ជាតិ
សង្គមជាតិ
សង្គមស៊ីវិល បដិសេធថាមិនបានបង្គាប់ឲ្យស្រីមុំ និយាយកុហកឡើយ
× សង្គមស៊ីវិល ដែលតែងតែយកចិត្តទុកដាក់លើកញ្ញា ខុម ចាន់តារ៉ាទី ហៅស្រីមុំ បានបដិសេធថា ពួកគេមិនដែលបង្គាប់ប្រាប់កញ្ញាស្រីមុំ ឲ្យឆ្លើយបំភ្លៃការពិត និងកុហក ពីសំឡេងខ្សែអាត់ដែលនាងទទួលស្គាល់ថា ជាសំឡេងសាសងស្នេហា ជាមួយឯកឧត្តម កឹម សុខា នោះទេ។
ប្រធានស៊ើបអង្កេតនៃសមាគមអាដហុក លោក នី សុខា ដែលជួយដោះស្រាយបញ្ហាកញ្ញា ខុម ចាន់តារ៉ាទី ហៅស្រីមុំ គ្រាដែលនាងពឹងឲ្យជួយនោះ អះអាងថា រូបលោកនិងក្រុមការងារ មិនដែលរារាំង និងបង្ខិតបង្ខំឲ្យ កញ្ញាស្រីមុំ ឆ្លើយពង្វាង ឬ កុហកសមត្ថកិច្ចនៅពេលសាកសួរពីរឿងសំឡេងខ្សែអាត់នោះទេ។ លោក នី សុខា បន្ថែមថា រាល់ពេលដែលក្រុមការងារលោក ជួបជាមួយ កញ្ញាស្រីមុំ នោះគឺតែងតែជំរុញចិត្តនាងឲ្យ ឆ្លើយបំភ្លឺការពិតនៅចំពោះមុខតុលាការ ដោយលោកផ្លែផ្កាវិញថា ពាក្យកុហកទាំងនោះ គឺកញ្ញាស្រីមុំ ខ្លួនឯងដែលអះអាង មិនស្គាល់គ្នាជាមួយឯកឧត្តម កឹម សុខា នៅពេលដែលមកសុំការអន្តរាគមន៍ពីសមាគមអាដហុក។
ថ្លែងប្រាប់សារព័ត៌មានថ្មីៗ ប្រធានស៊ើបអង្កេតរូបនេះ បានបញ្ជាក់ដូច្នេះថា៖«ខ្ញុំមានការសោកស្ដាយចំពោះកញ្ញា ស្រីមុំ ដែលយល់ច្រឡំ ចោទប្រកានមកសមាគមយើង។ សមាគមអាដហុក មិនដែលរារាំង និងបង្ខិតបង្ខំឲ្យកញ្ញាស្រីមុំនិយាយកុហកនោះទេ ព្រោះនៅពេលដែលស្រីមុំមកសុំអន្តរាគមពីអាដហុកយើងនាងមិនដែលប្រាប់ថាចង់ប្ដឹងលោក កឹម សុខា នោះទេ តែបានប្រាប់ថានាងមិនដែលស្គាល់លោក កឹម សុខា ទើបអាដហុកយើងជួយនាងក្នុងនាមជាសមាគមការពារសិទ្ធិមនុស្សប៉ុណ្ណោះ»។
លោក នី សុខា អះអាងថា សមាគមអាដហុកមានវីដេអូឃ្លីប អំពីការសន្ទនា និងការពន្យល់ហេតុផលដល់កញ្ញា ស្រីមុំ កន្លងមក ដែលអាចបញ្ជាក់ថា អាដហុកមិនធ្លាប់ប្រាប់នាងឲ្យនិយាយកុហកនោះទេ។ លោក នី សុខា ក៏បានចំអកវិញថា ការចោទប្រកាន់របស់ស្រីមុំនេះ ទំនងជានាងខឹងនឹងសមាគមអាដហុក ដែលបានសម្រេចឈប់ផ្ដល់មេធាវីដល់រូបនាង។
