ជាតិ
សង្គមជាតិ
អាជ្ញាធរអប្សរាប្រតិកម្មនឹងការរិះគន់រឿងស្ពានបុរាណរបស់លោក សុន ឆ័យ សៀមរាប៖ ថ្មីៗនេះ តំណាងរាស្ត្រគណបក្សប្រឆាំង លោក សុន ឆ័យ បានរិះគន់អាជ្ញាធរអប្សរា រឿងភាពកម្សោយគ្រប់គ្រងស្ពានបុរាណ។ ស្ពានតាអោង គឺជាស្ពានបុរាណមួយកន្លែង ដែលលោក សុន ឆ័យ បាននិយាយថា បានរងការខូចខាត និងទ្រុឌទ្រោម ដោយពុំមានអ្នកថែរក្សា និងអភិរក្ស។
អាជ្ញាធរអប្សរា បានច្រានចោលការលើកឡើងរបស់លោក សុន ឆ័យ ដែលបាននិយាយថា ស្ពានតាអោង ដែលជាស្ពានបុរាណ ស្ថិតនៅស្រុកជីក្រែង ខេត្តសៀមរាប ពុំមានការថែរក្សាបានត្រឹមត្រូវ។ អាជ្ញាធរអប្សរា ចាត់ទុកការលើកឡើងរបស់លោក សុន ឆ័យ ថាផ្ទុយពីការពិត ព្រោះថា ស្ពាននេះមានការយកចិត្តទុកដាក់ និងថែទាំបានយ៉ាងល្អ។
អ្វីដែលធ្វើឲ្យអាជ្ញាធរអប្សរាប្រតិកម្មទាក់ទងនឹងរឿងស្ពានបុរាណនេះ ដោយសារតំណាងរាស្ត្របក្សប្រឆាំង គឺលោក សុន ឆ័យ កាលពីពេលថ្មីៗនេះ បានសរសេរនៅក្នុងបណ្តាញសង្គមហ្វេសប៊ុករបស់លោកថា ស្ពានតាអោងពុំត្រូវបានថែទាំ និងទុកឲ្យរថយន្តដឹកឈើធំៗ បរកាត់តាមចិត្ត។ ក្នុងនោះដែរ លោក សុន ឆ័យ សរសេរបន្ថែមថា «អាជ្ញាធរអប្សរា ទទួលលុយជាង២០លានដុល្លារពីរដ្ឋាភិបាលក្នុងមួយឆ្នាំៗ និងប្រាក់ជំនួយបន្ថែមពីបរទេស ដើម្បីការថែទាំប្រាសាទយ៉ាងណាក៏ដោយ តែស្ពានតាអោងពុំត្រូវបានថែរក្សាទេ»។
ឆ្លើយតបនឹងការចោទប្រកាន់របស់លោក សុន ឆ័យ អាជ្ញាធរអប្សរា បានរម្លឹកពីប្រវត្តិនៃការផ្តើមការងារអភិរក្សស្ពានតាអោង។ តាមរបាយការណ៍របស់ខ្លួន អាជ្ញាធរអប្សរាបានលើកឡើងថា ខ្លួនបានចាប់ផ្តើមធ្វើការអភិរក្សតាំងពីឆ្នាំ២០០៨មកម្លេះ ដោយក្នុងនោះបានសម្អាតរុក្ខជាតិ ចាក់ដីបំពេញទីដែលហូរច្រោះ និងការសម្អាតរន្ធត្រដេវជាដើម។ ក្រៅពីនេះ ក៏មានការធ្វើបង្គោលបេតុង ដើម្បីការពារស្ពានផងដែរ ដោយមិនអនុញ្ញាតឲ្យរថយន្តធុនធ្ងន់ បើកបរលើស្ពាននោះទេ។ រថយន្តដែលអាចបើកនៅលើស្ពាននេះបាន គឺមានចំណុះត្រឹម ៣តោនប៉ុណ្ណោះ និងទុកចន្លោះ ២,២០ម៉ែត្រ សម្រួលចរាចរណ៍របស់ប្រជាជនក្នុងតំបន់។
អាជ្ញាធរអប្សរាបញ្ជាក់ថា បច្ចុប្បន្ននេះខ្លួនកំពុងសិក្សាពីលទ្ធភាពធ្វើស្ពានវាងថ្មី ដោយទុកស្ពានតាអោង សម្រាប់ធ្វើការអភិរក្សជាសម្បត្តិបេតិកភណ្ឌ និងជាសមិទ្ធផលទេសចរណ៍ ដូចរូបភាពដែលខ្លួនធ្លាប់បានធ្វើ មានស្ពានកំពង់ក្តី និងស្ពានបុរាណមួយចំនួនទៀត។
ស្ពានតាអោងមានទីតាំងនៅក្នុងភូមិកំបោអរ ឃុំខ្វាវ ស្រុកជីក្រែង ខេត្តសៀមរាប។ ស្ពាននេះ ជាស្ពានបុរាណវែងជាងគេក្នុងចំណោមស្ពានបុរាណចំនួន ២៣លើកំណាត់ផ្លូវបេង (ផ្លូវបុរាណពីអង្គរទៅប្រាសាទព្រះខ័នកំពង់ស្វាយ) មានបណ្ដោយប្រវែង ៧៧ម៉ែត្រ ទទឹង១៣ម៉ែត្រ និងមានរន្ធត្រដេវចំនួន១។ រន្ធត្រដេវនីមួយៗមានទទឹងប្រវែង ២ម៉ែត្រ និងកម្ពស់ ៦ម៉ែត្រ។ ស្ពាននេះ ធ្វើអំពីថ្មបាយក្រៀមលម្អដោយបង្កាន់ដៃនាគក្បាល៩ និងមានព្រះពុទ្ធសមាធិនៅចំក្បាលធ្វើអំពីថ្មភក់ ស្ថិតក្នុងរចនាបទបាយ័ន សតវត្សទី១២-១៣ ៕
© រក្សាសិទ្ធិដោយ thmeythmey.com