លោក ឯម ច័ន្ទមករា នឹងស្នើទៅរដ្ឋមន្ត្រីក្រសួងសង្គមកិច្ច ឲ្យដក«មន្ត្រីស្ពឹក»លើការងារពិការភាព

ជាតិ

លោក ឯម ច័ន្ទមករា នឹងស្នើទៅរដ្ឋមន្ត្រីក្រសួងសង្គមកិច្ច ឲ្យដក«មន្ត្រីស្ពឹក»លើការងារពិការភាព

26, May 2016 , 9:39 pm

រូបភាព

ដោយ: ខន ចំប៉ា

លោក ឯម ច័ន្ទមករា នឹងស្នើទៅរដ្ឋមន្ត្រីក្រសួងសង្គមកិច្ច លោក វង់ សូត ឲ្យពិនិត្យ ពិចារណាដកតំណែង មន្ត្រីណាដែល មានភាពស្ពឹកស្រពន់ ចំពោះការងារពិការភាព។ ការថ្លែងបែបនេះ របស់អគ្គលេខាធិការក្រុមប្រឹក្សាសកម្មភាពជនពិការ រូបនេះ គឺធ្វើឡើងនៅក្នុងវគ្គបណ្តុះបណ្តាលសមាជិកក្រុមការងារសកម្មជនពិការតាមក្រសួង ស្ថាប័ន ស្តីពីការកសាងផែនការសកម្មភាព នៅថ្ងៃទី២៦ខែឧសភានេះ នៅ នៅភោជនីយដ្ឋានទន្លេបាសាក់២ ។

លោក ឯម ច័ន្ទមករា បាននិយាយខ្លាំងៗយ៉ាងនេះថា ៖«ខ្ញុំនឹងស្នើទៅថ្នាក់ដឹកនាំរបស់ក្រសួងសង្គមកិច្ច ដើម្បីដកមន្ត្រីអគ្គលេខាធិការដ្ឋានណាដែលស្ពឹកស្រពន់ មិនព្រមយកចិត្តទុកដាក់ទៅលើការងារពិការភាព។ យើងនឹងស្នើឲ្យមានការពិនិត្យ ពិចារណា សើរើមន្ត្រីចាប់តាំងពីថ្នាក់អគ្គនាយក រហូតដល់មន្ត្រី»។

សូមស្តាប់សំឡេងរបស់លោក ឯម ច័ន្ទមករា ៖

បន្ទាប់ពីប្រកាសបែបនេះហើយ អគ្គលេខាធិការក្រុមប្រឹក្សាសកម្មភាពជនពិការ រូបនេះ ក៏បានប្រតិកម្មតប ទៅប្រធានអង្គការមួយរូបដែលធ្លាប់លើកឡើងពីបញ្ហាប្រឈមរបស់បងប្អូនជនពិការ ក្រោយអាជ្ញាធរហាមមិនឲ្យក្រុមជនពិការច្រៀងតាមស្តុប ឬតាមទីសាធារណៈ។ លោក ឯម ច័ន្ទមករា បញ្ជាក់ទៅកាន់ប្រធានអង្គការដែលលោក មិនបញ្ចេញឈ្មោះនោះយ៉ាងនេះថា៖« លោកពិនិត្យឡើងវិញ បើលោកលើកទឹកចិត្តបងប្អូនជនពិការឲ្យច្រៀងនៅតាមថ្នល់ ស្មើនឹងគាត់លើកទឹកចិត្តឲ្យបងប្អូនជនពិការសុំទាន»។

សូមបញ្ជាក់ថា កន្លងមក រដ្ឋបាលរាជធានីភ្នំពេញ បានស្នើឲ្យក្រុមជនពិការបញ្ឈប់សកម្មភាពច្រៀងតាមស្តុប ឬតាមទីសាធារណៈរបស់ខ្លួន ក្រោមហេតុផលធ្វើឲ្យប៉ះពាល់ដល់សណ្តាប់ធ្នាប់សាធារណៈតាមចិញ្ចើមផ្លូវ ប៉ះពាល់ដល់ចរាចរណ៍ ជះឥទ្ធិពលមិនល្អទៅដល់សង្គម ឬប៉ះពាល់ដល់កិត្តិយសរបស់ជនពិការផ្សេងទៀត៕