អត្ថបទពាណិជ្ជកម្ម
កម្មវិធីកម្មសិក្សាអន្តរជាតិ អេស ស៊ី ជី ឆ្នាំ២០១៦ ចាប់ផ្តើមទទួលពាក្យហើយ
× ក្រុមហ៊ុន អេស ស៊ី ជី ដែលជាក្រុមហ៊ុនប្រកបដោយនិរន្តរភាពឈានមុខគេមួយនៅអាស៊ាន បានប្រកាសចាប់ផ្តើមកម្មវិធីកម្មសិក្សាអន្តរជាតិ អេស ស៊ី ជី ឆ្នាំ២០១៦ (SCG International Internship Program 2016) ដែលជាកម្មវិធីចុះកម្មសិក្សាជាលក្ខណៈអន្តរជាតិ រយៈពេលមួយខែទៅកាន់ប្រទេសថៃ ឧបត្ថម្ភដោយក្រុមហ៊ុន អេស ស៊ី ជី សម្រាប់និស្សិតឆ្នាំទី៣ ដល់ឆ្នាំទី៥ ដែលកំពុងសិក្សាមុខវិជ្ជាមួយចំនួន។
កម្មវិធីនេះជាផ្នែកមួយនៃកិច្ចខិតខំប្រឹងប្រែងរបស់ក្រុមហ៊ុន អេស ស៊ី ជី ក្នុងការលើកកម្ពស់ការអប់រំថា្នក់ឧត្តមសិក្សានៅក្នុងតំបន់អាស៊ាន តាមរយៈការផ្តល់ឱកាសសម្រាប់និស្សិតសាកលវិទ្យាល័យ ទទួលបានបទពិសោធន៍ការងារ និងការបណ្តុះបណ្តាលនៅក្រុមហ៊ុន អេស ស៊ី ជី ប្រទេសថៃ ក៏ដូចជាទទួលបានឱកាសហាត់ពត់ខ្លួននៅក្នុងកម្មវិធីអន្តរជាតិមួយ ។
លោកស្រី Paravee Tumrongsiskul ប្រធានផ្នែកធនធានមនុស្សប្រចាំប្រទេសកម្ពុជា នៃក្រុមហ៊ុន អេស ស៊ី ជី បាននិយាយថា៖«ប្រសិនបើអ្នកមានឆន្ទៈ និងភាពស្វិតស្វាញ ក្នុងការសិក្សា ក៏ដូចជាមានបំណងចង់អភិវឌ្ឍន៍ខ្លួនសម្រាប់អាជីពនាពេលអនាគត អ្នកគួរតែសាកល្បងដាក់ពាក្យចូលរួមក្នុងកម្មវិធីកម្មសិក្សាអន្តរជាតិ អេស ស៊ី ជី»។ អ្នកនឹងទទួលបានបទពិសោធន៍ការងារជាក់ស្តែង ស្វែងយល់ពីវប្បធម៌ការងារក្នុងប្រទេសដ៏ទៃ និងភ្ជាប់មិត្តភាពជាមួយនិស្សិតអន្តរជាតិផ្សេងទៀត ដែលសុទ្ធតែជាកត្តាគន្លឹះដើម្បីទទួលបានជោគជ័យក្នុងអាជីពការងារនាពេលអនាគត ជាពិសេសនៅក្នុងទីផ្សារការងារទំនើប ដែលមានការប្រកួតប្រជែងខ្ពស់។
យោងតាមក្រុមហ៊ុន អេស ស៊ី ជី កម្មវិធីកម្មសិក្សាអន្តរជាតិ អេស ស៊ី ជី ឆ្នាំ២០១៦ នឹងជ្រើសរើសនិស្សិតកម្មសិក្សាសរុបចំនួន ៤០នាក់ ពីប្រទេសសមាជិកអាស៊ានចំនួន៥ គឺកម្ពុជា ឥណ្ឌូនេស៊ី វៀតណាម មីយ៉ាន់ម៉ា និងហ្វីលីពីន។ និស្សិតកម្មសិក្សាដែលត្រូវបានជ្រើស និងទទួលបានសំបុត្រធ្វើដំណើរទៅកាន់ទីក្រុងបាងកក ប្រទេសថៃ ការផ្គត់ផ្គង់អាហារ និងការស្នាក់នៅក្នុងប្រទេសថៃ ប្រាក់ឧបត្ថម្ភប្រចាំថ្ងៃ ការចូលរួមក្នុងកម្មវិធីបណ្តុះបណ្តាពិសេស ការចូលរួមក្នុងសកម្មភាពសង្គមរបស់ក្រុមហ៊ុន អេស ស៊ី ជី ឱកាសដើរទស្សនាកម្សាន្តក្នុងប្រទេសថៃ និងវិញ្ញាបនបត្របញ្ជាក់ការចូលរួមទៀតផង។
