ជាតិ
បើកូនស្រីម៉ែធ្វើល្អហើយឲ្យគេថាចុះ!
× កូនខ្លាច «គេថា» ពាក្យថា «គេ» សំដៅដល់មនុស្សទាំងឡាយដទៃលើផែនដីក្រៅពីកូន។ សូម្បីកូនប្រាកដនៅក្នុងចិត្តហើយថា នេះជាអំពើល្អត្រឹមត្រូវ នៅតែកូនមិនក្លាហានដើម្បីនឹងប្រព្រឹត្តធ្វើ ព្រោះខ្លាច «គេថា» រឿង «គេថា» នេះ វាក្លាយទៅជារបស់ដែលគួរខ្លាចជាទីបំផុតក្នុងលោកនេះទៅហើយ។
សម្រាប់កូនស្រី បើមានសេចក្តីប្រកាន់យ៉ាងនេះក៏មិនអាចធ្វើអ្វីបានឡើយ ព្រោះ «គេ» មានច្រើនណាស់។ ម្នាក់ៗមានការគិតឃើញរៀងៗខ្លួន ត្រូវគ្នាខ្លះមិនត្រូវគ្នាខ្លះ កាលកូនស្រីធ្វើនូវអ្វីមួយ អ្នកខ្លះគេថាល្អ អ្នកខ្លះទៀតគេថាមិនល្អ ឬអាចគេថាអាក្រក់តែម្តង។ ដូច្នេះ កូនស្រីត្រូវតែសម្រេចថា អាត្មាអញគប្បីធ្វើនូវអ្វីដែលសមគួរដល់ខ្លួនឯងផង ដែលមិនខុសច្បាប់ផង មិនខុសសីលធម៌ផង មិនបៀតបៀនឲ្យអ្នកណាក្រហាយផង ហើយអាត្មាអញសប្បាយចិត្តនឹងធ្វើផង ដូច្នេះអាត្មាអញត្រូវតែធ្វើដោយមិនមានកង្វល់នឹងពាក្យគេថាអ្វីឡើយ។ ប៉ុន្តែម៉ែសូមរំលឹកកូនស្រី ចូរកូនកុំភ្លេចផ្ទៀងផ្ទាត់នូវកិច្ចការងារនោះឲ្យជាការងារល្អត្រឹមត្រូវពិតប្រាកដផង។
ការរិះគន់និន្ទាគ្នាន់ក្នាញ់ ជារបស់ធម្មតាក្នុងលោក អ្នកខ្លះប្រើពេលវេលាទំនេរទៅក្នុងការអានសៀវភៅ អ្នកខ្លះរីករាយនៅក្នុងការលេងកីឡា អ្នកខ្លះជ្រើសរើសយកការនិន្ទារិះគន់គ្នាន់ក្នាញ់ចំពោះអ្នកដទៃ មកជាការងារធំដុំក្នុងជីវិត។ អ្នកដែលសម្លឹងទោសគេដោយអកុសលចិត្ត និយមនិយាយរឿងអាក្រក់របស់គេ គឺជាអ្នកមិនមានសេចក្តីចម្រើនក្នុងជីវិតឡើយ ព្រោះគិតតែនាំយករឿងអាក្រាត់មកដាក់ក្នុងខ្លួនឯងរាល់ថ្ងៃ បីដូចជាធុងសំរាមប្រឡាក់ប្រឡូកទៅដោយរបស់ស្មោកគ្រោក ជាការសាងនូវគ្រឿងដែលរារាំងសេចក្តីចម្រើនឲ្យដល់ខ្លួនឯង ជាអ្នកបញ្ឆោតខ្លួនឯងឲ្យរីករាយដោយសេចក្តីវង្វេងក្នុងផ្សែងនៃសេចក្តីអាក្រក់។
កូនស្រីម៉ែត្រូវរៀនទទួលយកការពិតរបស់ជីវិត កុំចេះតែញាប់ញ័រទៅតាមពាក្យគេថា។ ត្រូវរៀនឲ្យយល់ពីហេតុផលរបស់ធម្មជាតិ ចាប់យកការពិតនៃជីវិតមកសិក្សារហូតបានយល់ច្បាស់ ហើយរស់នៅដោយសេចក្តីស្ងប់ចិត្ត។ ចូរកូនចាំទុកថា «មិនមានការរស់នៅជាមួយអ្វីឲ្យបានសុខ ស្មើនឹងការរស់នៅជាមួយសេចក្តីស្ងប់ឡើយ»៕
ប្រភព៖ សៀវភៅម៉ែ របស់អគ្គបណ្ឌិត ធម្មាចារ្យ ប៊ុត សាវង្ស
© រក្សាសិទ្ធិដោយ thmeythmey.com