ពីនេះ ពីនោះ
តើពេលណាត្រូវសរសេរថា«និរាករ» និង«និរាករណ៍»នៅក្នុងអត្ថបទ?
× ភ្នំពេញ៖ ពាក្យថា «និរាករ» និង«និរាករណ៍» សាធារណជន នៅមានភាពមិនច្បាស់លាស់ នៅក្នុងការសរសេរ ថាពេលណាត្រូវ«និរាករ» ហើយពេលណាត្រូវសរសេរថា«និរាករណ៍»។ មូលហេតុ គឺមិនសូវបានយល់ពីក្បួន វេយ្យាករណ៍ នៃកិរិយាសព្ទ គុណសព្ទ នាមសព្ទ បាលី និងសំស្ក្រឹតនៅក្នុងភាសាខ្មែរ។ ពាក្យថា «និរាករ» និង«និរាករណ៍» មានលក្ខខណ្ឌសរសេរដូចខាងក្រោម៖
នៅក្នុងការសរសេរអត្ថបទ សាធារណជនត្រូវចំណាំក្នុងក្បួនវេយ្យាករណ៍ខ្មែរថា បើខ្លួនចង់ប្រើពាក្យនេះ ជាករិយាសព្ទ គឺត្រូវសរសេរថា«និរាករ» ដែលមានន័យថា លុបចោល។ ប៉ុន្តែ ប្រើជានាមសព្ទ គឺចាំបាច់ត្រូវសរសេរ«និរាករណ៍» ដែលមានន័យថា ការលុបចោល។
ប៉ុន្តែក្នុងករណី សាធារណជន សរសេរពាក្យនេះ ផ្សំជាមួយពាក្យថា «ការ, ក្ដី, សេចក្ដី និងដំណើរ» គឺមិនត្រូវសរសរថា «ការនិរាករណ៍ , ក្ដីនិរាករណ៍ , សេចក្ដីនិរាករណ៍ និងដំណើរនិរាករណ៍» ឡើយ ព្រោះការសរសេរបែបនេះ មិនត្រឹមត្រូវតាមក្បួនវេយ្យាករណ៍ខ្មែរ នោះទេ។ មូលហេតុគឺដោយសារពាក្យថា «ការ, ក្ដី, សេចក្ដី និងដំណើរ» ជានាមសព្ទ មិនអាចយកមកផ្សំជាមួយពាក្យថា «និរាករណ៍ »បានទេ ព្រោះជានាមសព្ទដូចគ្នា។
ដោយឡែក ចំពោះពាក្យថា «ការ, ក្ដី, សេចក្ដី និងដំណើរ»នេះ ត្រូវផ្សំជាមួយពាក្យថា «និរាករ» ទើបត្រឹមត្រូវ។ ឧទាហរណ៍៖ «ការនិរាករ, ក្ដីនិរាករ, សេចក្ដីនិរាករ និងដំណើរនិរាករ»៕
ដកស្រង់ពីវចនានុក្រមខ្មែររបស់សម្ដេចព្រះសង្ឃរាជ ជួន ណាត
© រក្សាសិទ្ធិដោយ thmeythmey.com