អន្តរជាតិ
សេដ្ឋកិច្ចជួបវិបត្តិធ្ងន់ ប៉ះពាល់ប្រជាប្រិយភាពលោក ពូទីន មុនបោះឆ្នោតឆ្នាំ២០១៨?
× រដ្ឋាភិបាលក្រេមឡាំងនៅតែរក្សាទុកថវិកាយោធានៅកម្រិតខ្ពស់ ទោះជាសេដ្ឋកិច្ចបន្តធ្លាក់ចុះខ្លាំងចាប់តាំងពីវិបត្តិអ៊ុយក្រែនកើតឡើងក៏ដោយចុះ ។ សេដ្ឋកិច្ចបន្តធ្លាក់ចុះខ្លាំងព្រោះតែរុស្ស៊ីរងទណ្ឌកម្មសេដ្ឋកិច្ចលោកខាងលិច និង ការធ្លាក់ចុះខ្លាំងនៃតម្លៃប្រេងឆៅនៅលើទីផ្សារអន្តរជាតិ។ មូលហេតុនៃការបង្កើនថវិកាសម្រាប់វិស័យយោធាក៏ដើម្បី ទប់ទល់ការកសាងកម្លាំងយោធារបស់ណាតូនៅអឺរ៉ុបខាងកើត និងនយោបាយរុស្ស៊ីដែលងាកទៅលូកដៃកាន់តែជ្រៅនៅមជ្ឈិមបូព៌ាផងនោះ។ តែវិបត្តិសេដ្ឋកិច្ច កាន់តែអាក្រក់ ហើយប្រជាជនកាន់តែរងទុក្ខ លំបាក អាចមានផលប៉ះពាល់ខ្លាំងលើការបោះឆ្នោតប្រធានាធិបតីឆ្នាំ ២០១៨ ខាងមុខផងក៏ថាបាន។
សូមស្តាប់ការបកស្រាយរបស់លោក សៅ ផលនិស្ស័យ៖
ចាប់តាំងពីវិបត្តិនៅអ៊ុយក្រែនកើតឡើង និងមានការក្រសោបយកទឹកដី Crimea ពីអ៊ុយក្រែនផងនោះ រុស្ស៊ីប្រឈមមុខការលំបាកខ្លាំងទាំងផ្នែកសេដ្ឋកិច្ច ការទូតនិងនយោបាយ។ សេដ្ឋកិច្ចមហាអំណាចមួយនេះត្រូវរងគ្រោះខ្លាំងព្រោះតែទណ្ឌកម្មច្រើនជំហានរបស់បណ្តាប្រទេសលោកខាងលិច ហើយពាណិជ្ជកម្មនិងវិនិយោគជាមួយលោកខាងលិចក៏ត្រូវបានកាត់ផ្តាច់ថែមទៀត។
បើយោងតាមរបាយការណ៍មូលនីធិរូបិយវត្ថុអន្តរជាតិឆ្នាំ ២០១៥ សេដ្ឋកិច្ចរុស្ស៊ីថយចុះ៣.៧ភាគរយ ហើយនៅក្នុងឆ្នាំ ២០១៦នេះ គេវាយតម្លៃថា សេដ្ឋកិច្ចប្រទេសនេះនឹងថយចុះ ១ភាគរយទៀត។ ហើយអ្វីដែលធ្ងន់ធ្ងរជាងនេះ សេដ្ឋកិច្ចរុស្ស៊ីរងគ្រោះដោយសារតម្លៃប្រេងនៅលើទីផ្សារអន្តរជាតិនោះធ្លាក់ថ្លៃយ៉ាងគំហុក រហូតដល់ធ្លាក់ពីជាង ១០០ដុល្លារក្នុងមួយបារ៉ែល មកដល់ត្រឹមក្រោម៣០ដុល្លារផងកាលពីខែមុននោះ។ នេះក៏ដោយសារសេដ្ឋកិច្ចប្រទេសនេះពឹងផ្អែកខ្លាំងលើការនាំចេញថាមពល ជាពិសេសប្រេងនិងឧស្ម័នទៅកាន់ទីផ្សារអន្តរជាតិ។
