ពីនេះ ពីនោះ
តើមានលក្ខខ័ណ្ឌអ្វីខ្លះ ដើម្បីក្លាយជាប្រទេសមួយបាន?
× ភ្នំពេញ៖ កាលពីសម័យអតីតកាល មនុស្សមិនទាន់មានប្រទេសនោះទេ។ កាលនោះ មនុស្សបានរស់នៅជាលក្ខណៈកុលសម្ព័ន្ធដែលមានមេកន្ទ្រាញជាអ្នកដឹកនាំ។ ពេលនោះ មនុស្សរស់នៅតាមបែបធម្មជាតិ គ្មានតុលាការ គ្មានសភា និងរដ្ឋាភិបាល។ លើសពីនេះ ការរស់នៅ គឺក្រុមកុលសម្ព័ន្ធរស់នៅដោយខ្លួនទីពឹងខ្លួន គ្មានទំនាក់ការទូតអ្វីនោះទេ។
ក្រោយមក ដោយសារ ការរស់នៅរបៀបនេះ ជួបការលំបាកដូចជា គ្រោះធម្មជាតិ ការជិះជាន់កាប់សម្លាប់ចំពោះអ្នកទន់ខ្សោយ និងបង្កជាសង្គ្រាមឥតឈប់ឈររវាងកុលសម្ព័ន្ធ និងកុលសម្ព័ន្ធ ទើបមនុស្សបង្កើតជារដ្ឋ ឬប្រទេសឡើង ដើម្បីរៀបចំរចនាសម្ព័ន្ធសង្គម មានអ្នកដឹកនាំត្រឹមត្រូវ ដើម្បីធ្វើមនុស្សទូទៅអាចរស់នៅបានសុខសាន្ត។ តើមានលក្ខខ័ណ្ឌអ្វីខ្លះ ដើម្បីកកើតជាប្រទេសមួយបាន?
ក្នុងវិទ្យាសាស្ត្រនយោបាយ ដើម្បីក្លាយជារដ្ឋ ឬប្រទេសមួយបាន គឺត្រូវមាន៤លក្ខខ័ណ្ឌ៖
ទី១៖ ត្រូវមានប្រជាជន ទោះតិច ឬច្រើន ដាច់ខាត មិនអាចគ្មានប្រជាជនបានទេ
ទី២៖ ត្រូវមានដែនដីសម្រាប់ការរស់នៅរបស់ប្រជាជន
ទី៣៖ ត្រូវមានអំណាចគ្រប់គ្រងរដ្ឋ ពោលគឺត្រូវមានរដ្ឋាភិបាល សភា តុលាការ ដែលជាអំណាចកំពូលរបស់ជាតិ។
ទី៤៖ ត្រូវមានអធិបតេយ្យភាព គឺមានការទទួលស្គាល់ពីអន្តរជាតិ និងមានសិទ្ធិអំណាចក្នុងការសម្រេចកិច្ចប្រទេសជាតិ និងកិច្ចការបរទេស៕ (ដកស្រង់ពីសៀវភៅ«វិទ្យាសាស្ត្រនយោបាយ និងប្រវត្តិគំនិតនយោបាយ» ទំព័រ៤៦០ រៀបរៀង ដោយ បណ្ឌិត ឈុន សារ៉េត)
© រក្សាសិទ្ធិដោយ thmeythmey.com