ជាតិ
ស្ត្រីជនពិការដំបូងគេសម្រេចគោលបំណងក្នុងការឡើងរូតបាកាណអង្គរវត្ត រូបភាពពី៖ហ្វេសប៊ុក អាជ្ញាធរជាតិអប្សរា
× សៀមរាប៖ វាជារឿងមួយដ៏គួរឲ្យភ្ញាក់ផ្អើលដែរ ដែលស្ត្រីជាជនពិការជើងម្នាក់ បានឡើងលើរូតបាកាណបានដោយជោគជ័យ។ នាងត្រូវបានចាត់ទុកថា ទំនងជាស្ត្រីដំបូងគេ ដែលជាជនពិការ ដែលអាចឡើង និងចុះរូតបាកាណ ដែលជាកន្លែងខ្ពស់បំផុតនៃប្រាសាទអង្គរវត្ត។
ជឿន គឹមហេង គឺជានារីជនពិការម្នាក់ ដែលបានដាក់ពាក្យស្នើសុំអាជ្ញាធរជាតិអប្សរា ដើម្បីឡើងទៅរូតបាកាណ។ ហេតុផលថា កន្លងមក ចាស់ជរា កុមារ និងជនពិការជាដើម ពុំត្រូវបានអនុញ្ញាតឲ្យឡើងលើរូតបាកាណទេ ក្រោមហេតុផល ដើម្បីខ្លាចកើតគ្រោះថ្នាក់ណាមួយជាយថាហេតុ។
នៅថ្ងៃទី២០ កក្កដា ជឿន គឹមហេង ដែលស្វិតដៃជើងតាំងពីនៅតូច ត្រូវបានអនុញ្ញាតឲ្យឡើងលើបាកាណ ក្រោយពីនាងបានសរសេរលិខិតបញ្ជាក់ពីការទទួលខុសត្រូវដោយខ្លួនឯង ក្នុងការជំទាស់បទបញ្ជាផ្ទៃក្នុងរបស់អាជ្ញាធរជាតិអប្សរា។ ជាលទ្ធផល នាងបានឡើងនិងចុះរូតបាកាណដោយជោគជ័យ និងពោរពេញដោយមោទនភាព ក្នុងនាមជាជនពិការម្នាក់។
ជឿន គឹមហេង មានអាយុ២៥ឆ្នាំ ហើយក៏ជាមន្ត្រីរាជការម្នាក់ផងដែរ។ នាងធ្លាប់ត្រូវបានបុគ្គលិករបស់អាជ្ញាធរជាតិអប្សរា ជំទាស់នឹងបំណងនាងកាលពី២ទៅ៣ខែមុន ខណៈដែលនាង ទាមទារចង់ឡើងរូតបាកាណអង្គរវត្ត ដែលគេស្គាល់ថា ជាទីសក្ការៈបូជាដែលខ្ពស់ជាងគេ។ ជឿន គឹមហេង មិនគិតថា ជនពិការគ្មានសមត្ថភាពដូចមនុស្សធម្មតានោះទេ។ នេះបើតាមខ្លឹមសារ ដែលសរសេរដោយអាជ្ញាធរជាតិអប្សរា។
ក្រោយពីសម្រេចគោលបំណងរបស់ខ្លួនរួចមក ស្ត្រីជនពិការ គឹមហេង បានសម្តែងអារម្មណ៍រំភើប រីករាយ។ នាងថា រូតបាកាណជាកន្លែងដ៏អស្ចារ្យ ហើយវាលែងជារឿននិទាន ដូចដែលនាងធ្លាប់បានគិតកន្លងមក។ «...ខ្ញុំបានមកដល់ហើយ អង្គរពុំមែនជារឿងនិទានទៀតទេ វាជារបស់មានពិត”។ នេះជាអារម្មណ៍ពិតរបស់ស្ត្រីជនពិការដំបូង ដែលត្រូវបានអនុញ្ញាតឲ្យឡើងលើរូតបាកាណ៕
© រក្សាសិទ្ធិដោយ thmeythmey.com