លក្ខខណ្ឌតម្រូវចំពោះបេក្ខជន-បេក្ខនារី រួមមាន៖ មានសញ្ជាតិខ្មែរ ជានិស្សិតកំពុងសិក្សាក្នុងឆ្នាំទី៣ ដល់ទី៥ ថ្នាក់បរិញ្ញាបត្រ ក្នុងមុខជំនាញពាក់ព័ន្ធ ឬប្រហាក់ប្រហែល ដូចតទៅ៖ ១. មុខជំនាញវិស្វកម្ម (ដូចជាជំនាញពាក់ព័ន្ធ និងធនធានរ៉ែ វិស្វកម្មស៊ីវិល វិស្វកម្មមេកានិក វិស្វកម្មអគ្គិសនី ស្វ័យប្រវត្តិកម្ម គីមីវិទ្យា ឬវិស្វកម្មឧស្សាហកម្ម) ២.មុខជំនាញពាណិជ្ជកម្ម (ដូចជាមុខជំនាញគ្រប់គ្រងពាណិជ្ជកម្ម សេដ្ឋកិច្ច ឬទីផ្សារ) ៣. វិទ្យាសាស្ត្រសង្គម (ដូចជាមុខជំនាញ ចិត្តវិទ្យា វិទ្យាសាស្ត្រនយោបាយ ឬសង្គមសាស្ត្រ)។ និស្សិតត្រូវមានសមត្ថភាពភាសាអង់គ្លេស មានភាពស្វាហាប់ និងឆន្ទៈក្នុងការសិក្សា ក៏ដូចជាមានពេលវេលាមួយខែ ដើម្បីចូលរួមក្នុងកម្មវិធីកម្មសិក្សានៅប្រទេសថៃ ពីថ្ងៃទី១១ កក្កដា ដល់៩ សីហា ឆ្នាំ២០១៦ ។
និស្សិតដែលមានចំណាប់អារម្មណ៍ អាចចូលទៅកាន់ទំព័រហ្វេសប៊ុក www.facebook.com/SCGcareer និងបំពេញពាក្យសុំដែលអាចទាញយកបានតាមទំព័រ https://goo.gl/HQIqTt ។ នៅក្នុងពាក្យសុំដែលត្រូវបំពេញតាមអនឡាញ (online) នេះ និស្សិតត្រូវសរសេរសំណេរប្រវែង ៤០០ទៅ៦០០ពាក្យ ចំនួនពីរសម្រាប់ភ្ជាប់ទៅជាមួយផងដែរ។ ថ្ងៃផុតកំណត់ទទួលពាក្យ គឺថ្ងៃទី២២ កុម្ភៈ ឆ្នាំ២០១៦ ហើយសម្រាប់បេក្ខជន-បេក្ខនារី ដែលជាប់ជុំដំបូង ក្រុមហ៊ុននឹងទាក់ទងដើម្បីធ្វើការសម្ភាសបន្ថែម ត្រឹមថ្ងៃ ១៧ មីនា ឆ្នាំ២០១៦។ ចំពោះព័ត៌មានបន្ថែម សូមចូលទៅកាន់ www.facebook.com/SCGcareer ។
កម្មវិធីកម្មសិក្សាអន្តរជាតិ អេស ស៊ី ជី បានចាប់ផ្តើមអនុវត្តន៍ក្នុងឆ្នាំ ២០១៣ និងបានទទួលចំណាប់អារម្មណ៍ពីនិស្សិតរាប់ពាន់នាក់ នៅទូទាំងតំបន់អាស៊ាន រួមទាំងកម្ពុជាផងដែរ។ កាលពីឆ្នាំមុន បេក្ខជន-បេក្ខនារីចំនួន៩០២នាក់ មកពីទូទាំងតំបន់អាស៊ាន បានដាក់ពាក្យចូលរួម។ កម្មវិធីនេះគឺ ជាកម្មវិធីអភិវឌ្ឍន៍ធនធានមនុស្សដ៏ពេញនិយមបំផុតមួយ របស់ក្រុមហ៊ុន អេស ស៊ី ជី បន្ថែមពីលើ កម្មវិធីអ្នកដឹកនាំវ័យក្មេង អេស ស៊ី ជី (SCG Young Leaders Program) និងកម្មវិធីអាហារូបករណ៍ អេស ស៊ី ជី ចែករំលែកក្តីស្រមៃជាដើម ។
សូមទស្សនាវីដេអូ៖
( អត្ថបទពាណិជ្ជកម្ម )
© រក្សាសិទ្ធិដោយ thmeythmey.com