ជាតិ
អើ! បើរៀនក្រោមសាលាសម្តេច ហើយមិនបោះឆ្នោតឲ្យសម្តេចទេ ធ្វើម៉េច?
× សម្ដេចនាយករដ្ឋមន្ត្រី ហ៊ុន សែន បានចុះជួបប្រជាពលរដ្ឋនៅខេត្តតាកែវ នៅព្រឹកថ្ងៃទី១៦ សីហានេះ។ ក្នុងដំណើរចុះជួបប្រជាពលរដ្ឋនេះ ប្រមុខរដ្ឋាភិបាល ក៏បានចុះត្រួតពិនិត្យសាលាខេត្តតាកែវ ដោយបានជួបសំណេះសំណាលជាមួយសិស្សានុសិស្សផងដែរ។ សម្ដេច ហ៊ុន សែន បានចោទជាសំណួរទៅសិស្សានុសិស្សទាំងនោះថា ៖«តើដល់អាយុបោះឆ្នោតហើយឬនៅ? តើបោះឆ្នោតឲ្យអ្នកណា? បើរៀនក្រោមសាលាសម្ដេចហើយ មិនបោះឲ្យសម្ដេចទេ ធ្វើម៉េច? និយាយត្រង់ៗ គេ(គណបក្សដទៃ)មិនបានធ្វើអ្វីសោះ ទៅបោះឆ្នោតឲ្យគេ ដល់សុំសាលាគេមិនបាន តើធ្វើម៉េច?»។
សូមស្ដាប់សំឡេង៖
ត្រង់ចំណុចនេះអ្នកវិភាគសង្គមលោក មាស នី យល់ថា សកម្មភាពរបស់សម្ដេចនាយករដ្ឋមន្ត្រី ហ៊ុន សែន គប្បីបែងចែកឲ្យដាច់ពីគ្នា ពីតួនាទីជាប្រមុខរដ្ឋាភិបាល និងតួនាទីប្រមុខបក្សនយោបាយ។ តែសម្រាប់អ្នកវិភាគរូបនេះ បើទោះជាសម្ដេច ហ៊ុន សែន លើកយកពីការកសាងសាលារៀន និងសមិទ្ធផលនានារបស់ខ្លួន ទៅអួតប្រាប់ប្រជាពលរដ្ឋ និងសិស្សានុសិស្សក្តី ក៏វាមិនសូវមានប្រយោជន៍ដែរ ព្រោះយុវជនមានការយល់ដឹងច្រើនជាងមុន។ បើតាមលោក មាស នី យុវជន និងសិស្សនុសិស្ស គប្បីត្រូវតាមពីស្ថានការណ៍នយោបាយ និងត្រូវមើលទៅលើចក្ខុវិស័យរបស់អ្នកនយោបាយ ដែលពួកគេគាំទ្រឲ្យបានច្បាស់លាស់ ដោយមិនមែនគាំទ្រអ្នកនយោបាយដោយផ្កាប់មុខពេកនោះទេ៕
© រក្សាសិទ្ធិដោយ thmeythmey.com