉ង់ គម្រោងសាងសង់នេះ មិនមែនជាជំនួយពីបរទេសទេ ពោលគឺរដ្ឋជាអ្នកចំណាយថវិកាសាងសង់ ។ លោកថា ការចំណាយនេះក៏មិនទាន់អាចកំណត់តម្លៃច្បាស់នៅឡើយទេ៕
© រក្សាសិទ្ធិដោយ thmeythmey.com