ឯកឧត្តម កឹម សុខា ថា គេតាមយាយីតាំងពីឆ្នាំ១៩៩៣

ជាតិ

នយោបាយជាតិ

ឯកឧត្តម កឹម សុខា ថា គេតាមយាយីតាំងពីឆ្នាំ១៩៩៣

11, May 2016 , 5:35 pm

រូបភាព

ដោយ: ម៉ៅ សុផា

ចាប់តាំងពីឈានជើងចូលក្នុងឆាកនយោបាយ មក ឯកឧត្តម កឹម សុខា តែរងនូវការរុកកួនពីសំណាក់បុគ្គលដទៃ ដោយឥតស្រាកស្រាន្ត។ ប៉ុន្តែឯកឧត្តមកឹម សុខា ហាក់ដូចស៊ាំទៅហើយ ចំពោះទិដ្ឋភាពនៃការយាយីបែបនេះ ហើយថែមទាំងធ្វើឲ្យលោក កាន់តែរឹងមាំនិងតស៊ូទៅវិញ ដើម្បីគណបក្សសង្រោះជាតិ សម្រេចគោលដៅក្នុងការដឹកនាំប្រទេសនៅពេលខាងមុខ។ នេះបើតាមការរៀបរាប់របស់លោក ឯឧត្តម កឹម សុខា នៅចំពោះមុខ អ្នកគាំទ្ររបស់ខ្លួន។

អនុប្រធានគណបក្សសង្គ្រោះជាតិ ឯកឧត្តម កឹម សុខា បានអះអាងថា ចាប់តាំងទសវត្សទី៩០មក ជីវិតនយោបាយរបស់ឯកឧត្តម មិនដែលរួចផុតពីការឆាឆៅរបស់គួប្រកួតឡើយ។ ឯកឧត្តម កឹម សុខា បន្តថា រហូតមកដល់បច្ចុប្បន្ននេះ ឯកឧត្តម នៅតែរងសម្ភាធនិងការព្យាបាទពីអ្នកដទៃ ដើម្បីបំបាក់ប្រជាប្រិយភាពក្នុងឆាកនយោបាយ។ ការថ្លែងបែបនេះ ធ្វើឡើងក្នុងពិធីសំណេះសំណាលជាមួយតំណាងយុវជនគណបក្សសង្គ្រោះជាតិទូទាំងរាជធានីភ្នំពេញ ដែលប្រារព្ធនៅទីស្នាក់ការកណ្តាល នាថ្ងៃទី១១ ឧសភានេះ។

ឯកឧត្តម កឹម សុខា លើកឡើងថា ដោយសារតែចង់បញ្ឈប់ជីវិតនយោបាយរបស់ឯកឧត្តម គួប្រជែងបានចំណាយប្រាក់ និងកម្លាំងមនុស្សអស់ជាច្រើន។ អនុប្រធានបក្សជំទាស់រូបនេះ បន្ថែមទៀតថា មូលហេតុដែលគួបដិបក្ខព្យាយាមតាមករុកទន្ទ្រានជីវិតនយោបាយរបស់ខ្លួនដូច្នេះ ដោយសារតែឯកឧត្តម បានឈរលើគោលជំហរប្រយោជន៍ជាតិ និងប្រជាជន ជាធំ។

ឯកឧត្តម កឹម សុខា បានបញ្ជាក់ដូច្នេះថា៖«ខ្ញុំឲ្យគេសរសេរពីការធ្វើទុក្ខបុកម្នេញខ្ញុំ តាំងពីខ្ញុំធ្វើនយោបាយ ពីឆ្នាំ១៩៩៣ មក។ គេរករឿងខ្ញុំរហូត ហើយរឿងហ្នឹងមានចងក្រងជាសៀវភៅទុក។ អ្នកខ្លះថា ម្តេចក៏គេ ចំណាយពេលវេលា ចំណាយស្ថាប័ន ចំណាយលុយ ចំណាយមនុស្សច្រើនណាស់ មកលើរឿងបុគ្គលខ្ញុំម្នាក់។ បើជារឿងខ្ញុំ ប្រហែលជាគេមិនចាំបាច់ធ្វើដល់ប៉ុណ្ណឹងទេ។ តែកឹម សុខា នេះគឺជាតិ កឹម សុខា ឈរដើម្បីជាតិ។ អ៊ីចឹងដើម្បីគាស់ជាតិហ្នឹងមួយ វាត្រូវទើសកឹម សុខា ហ្នឹងបាំងមុខ»។

ការលើកឡើងរបស់ឯកឧត្តម កឹម សុខា ពេលនេះ គឺស្របទៅនឹងស្ថានភាពនយោបាយនាពេលបប្ចុប្បន្នដែលកំពុងតែអាប់អួលកាន់ខ្លាំងទៅៗ ដោយសារតែការពាក់មុខយក្សដាក់គ្នារវាងបក្សកាន់អំណាចនិងបក្សប្រឆាំង៕