អន្តរជាតិ
គុយបាអនុញ្ញាតឲ្យអ្នកប្រឆាំង ៧នាក់ទៅក្រៅប្រទេសមុនទស្សនកិច្ចលោកអូបាម៉ា
× រដ្ឋាភិបាលគុយបាបានសម្រេចឲ្យក្រុមប្រឆាំងចំនួន ៧នាក់អាចធ្វើដំណើរទៅក្រៅប្រទេសបានជាលើកដំបូង។ ការសម្រេចនេះជាឥរិយាបថវិជ្ជមានរបស់រដ្ឋាភិបាលក្រុងហាវ៉ាណា ដើម្បីស្វាគមន៍ដំណើរទស្សនកិច្ចជាប្រវត្តិសាស្ត្ររបស់ប្រធានាធិបតីអាមេរិលលោក បារ៉ាក់ អូបាម៉ា នៅចុងខែមិនាខាងមុខ។
អ្នកប្រឆាំងរដ្ឋាភិបាលគុយបាចំនួន ៧នាក់ត្រូវបានរដ្ឋាភិបាលគុយបាអនុញ្ញាតឲ្យធ្វើដំណើរចេញទៅក្រៅប្រទេសបានដោយសេរី។ ការសម្រេចនេះជាសកម្មភាពវិជ្ជមានមួយរបស់រដ្ឋាភិបាលគុយបាដើម្បីស្វាគមន៍ដំណើរទស្សនកិច្ចរបស់ប្រធានាធិបតី បារ៉ាក់ អូបាម៉ា នៅខែក្រោយនេះ។
បើយោងតាមទីភ្នាក់ងារព័ត៌មាន Reuters អ្នកប្រឆាំង៧នាក់ក្នុងចំណោម១១នាក់ដែលនៅក្រៅការឃុំខ្លួននេះបានទទួលសិទ្ធិពិសេសអនុញ្ញាតដោយរដ្ឋាភិបាលក្រុងហាវ៉ាណា ដើម្បីធ្វើដំណើរទៅក្រៅប្រទេសបាន។ ចំណែក ៤នាក់ផ្សេងទៀតនោះមិនអាចទទួលបានសិទ្ធិនេះទេ ប៉ុន្តែគេមិនអាចទទួលបានព័ត៌មានជាក់លាក់ពាក់ព័ន្ធនឹងបញ្ហានេះឡើយ។
យ៉ាងណាក៏ដោយចុះ មានមតិរិះគន់លោក អូបាម៉ា ច្រើនជុំវិញការស្តារចំណងទំនាក់ទំនងជាមួយគុយបា និង ការរៀបចំទស្សនកិច្ចក្នុងនាមជាប្រធានាធិបតីក្នុងតំណែងទៅកាន់ប្រទេសគុយបានៅពេលខាងមុខផង។ នេះក៏ដោយសារ គេមើលមិនឃើញប្រយោជន៍ច្រើនដែលអាមេរិកទទួលបានពីការបង្កើតទំនាក់ទំនងជិតស្និទ្ធជាមួយគុយបានឡើយ។ ហើយគេក៏មិនរំពឹងថា សហរដ្ឋអាមេរិកអាចនឹងជួយឲ្យគុយបាផ្លាស់ប្តូរនយោបាយ និងការអនុវត្តដែលរំលោភសិទ្ធិមនុស្សធ្ងន់ធ្ងរដែរ។
តាមពិតទៅក្រោយមានការឯកភាពគ្នាផ្សាភ្ជាប់ចំណងការទូតឡើងវិញកាលពីចុងឆ្នាំ ២០១៤ រដ្ឋាភិបាលគុយបាក៏បានសម្រេចដោះលែងអ្នកទោស ៥៣នាក់ ដែលសហរដ្ឋអាមេរិកចាត់ទុកជាអ្នកទោសនយោបាយផងដែរ តែក្រោយមកគុយបាក៏បន្តសកម្មភាពចាប់ឃុំឃាំងអ្នកប្រឆាំងខ្លួនបន្តទៀត។
សូមបញ្ជាក់ថា រដ្ឋាភិបាលក្រុងវ៉ាស៊ីនតោន ក្រោមការដឹកនាំរបស់លោក បារ៉ាក់ អូបាម៉ា ព្យាយាមកែប្រែសត្រូវសង្គ្រាមត្រជាក់ឲ្យទៅជាមិត្ត ដោយស្តារទំនាក់ទំនងការទូតជាមួយគុយបា។ លោកសង្ឃឹមថា ការភ្ជាប់ទំនាក់ទំនងនេះនឹងជួយកែប្រែស្ថានភាពនយោបាយគុយបា ហើយវាក៏ជាមរតកនយោបាយការបរទេសសំខាន់របស់លោកផងដែរ៕
© រក្សាសិទ្ធិដោយ thmeythmey.com