ត្រលប់មកផ្តោតលើកញ្ចប់ថវិកាសម្រាប់វិស័យយោធា វិញ ទោះសេដ្ឋកិច្ចត្រដរខ្យល់ខ្លាំងប៉ុណ្ណាក្តី រដ្ឋាភិបាលក្រេមឡាំងក្រោមការដឹកនាំរបស់លោក វ្ល៉ាឌីមៀ ពូទីន មិនបានដាក់ចេញចំណាត់ដុំកំភួនដោយកាត់បន្ថយការចំណាយយោធាច្រើនដើម្បីទប់ទល់បញ្ហាប្រឈមឡើយ។ តាំងពីឆ្នាំ ២០១៤ កញ្ចប់ថវិកាសម្រាប់វិស័យយោធារុស្ស៊ីថយចុះបន្តិចបន្តួចប៉ុណ្ណោះ ហើយបើប្រៀបធៀបជាមួយប្រទេសផ្សេងទៀតជារួមវាស្ថិតនៅ កម្រិតមួយខ្ពស់ខ្លាំង។ បើតាមរបាយការណ៍ស្ថាប័នសន្តិសុខសាកល នៅឆ្នាំ២០១៦នេះ ថវិកាយោធារុស្ស៊ីស្មើនឹង៤ភាគរយនៃទំហំសេដ្ឋកិច្ចរុស្ស៊ី តែក្នុងឆ្នាំនេះរុស្ស៊ីសន្យាថានឹងកាត់បន្ថយថវិកាយោធារបស់ខ្លួនចំនួន ៥ភាគរយ ។
១.រុស្ស៊ីពិបាកបន្ថយកញ្ចប់លុយយោធា
តាមពិតទៅមូលហេតុច្រើននៅពីក្រោយការ រក្សាទុកកញ្ចប់លុយប្រើក្នុងវិស័យយោធានៅខ្ពស់នេះ តែបញ្ហាធំពីរដែលយើងត្រូវដឹង។ បញ្ហាទីមួយ គឺក្រោយវិបត្តិអ៊ុយក្រែនផ្ទុះឡើងភ្លាម បណ្តាប្រទេសបក្សសម្ព័ន្ធយោធាណាតូចាប់ផ្តើមបង្កើនកម្លាំងទ័ពតាមព្រំដែនរុស្ស៊ីនៅអឺរ៉ុបខាងកើត ជាពិសេសប្រទេសទាំងអស់នោះបណ្តាក់គ្នាបង្កើនកញ្ចប់ថវិកាយោធាខ្លាំងថែមទៀត។ សកម្មភាពទាំងនោះ មិនអាចឲ្យរុស្ស៊ីនៅស្ងៀមឡើយ។
ទី២ គឺការងាកចេញពីអ៊ុយក្រែនទៅប្រឡូកក្នុងជម្លោះប្រដាប់អាវុធមជ្ឈិមបូព៌ាជាពិសេសសង្គ្រាមនៅស៊ីរី។ យុទ្ធសាស្ត្របង្វែរការចាប់អារម្មណ៍ និងឆក់ឱកាសពង្រឹងជំហររុស្ស៊ីនៅមជ្ឈិមបូព៌ា ថ្វីបើវាមានប្រយោជន៍ការទូតសម្រាប់រុស្ស៊ីមែន តែលោក ពូទីន ចំណាយមិនតិចទេដើម្បីធានាថាយុទ្ធសាស្ត្រនេះជោគជ័យ។ រុស្ស៊ីបញ្ជូនទ័ព សព្វាវុធមានយន្តហោះចម្បាំង ប្រព័ន្ធមីស៊ីល ទៅបញ្ឈរជើងនៅស៊ីរីតាំងពីខែកញ្ញាឆ្នាំមុន ដើម្បីជួយគាំទ្ររបបលោក បាសា អាសាដ ក្រោមលេសតាមកម្ចាត់ក្រុម ដែស្ហឬក្រុមរដ្ឋឥស្លាម។ ក្រោយអន្តរាគមន៍ប៉ុន្មានខែ រុស្ស៊ីក៏បង្ខំឲ្យលោកខាងលិចបន្ទន់ឥរិយាបទ និងសហការជាមួយរុស្ស៊ីដើម្បីប្រឆាំងភេរវកម្ម ហើយមិនត្រឹមតែប៉ុណ្ណោះរុស្ស៊ីមានទឹកមាត់ប្រៃក្នុងការដោះស្រាយបញ្ហាជម្លោះរ៉ាំរ៉ៃនៅស៊ីរីទៀត។
២.វិបត្តិសេដ្ឋកិច្ចអូសបន្លាយប៉ះពាល់ដល់ការបោះឆ្នោតប្រធានាធិបតី២០១៨?
