ជាតិ
សុវត្តិភាព ចរាចរណ៍
ជិះម៉ូតូមិនពាក់មួកសុវត្ថិភាពនឹងត្រូវផាកពិន័យ១៥០០០រៀល រូបថតហ្វេសប៊ុក
× ស្ទើរគ្រប់ពលរដ្ឋទាំងអស់ អ្នករួមដំណើរពីក្រោយអ្នកបើកបរម៉ូតូភាគច្រើន មិនបានពាក់មួកសុវត្ថិភាពនោះឡើយ។ ប៉ុន្តែទម្លាប់មិនពាក់មួកនេះ មិនអាចបន្តបានទៀតឡើយ ដោយសារតែការរឹតបន្តឹងនៃច្បាប់ចរាចរណ៍ផ្លូវគោកថ្មី រួមទាំងអនុក្រឹត្យមួយរបស់រដ្ឋាភិបាល។
នៅឆ្នាំ២០១៦ខាងមុខនេះ មួកសុវត្ថិភាពនោះ នឹងក្លាយជាវត្ថុការពារសំខាន់ សម្រាប់អ្នកបើកបរនឹងអ្នករួមដំណើរគ្រប់រូប រួមទាំងកុមារអាយុចាប់ពី៣ឆ្នាំឡើងទៅ ដោយសារច្បាប់តម្រូវឲ្យអ្នកបើកបរ និងអ្នករួមដំណើរទាំងអស់ ពាក់មួកសុវត្ថិភាព។ បើមិនពាក់មួកសុវត្ថិភាពទេ ពួកគេនឹងទទួលរងការពិន័យ ពីនគរបាលចរាចរណ៍ជាក់ជាមិនខាន។
ត្រង់ចំណុច៨នៃមាត្រា៨ ក្នុងច្បាប់ចរាចរណ៍ផ្លូវគោកថ្មីចែងថា អ្នកបើកបរទោចក្រយានយន្ត និងអ្នករួមដំណើរ ព្រមទាំងកុមារដែលមានអាយុចាប់ពី៣ឆ្នាំឡើងទៅ ត្រូវពាក់មួកសុវត្ថិភាពឲ្យបានត្រឹមត្រូវ។ អ្នកបើកបរត្រីចក្រយានយន្ត និងអ្នកបើកបរទោចក្រយានយន្តសណ្តោងរ៉ឺម៉កត្រូវពាក់មួយសុវត្ថិភាពឲ្យបានត្រឹមត្រូវ។
តាមអនុក្រឹត្យចុះថ្ងៃទី៨ ខែកក្កដា អ្នកបើកបរ និងអ្នករួមដំណើររាប់ចាប់ពីកុមារអាយុ ៣ឆ្នាំឡើងទៅ រួមទាំងព្រះសង្ឃផង ដែលមិនពាក់មួកសុវត្ថិភាព ឬពាក់មិនត្រឹមត្រូវ នឹងត្រូវផាកពិន័យចំនួន ១៥.០០០រៀល៕
© រក្សាសិទ្ធិដោយ thmeythmey.com