ជាតិ
លោក ហ៊ុយ វណ្ណៈ ជាប្រធានក្រុមតាមដានហ្វេសប៊ុកនាយករដ្ឋមន្ត្រី សម្រាប់ក្រសួងមហាផ្ទៃ
× លោក ហ៊ុយ វណ្ណៈ អនុរដ្ឋលេខាធិការក្រសួងមហាផ្ទៃ ត្រូវបានសម្តេច ស ខេង តែងតាំង ជាប្រធានក្រុមការងារតាមដាន មតិសាធារណជនលើទំព័រ ហ្វេសប៊ុក សម្តេចនាយករដ្ឋមន្ត្រី ហ៊ុន សែន សម្រាប់ក្រសួងមហាផ្ទៃ។ នៅក្នុងសេចក្តីសម្រេចចុះថ្ងៃទី២៣ខែកុម្ភៈ របស់ក្រសួងមហាផ្ទៃ មានមន្ត្រីចំនួន១២រូប ដែលត្រូវបានតែងតាំងឲ្យតាមដានមតិសាធារណជនលើទំព័រ ហ្វេសប៊ុក សម្តេចនាយករដ្ឋមន្ត្រី ហ៊ុន សែន។
បើតាមសេចក្តីសម្រេចនេះ មន្ត្រីទាំង១២រូប ដែលមានតួនាទីតាមដានមិតមហាជនលើ Facebook នាយករដ្ឋមន្ត្រី រួមមាន១. លោក ហ៊ុយ វណ្ណៈអនុរដ្ឋលេខាធិការក្រសួងមហាផ្ទៃ(ប្រធាន) ២. លោក គៀត ច័ន្ទថារិទ្ធ អគ្គស្នងការនគរបាលជាតិ(អនុប្រធាន) ៣. លោក ប៉ៅ ភក្តិ លេខាធិការរង និងជាប្រធាននាយកដ្ឋានទំនាក់ទំនងអន្តរជាតិ (អនុប្រធាន) ៤. លោកស្រី កៅ សុខម៉ារ៉ា អគ្គនាយករង នៃអគ្គនាយកដ្ឋានរដ្ឋបាល(សមាជិក) ៥. លោក ហួន ច័ន្ធកក្កដា អគ្គាធិការរង នៃអគ្គាធិការដ្ឋាន(សមាជិក) ៦. លោក នុត សវនា អគ្គនាយករង នៃអគ្គនាយកដ្ឋានពន្ធនាគារ(សមាជិក) ៧. លោក កែវ វណ្ណថន អគ្គនាយករង នៃអគ្គនាយកដ្ឋានអន្តោប្រវេសន៍(សមាជិក) ៨. លោក ចាន់ គឹមសេង អគ្គនាយករង នៃអគ្គនាយកដ្ឋានអត្តសញ្ញាណកម្ម (សមាជិក) ៩. លោក ឯក មនោសែន អនុប្រធានបណ្ឌិត្យសភានគរបាលកម្ពុជា និងជាប្រធាន នាយកដ្ឋានបណ្តុះបណ្តាល(សមាជិក) ១០. លោក ប៉ាង រ៉ាស៊ី អនុប្រធានក្រុមប្រឹក្សានីតិកម្ម(សមាជិក) ១១. លោក ម៉ែន សុរិយ៉ន អគ្គនាយករង នៃអគ្គនាយកដ្ឋានសវនកម្មផ្ទៃក្នុង (សមាជិក) និង១២. លោក ចេន ចាន់តុង ប្រធាននាយកដ្ឋានផ្សព្វផ្សាយអប់រំ(សមាជិក) ។
ក្រុមការងារតាមដានប្រព័ន្ធទំនាក់ទំនងបណ្តាញសង្គមfacebook សម្តេចនាយករដ្ឋមន្ត្រី មានតួនាទី ភារកិច្ច តាមដាន និងឆ្លើយតបតាមជំនាញនីមួយៗ ស្របតាមគោលការណ៍របស់ក្រសួងមហផ្ទៃ ចំពោះមតិរបស់មហាជន ដែលបង្ហោះនៅហ្វេសប៊ុកសម្តេច ពាក់ព័ន្ធនឹងវិស័យសន្តិសុខ សុវត្ថិភាព សណ្តាប់ធ្នាប់សាធារណៈ។ នេះជាការបញ្ជាក់របស់សេចក្តីសម្រេច ដដែល។
សូមបញ្ជាក់ថា ចាប់តាំងពីមានបញ្ជារបស់សម្តេច ហ៊ុន សែន ឲ្យរដ្ឋមន្ត្រី និងមន្ត្រីពាក់ព័ន្ធតាមក្រសួងនានា ចាត់តាំងមន្ត្រីក្រុមការងារតាមដានរាល់បញ្ហារបស់ពលរដ្ឋ ដែលបានចូលទំព័រ Facebook របស់សម្តេច ដើម្បីយកមកដោះស្រាយឲ្យទាន់ពេលវេលា កាលពីថ្ងៃទី០៨ ខែកុម្ភៈមក រដ្ឋមន្ត្រី និងមន្ត្រីពាក់ព័ន្ធតាមក្រសួងនានា បានតែងតាំងមន្ត្រីរបស់ខ្លួនជាបន្តបន្ទាប់។ ក្រសួង ស្ថាប័នទាំងនោះរួមមាន ក្រសួងអភិវឌ្ឍន៍ជនបទ ក្រសួងពាណិជ្ជកម្ម ក្រសួងដែនដី នគរូបនីយកម្ម និងសំណង់ និងរដ្ឋលេខាធិការ នៃរដ្ឋលេខាធិការដ្ឋានអាកាសចរស៊ីវិលជាដើម៕
© រក្សាសិទ្ធិដោយ thmeythmey.com