ក្រោយអនុវត្តនយោបាយដណ្តើមយកទឹកដី Crimea ពីអ៊ុយក្រែនបានជោគជ័យ លោក វ្ល៉ាឌីមៀ ពូទីន បានយកឈ្នះចិត្តប្រជាជនរុស្ស៊ី និងបង្កើតស្មារតីជាតិនិយមខ្លាំង។ បុរសខ្លាំងរូបនេះត្រូវប្រជាជនរុស្ស៊ីភាគច្រើនកោតសរសើរ ហើយលោក ក៏អាចបង្វែរការចាប់អារម្មណ៍របស់ប្រជាជនដោយ ដាក់កំហុសលើលោកខាងលិចជុំវិញការកើតឡើងនៃវិបត្តិសេដ្ឋកិច្ចរុស្ស៊ីដែរ។ ប៉ុន្តែបើវិបត្តិនេះបន្តអូសបន្លាយកាន់តែយូរ វានឹងប៉ះពាល់ខ្លាំងដល់ការបោះឆ្នោតប្រធានាធិបតីនៅពេលខាងមុខ ហើយលោក ពូទីន ក៏ត្រូវប្រឈមការលំបាកដូចគ្នាព្រោះមិនអាចដោះស្រាយបញ្ហាជូនប្រជាពលរដ្ឋរុស្ស៊ីបាន។
ជាធម្មតាបញ្ហាសេដ្ឋកិច្ចមួយរយៈមិនមែនជាបញ្ហាចោទទេ ប៉ុន្តែបើប្រជាជនត្រូវបន្តរងទុក្ខសព្វគ្រប់ព្រោះកំណើនសេដ្ឋកិច្ចដើរថយក្រោយរាល់ថ្ងៃក្នុងរយៈពេលយូរអង្វែងនោះ វាមិនអាចទៅរួចទេ។ ចុះលោក ពូទីន ត្រូវតែដោះស្រាយវិបត្តិសេដ្ឋកិច្ចឲ្យបានមុនការបោះឆ្នោតមែនទេ បើលោកចង់ឲ្យគេបោះឆ្នោតគាំទ្រលោកបន្តទៀត?
ពាក់ព័ន្ធបញ្ហានេះ អ្នកសេដ្ឋកិច្ចរុស្ស៊ីបានព្រមានរួចជាស្រេចទៅហើយ ហើយបើរដ្ឋាភិបាលរុស្ស៊ីចង់ដោះស្រាយបញ្ហាសេដ្ឋកិច្ចនេះក៏មិនមែនជារឿងងាយស្រួលដែរ។
ក្នុងវេទិកាពិភាក្សាវិទ្យាស្ថានសម្រាប់ការសិក្សាយុទ្ធសាស្ត្រ និងសិក្សាអន្តរជាតិ ដែលរៀបចំឡើងនៅថ្ងៃទី២០ខែកុម្ភៈកន្លងមក អ្នកសេដ្ឋកិច្ចរុស្ស៊ីដ៏ល្បី Vladislav Inozemtsev បានសង្កត់ធ្ងន់ថា រុស្ស៊ីបច្ចុប្បន្នកំពុងបាត់បង់ជំហររបស់ខ្លួនក្នុងសេដ្ឋកិច្ចសាកលរួចទៅហើយ ហើយបញ្ហាប្រឈមសេដ្ឋកិច្ចនេះមិនងាយដោះស្រាយឡើយទោះប្រេងឡើងដល់៨០ដុល្លារ និងទណ្ឌកម្មត្រូវដកចេញអស់ឆាប់ៗប៉ុណ្ណាក៏ដោយ។ ប៉ុន្តែលោក នៅជឿជាក់ថា នៅក្នុងការបោះឆ្នោតឆ្នាំ ២០១៨ លោក ពូទីន នៅតែអាចមានលទ្ធភាពទាញរកការគាំទ្រនិងឈានទៅឈ្នះការបោះឆ្នោតដើម្បីបន្តកាន់តំណែងប្រមុខរដ្ឋរុស្ស៊ីថែមទៀតផង៕
© រក្សាសិទ្ធិដោយ thmeythmey.com