សម្តេច ស ខេង ថា លោកមិនប្តូរតំណែងស្នងការ លោក ជួន សុវណ្ណ ក្រោយដំឡើងផ្កាយបួន

ជាតិ

សម្តេច ស ខេង ថា លោកមិនប្តូរតំណែងស្នងការ លោក ជួន សុវណ្ណ ក្រោយដំឡើងផ្កាយបួន

23, Feb 2016 , 4:37 pm

រូបភាព

ដោយ:

ភ្នំពេញ៖ សម្តេច ស ខេង រដ្ឋមន្ត្រីក្រសួងមហាផ្ទៃ និយាយថា ក្នុងនាមលោកជារដ្ឋមន្ត្រីមហាផ្ទៃ លោកអនុញ្ញាតឲ្យលោក ជួន សុវណ្ណ ស្នងការរាជធានីភ្នំពេញបន្តការងាររបស់លោក ក្នុងការកំណត់ណាមួយ ក្រោយពីលោក ជួន សុវណ្ណ ត្រូវបានដំឡើងឋានន្តរសកិ្តជានាយឧត្តមសេនីយ៍ផ្កាយបួន ចំណោមឧត្តមសេនីយ៍ឯក ៦រូប កាលពីថ្ងៃទី១៩ ខែកុម្ភៈ ឆ្នាំ២០១៦នេះ។

សម្តេច ស ខេង មិនមានផែនការផ្លាស់ប្តូរតំណែងស្នងការនគរបាលរាជធានីភ្នំពេញនោះទេ ក្រោយពីលោក ជួន សុវណ្ណ ទទួលបានឋានន្តរស័ក្តិជានាយឧត្តមសេនីយ៍។ សម្តេច បាននិយាយតបនឹងសំណួរអ្នកសារព័ត៌មាន បន្ទាប់ពីសម្តេចបើកសន្និបាតបូកសរុបការងារឆ្នាំ២០១៥ និងលើកទិសដៅការងារឆ្នាំ២០១៦ ក្រសួងមហាផ្ទៃ នៅថ្ងៃទី២៣ ខែកុម្ភៈ នេះថា ការដំឡើងឋានន្តរស័ក្តិពុំពាក់ព័ន្ធនឹងការផ្លាស់ប្តូរតួនាទីនោះទេ។ បើតាមរដ្ឋមន្ត្រីក្រសួងមហាផ្ទៃ មូលហេតុដែលលោក ជួន សុវណ្ណ ត្រូវបានដំឡើងឋានន្តរស័ក្តិ ព្រោះលោកមានស្នាដៃការងារ។

សម្តេចនិយាយយ៉ាងដូច្នេះថា៖«ខ្ញុំគិតថា តួនាទី និងឋានរន្តសក្តិ គឺវាអត់ស៊ីគ្នាទេ។ បានន័យថា យោងតាមស្នាដៃការងារ យើងអាចឲ្យសក្តិបាន មិនមែនបានន័យថា ស្នងការត្រូវតែមានស័ក្តិប៉ុណ្ណេះនោះទេ គឺមិនមានកំណត់ ដូច្នេះខ្ញុំក្នុងឋានៈជារដ្ឋមន្ត្រីក្រសួងមហាផ្ទៃ ប្រហែលជាប្រគល់ឲ្យគាត់ (ជួន សុវណ្ណ) ទទួលការងារហ្នឹង (ស្នងការនគរបាលរាជធានីភ្នំពេញ) បន្តទៀត ក្នុងរយៈពេលណាមួយ ជាកំណត់»។

គួររម្លឹកថា លោក ជួន សុវណ្ណ អគ្គស្នងការរងនគរបាលជាតិ ត្រូវបានផ្ទេរមកជំនួសលោក ទូច ណារ៉ុថ ស្នងការនគរបាលរាជធានីភ្នំពេញ ហើយលោកឧត្តមសេនីយ៍ត្រី ទូច ណារ៉ុថ ត្រូវផ្ទេរទៅជាប្រធាននាយកដ្ឋានអង្គរក្ស និងត្រូវដំឡើងឋានន្តរស័ក្តិជាឧត្តមសេនីយ៍ទោ(ផ្កាយពីរ) កាលពីថ្ងៃទី៣ ខែតុលា ឆ្នាំ២០១២ នៅស្នងការដ្ឋាននគរបាលរាជធានីភ្នំពេញ។

កាលណោះ លោក ជួន សុវណ្ណ ដែលត្រូវបានជំនួសតំណែងលោក ទូច ណារ៉ុថ បានឡើងថ្លែងពីការប្តេជ្ញាចិត្តថា លោកនឹងខិតខំប្រឹងប្រែងរក្សាសន្តិសុខជូនប្រជាពលរដ្ឋឲ្យបានល្អ ដូចជា បង្ក្រាបបទល្មើសចោរលួច ឆក់ ប្លន់ បញ្ហាបងតូច បងធំ ការចរាចរ និងការប្រើប្រាស់គ្រឿងញៀន និងបញ្ហាគ្រោះថ្នាក់ចរាចរណ៍ ជាដើម៕