ជាតិ
នយោបាយជាតិ
កម្ពុជា មិនចូលរួមចេញសេចក្តីថ្លែងការណ៍គាំទ្រសេចក្តីសម្រេចតុលាការអន្តរជាតិឡើយ
×
សម្តេចនាយករដ្ឋមន្ត្រី ហ៊ុន សែន បានថ្លែងយ៉ាងម៉ឺងម៉ាត់ ថា រាល់សេចក្តីថ្លែងការណ៍ទាំងឡាយណា ដែលទាក់ទងនឹងបញ្ហាសមុទ្រចិនខាងត្បូងមិនសមស្រប កម្ពុជា មិនចូលរួមជាមួយឡើយ។ សម្តេច ក៏ប្រកាសមិនគាំទ្រចំពោះ សេចក្តីសម្រេចរបស់មជ្ឈត្តការអន្តរជាតិ ដែលប្តឹងដោយហ្វីលីពីនប្រឆាំងចិនផងដែរ។
នាពិធីបិទវគ្គប្រគល់សញ្ញាបត្រដល់សិស្សសាលាភូមិន្ទបាលនៅព្រឹកថ្ងៃចន្ទនេះ សម្តេច ហ៊ុន សែន បានអះអាងជាថ្មីពីគោលជំហររបស់កម្ពុជាលើបញ្ហាសមុទ្រចិនខាងត្បូង និងទទូចឲ្យបញ្ឈប់ចោទប្រកាន់កម្ពុជាថាជាអ្នកបំផ្លាញដំណោះស្រាយលើបញ្ហាសមុទ្រចិនខាងត្បូងផងដែរ។
សម្តេចនាយករដ្ឋមន្ត្រី បានអំពាវនាវឲ្យភាគីពាក់ព័ន្ធដោះស្រាយជម្លោះ ដោយប្រើយន្តការអាស៊ាន-ចិន ដើម្បីអនុវត្តឲ្យបានត្រឹមត្រូវនូវសេចក្តីថ្លែងការណ៍ភាគីក្រមប្រតិបត្តិសមុទ្រចិនខាងត្បូង(DOC) ខិតខំតាក់តែងក្រមប្រតិបត្តិសមុទ្រចិនខាងត្បូង(COC)រវាងអាស៊ាន-ចិននិងប្រទេសពាក់ព័ន្ធត្រូវដោះស្រាយ ដោយជជែកពិភាក្សាគ្នា។ ជាមួយគ្នានេះ សម្តេច ក៏ទទូចភាគីពាក់ព័ន្ធអត់ធ្មត់ពីការគំរាម និងប្រើប្រាស់កងកម្លាំងដើម្បីដោះស្រាយបញ្ហានេះផងដែរ។
ប្រតិកម្មរបស់សម្តេចនាយករដ្ឋមន្ត្រី ធ្វើឡើងបន្ទាប់ពីមានអង្គទូតមួយបញ្ចុះបញ្ចូលឲ្យសម្តេចចេញ សេចក្តីថ្លែងការណ៍ដើម្បីគាំទ្រតុលាការអន្តរជាតិ ដោយសម្តេច ដាក់ការសង្ស័យថា ជារឿងនយោបាយ រៀបចំទុកមុន។
យ៉ាងណាក៏ដោយ សម្តេចនាយករដ្ឋមន្ត្រី បានសង្កត់ធ្ងន់ ថា រាល់វេទិកាទាំងឡាយដែលលើកឡើងពី បញ្ហាសមុទ្រចិនខាងត្បូងមិនសមស្រប សម្តេច នឹងមិនចូលរួមចេញសេចក្តីថ្លែងការណ៍ឡើយ។ ហើយសម្តេច ក៏មិនគាំទ្រចំពោះមជ្ឈត្តការអន្តរជាតិក្រុងឡាអេដែរ។ សម្តេច បញ្ជាក់ថា បើទោះបីជាសេចក្តីសម្រេចរបស់មជ្ឈត្តការអន្តរជាតិ សម្រេចគាំទ្រ ឬប្រឆាំងចិនយ៉ាងណាក៏ដោយ សម្តេចនៅតែមិនគាំទ្រដដែល។
សូមជម្រាបផងដែរថា កាលពីឆ្នាំ២០១៣ ហ្វីលីពីន បានប្តឹងចិនទៅកាន់មជ្ឈត្តការនៃតុលាការអន្តរជាតិក្រុងឡាអេ នៃប្រទេសហូឡង់ ដោយបានចោទចិនថា បានរំលោភលើតំបន់សេដ្ឋកិច្ចផ្តាច់មុខ(EEZ)និងតំបន់ផ្សេងទៀតក្នុងសមុទ្រចិនខាងត្បូង ដែលបានកំណត់ដោយអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ១៩៨២(UNCLOS)។ តែចិន បានបដិសេធមិនចូលរួមក្នុងដំណើរការ នៃការជំនុំជម្រះនេះនោះទេ។
បើទោះបីជាគ្មានវត្តមានចិនចូលរួមក៏ដោយ នៅចុងឆ្នាំ២០១៥ មជ្ឈត្តករនៃមជ្ឈត្តការនៃតុលាការអន្តរជាតិ បានប្រកាសពីយុត្តាធិការក្នុងការជំនុំជម្រះបញ្ហានេះតាមបណ្តឹងរបស់ហ្វីលីពីនរួចទៅហើយ។ ការសួរដេញដោលឬជំនុំជម្រះចុងក្រោយ ត្រូវបានធ្វើឡើងកាលពីថ្ងៃទី៣០ ខែវិច្ឆិកា ឆ្នាំ២០១៥ ហើយ ការប្រកាសមជ្ឈត្តវិនិច្ឆ័យ ឬសេចក្តីសម្រេចនៃសំណុំរឿងនេះ ត្រូវបានរំពឹងថា នឹងត្រូវបានប្រកាសនៅខែមិថុនា ឬកក្កដាខាងមុខដ៏ខ្លីនេះហើយ៕
© រក្សាសិទ្ធិដោយ thmeythmey.com