សិស្ស ១០ មករា ១៩៧៩ បង្កើតប្រវត្តិសាស្ត្រដំបូងជួយដល់គ្រូបង្រៀនចូលនិវត្តន៍

អត្ថបទពាណិជ្ជកម្ម

សិស្ស ១០ មករា ១៩៧៩ បង្កើតប្រវត្តិសាស្ត្រដំបូងជួយដល់គ្រូបង្រៀនចូលនិវត្តន៍

25, Feb 2016 , 3:22 pm

រូបភាព

ដោយ: ថ្មីៗ

កាលពីថ្ងៃទី ២១ កុម្ភៈ ២០១៦អតីតសិស្សវិទ្យាល័យ ១០ មករា ១៩៧៩ ប្រមាណជិត ៤០០នាក់ បានជួបជុំគ្នានៅខេត្តសៀមរាប ដើម្បីប្រារព្ធពិធីរំលឹកគុណគ្រូ និងចូលរួមគាំទ្រគម្រោងមូលនិធិអតីតសិស្សវិទ្យាល័យ ១០ មករា ១៩៧៩ ក្នុងគោលបំណងទ្រទ្រង់គ្រូបង្រៀនចូលនិវត្តន៍ និងមានជំងឺ។ គម្រោងនេះបានបដិសន្ធិឡើងក្រោមពាក្យស្លោកថា៖ ធ្វើបុណ្យទាន់ខែភ្លឺ ហើយមាន ចក្ខុវិស័យមួយគឺ៖ រួមគ្នាផ្តល់ជីវិតថ្មីដល់គ្រូយើង។

លោកសឿម ណារិន សមាជិកម្នាក់នៃក្រុមស្ថាបនិក មូលនិធិនេះបានអះអាងថា យើងនាំគ្នា ធ្វើដើម្បីតបស្នងសងគុណដល់មនុស្សដែលមានគុណរបស់យើង។ ហើយរាល់សកម្មភាពទាំងឡាយ មិនគ្រាន់តែស្វែងរកមូលនិធិប៉ុណ្ណោះទេ ថែមទាំងចូលរួមចែករំលែកផ្តល់បទពិសោធន៍និងចំណេះដឹងដល់មនុស្សជំនាន់ថ្មីតាមរយៈ វគ្គបណ្តុះបណ្តាល និងសកម្មភាពអប់រំផ្សេងៗ។

ឯ.ឧ ឈួន ឆាម ទីប្រឹក្សាអមទីស្តីការគណៈរដ្ឋមន្ត្រី ហើយ ជាអតីតនាយកវិទ្យាល័យ១០ មករា ១៩៧៩ ផងនោះបានមានចំណាប់អារម្មណ៍ និងកោតសរសើរយ៉ាងខ្លាំងចំពោះគំនិតផ្តួចផ្តើមបង្កើតមូលនិធិនេះ ហើយជម្រុញឲ្យ មានការយកចិត្តទុកដាក់ផងដែរទៅលើអតីតសិស្សដែលកំពុងជួបផលលំបាក។

លោក កែ ឆនភក្តី សមាជិក ម្នាក់ទៀតក្នុងចំណោមក្រុមស្ថាបនិកបាន សំណូមពរឲ្យ អតីតសិស្សគ្រប់ជំនាន់ចូលរួមដោយមិនប្រកាន់និន្នាការនយោបាយ និង បរិច្ចាគ ដើម្បីសម្រេចបានទស្សនវិស័យ និងរក្សាបាននូវនិរន្តរភាព។