ជាតិ
សង្គមជាតិ
សាលារាជធានីសម្រេចលុបរង្វង់មូល៣ និងរៀបចំភ្លើងស្ដុប១០០ទីតាំង
× សាលារាជធានីភ្នំពេញគ្រោងកែប្រែរង្វង់មូលចំនួន៣ កន្លែងត្រៀមរៀបចំភ្លើងស្ដុប១០០ទីតាំងបន្ថែមទៀត ដើម្បីកាត់បន្ថយកកស្ទះចរាចរណ៍ក្នុងរាជធានីភ្នំពេញ។នេះបើតាមហ្វេសប៊ុកអភិបាលរាជធានីភ្នំពេញ។
លោក ប៉ា សុជាតិវង្ស បានឲ្យដឹងថា សាលារាជធានីភ្នំពេញបានរៀបចំកិច្ចប្រជុំបន្ទាន់មួយ ផ្តោតលើកិច្ចការសំខាន់ៗ ៤ចំណុច ដើម្បីជួយសម្រួលការកកស្ទះចរាចរណ៍ ដោយក្នុងនោះរួមមាន ទី១ ការរៀបចំផ្លាស់ប្តូរ និងដាក់ដំឡើងភ្លើងស្តុបស្វ័យប្រវត្តិថ្មីចំនួន ១០០ទីតាំងបន្ថែម នៅក្នុងភូមិសាស្ត្ររាជធានីភ្នំពេញ ដើម្បីកាត់បន្ថយនូវបញ្ហាកកស្ទះចរាចរណ៍ ដែលកិច្ចការនេះ គ្រោងនឹងសម្រេចឱ្យបានទាំងស្រុង នាខែមីនា ឆ្នាំ២០១៧ខាងមុខនេះ។ ជាពិសេស ត្រូវសិក្សាជាបន្ទាន់នូវការកែប្រែរង្វង់មូល៣ ដូចជារង្វង់មូលទួលគោក រង្វង់មូលចោមចៅ និងរង្វង់មូលកាំកូស៊ីធី ឲ្យក្លាយទៅជាទីតាំងភ្លើងស្តុបវិញ ។
ចំណុចទី២ កំណត់ និងដាក់កម្លាំងនៅតាមគោលដៅកកស្ទះចរាចរណ៍សំខាន់ៗក្នុងរាជធានីភ្នំពេញ ដើម្បីជួយសម្រួលចរាចរជូនប្រជាពលរដ្ឋ តាមការសិក្សាមានចំនួន ១៨២គោលដៅសំខាន់ៗ ។ ទី៣ កែសម្រួល និងកំណត់ទាំងពេលវេលា និងយន្តការផ្តល់សេវាសាធារណៈលើសេវាសុរិយោដី និងសំណង់ ឱ្យបានកាន់តែប្រសើរឡើង និងច្បាស់លាស់ និងទី៤ ការងារថែទាំប្រព័ន្ធហេដ្ឋារចនាសម្ព័ន្ធទាំងការជួសជុលគ្រលុកសំបុកមាន់ ការជួសជុលរ៉ឺហ្គ័រ និងការថែរក្សាលូជាដើម ត្រូវផ្តល់ការទទួលខុសត្រូវដល់មូលដ្ឋានខណ្ឌនីមួយៗតែម្តង។
អភិបាលរាជធានីភ្នំពេញរូបនេះ បញ្ជាក់ថា ការដាក់កិច្ចការទាំងនេះហើយ ដែលជាម៉ែត្រសម្រាប់វាស់សមត្ថភាពរបស់ខណ្ឌនីមួយៗ ថាតើនរណាអនុវត្ត ឬមិនអនុវត្ត? ហើយលោក សង្ឃឹម និងជឿជាក់លើក្រុមការងារទាំងអស់ត្រូវខិតខំបម្រើប្រជាពលរដ្ឋយើងឱ្យបានល្អ ដើម្បីបម្រើផលប្រយោជន៍ប្រជាពលរដ្ឋ៕
Tag:
សាលារាជធានី
ភ្លើងស្ដុប
© រក្សាសិទ្ធិដោយ thmeythmey.com