ប្រធានអង្គការ សីលការ អ្នកស្រី ធីតា ឃឹះ ដែលរងការចោទប្រកាន់ពីសំណាក់ស្រីមុំ ថាបានប្រាប់នាងឲ្យនិយាយកុហកសមត្ថកិច្ចនោះ ក៏បានបដិសេធដែរ ដោយអ្នកស្រី ខកចិត្តនិងសោកស្ដាយចំពោះពាក្យសម្ដីស្រីមុំ ដែលចោទខ្លួនបែបនេះ«ខ្ញុំមិនបានដឹងពីរឿងស្នេហាឯកជនរវាងនាង និងលោក កឹម សុខា នោះទេ។ ហើយនៅពេលដែលខ្ញុំជួបនាងខ្ញុំមិនបានបង្គាប់ឲ្យនាងនិយាយឆ្លើយកុហកអ្វីនោះឡើយ ដោយខ្ញុំគ្រាន់តែស្ដាប់ពីហេតុផល និងរឿងរ៉ាវរបស់នាងប៉ុណ្ណោះ»។ នេះជាការបញ្ជាក់របស់អ្នកស្រី ធីតា ឃឹះ។
ពាក្យសម្ដីរបស់ស្រីមុំ ដែលអះអាងថា មានអង្គការមួយចំនួនដែលប្រាប់ឲ្យនាងឆ្លើយដោះសារចំពោះសមត្ថកិច្ច ដោយត្រូវបានសារព័ត៌មានFresh News ចុះផ្សាយនោះ រួមមានលោក នី សុខា, លោក យី សុខសាន្ត, លោក ណៃ វ៉ាន់ដា និងលោកស្រី លឹម មុន្នី មន្ត្រីអង្គការអាដហុក និងលោកស្រី ធី ឃីៈ ប្រធានអង្គការ សីលការ, ប្រធានអង្គការ ណ្កដស៊ី, ឈ្មោះ ស៊ឺន សាលី មន្ត្រីអង្គការសិទ្ធិមនុស្ស UN និងឈ្មោះ ស៊ាង ចែត មេឃុំស្រុកកំពង់សៀម ខេត្តកំពង់ចាម។
ជុំវិញបញ្ហានេះក្រសួងយុត្តិធម៌ ក៏បានចេញសេចក្ដីថ្លែងការណ៍ ថ្កោលទោសយ៉ាងដាច់អហង្ការ ចំពោះទង្វើល្មើសច្បាប់របស់អង្គការសង្គមស៊ីវិលទាំងនេះ និងសូមអំពាវនាវឲ្យអាជ្ញាធរមានសមត្ថកិច្ចស្រាវជ្រាវឲ្យបានច្បាស់លាស់ និងចាត់វិធានការឲ្យបានម៉ឹងម៉ាត់បំផុត។
ត្រង់ចំណុចនេះសង្គមស៊ីវិលទាំងនេះ បានផ្លែផ្កាវិញថា ក្រសួងយុត្តិធម៌គួរតែសិក្សាឲ្យបានច្បាស់លាស់ជាមុនសិនទៅលើក្រដាសមួយច្បាប់ ដែលសរសេរដោយដៃហើយចុះផ្សាយថាជាពាក្យសម្ដីរបស់ស្រីមុំនេះ ព្រោះអក្សរលើក្រដាមួយសន្លឹកអ្នកណាក៏អាចសរសេរបានដែរ។ ទាំងលោក នី សុខា ទាំងអ្នកស្រី ធីតា ឃឹះ បានដាក់ងឿងឆ្ងល់ថា មូលហេតុអ្វីបានជាក្រសួងយុត្តិធម៌ មានការចាប់អារម្មណ៍លើបញ្ហាឯកឧត្តម កឹម សុខា និងថ្កោលទោសសង្គមស៊ីវិល ដោយគ្រាន់តែអក្សរលើក្រដាសមួយសន្លឹកនេះ? ៕
© រក្សាសិទ្ធិដោយ thmeythmey.com