ពីនេះ ពីនោះ
តើពាក្យ«គុណនាមប្រក្រតី » មានន័យដូចម្ដេចនៅក្នុងអក្សរសិល្ប៍ខ្មែរ?
× នៅក្នុងសទ្ទានុក្រមភាសាវិទ្យា និងអក្សរសិល្ប៍ខ្មែរ ដែលអនុម័តដោយក្រុមប្រឹក្សាជាតិភាសាខ្មែរ បានកំណត់អត្ថន័យពាក្យ «គុណនាមប្រក្រតី» ដូចខាងក្រោម៖
គុណនាមប្រក្រតី មានន័យថា ជាពាក្យមួយប្រភេទដែលអាស្រ័យនឹងនាម បញ្ជាក់លក្ខណៈឲ្យនាមដូចកម្មរបស់នាមដែរ។
កម្មរបស់នាមអាចជានាមឬជាកិរិយាស័ព្ទ ប៉ុន្តែគុណនាមប្រក្រតីមានលក្ខណៈប្លែកពីកម្មរបស់នាម ដូចមានឧទាហរណ៍ខាងក្រោម៖
១. ការបញ្ជាក់លក្ខណៈឲ្យនាម(ដូចកម្មរបស់នាមដែរ) ៖ ផ្ទះល្អ( ល្អ គុណនាមដែលមានមុខងារជាគុណបទ), ផ្ទះថ្ម ( ថ្ម នាមដែលមានមុខងារជាកម្មរបស់ផ្ទះ), ផ្ទះជួល( ជួល កិរិយាសព្ទដែលមានមុខងារជាកម្មរបស់ផ្ទះ)។ គេអាចនិយាយថា «ផ្ទះដ៏ល្អ ប៉ុន្តែមិនអាចថា ផ្ទះដ៏ថ្ម »បានទេ។
២. គេអាចដាក់គុណនាមប្រក្រតី ល្អ ឲ្យទៅជាវិសេសគុណនាម ឬ ជាអតិវិសេសគុណនាម ប៉ុន្តែកម្មរបស់នាម ដែលជានាមឬជាកិរិយាសព្ទនោះ គេមិនអាចដាក់វាឲ្យទៅជាវិសេសគុណនាម ឬអតិវិសេសគុណនាមបានទេ។ ឧទាហរណ៍៖ ផ្ទះល្អ អាចដាក់ជាវិសេសគុណនាមៈ ផ្ទះនេះល្អជាងផ្ទះនោះ, ផ្ទះល្អ អាចដាក់ទៅជាអតិវិសេសគុណនាមៈ ផ្ទះនេះល្អណាស់/ ល្អពេក,....។ រីឯផ្ទះថ្ម, ផ្ទះជួលវិញ គេមិនអាចដាក់វាឲ្យទៅជាវិសេសគុណនាមឬអតិវិសេសគុណនាមទេ។
៣. គុណនាមប្រក្រតី អាចមានទម្រង់បដិសេធ(ដូចកិរិយាសព្ទដែរ ផ្ទុយពីនាមដែលជាកម្មរបស់នាមគ្នាឯង)៖ ផ្ទះមិនល្អ៕
© រក្សាសិទ្ធិដោយ thmeythmey.com