ជាតិ
ADB អនុម័តកម្ចី៤៥លានដុល្លារ លើកកម្ពស់ការអប់រំកម្រិតមធ្យមសិក្សាទុតិយភូមិ
× ធនាគារអភិវឌ្ឍន៍អាស៊ី(ADB) បានអនុម័តផ្តល់កម្ចីក្នុងទឹកប្រាក់ចំនួន ៤៥ លានដុល្លារ ដើម្បីលើកកម្ពស់ការទទួលបានការអប់រំប្រកបដោយគុណភាព នៅកម្រិតមធ្យមសិក្សាទុតិយភូមិ ក្នុងប្រទេសកម្ពុជា។
បើតាមសេចក្តីប្រកាសព័ត៌មានរបស់ADB នៅថ្ងៃទី១៧ ខែតុលានេះ កម្មវិធីអភិវឌ្ឍន៍វិស័យអប់រំកម្រិតមធ្យមសិក្សាទុតិយភូមិ (USESDP) នឹងផ្តល់ការគាំទ្រដល់កិច្ចខិតខំប្រឹងប្រែងរបស់រដ្ឋាភិបាល ក្នុងការបង្កើនគុណភាពនៃធនធានមនុស្សរបស់ខ្លួន ដើម្បីធានានិរន្តរភាពនៃការអភិវឌ្ឍសេដ្ឋកិច្ចនៅកម្ពុជា និងបង្កើនភាពប្រកួតប្រជែងរបស់ប្រទេសនេះ។
លោក Samiuela Tukuafu នាយកADB ចាំប្រទេសកម្ពុជា មានប្រសាសន៍ថា៖«កម្មវិធីនេះ នឹងគាំទ្រដល់ការធ្វើកំណែទម្រង់ សំដៅបង្កើនប្រសិទ្ធភាព នៃការអប់រំកម្រិតមធ្យមសិក្សាទុតិយភូមិ ដើម្បីឆ្លើយតបចំពោះតម្រូវការពលករជំនាញ ដែលកំពុងតែកើនឡើងក្នុងទីផ្សារការងារ»។ នាយក ADB រូបនេះបន្តថា៖«សិស្សមកពីតាមខេត្តជួបការលំបាក ជាពិសេស សិស្សស្រី នឹងទទួលបានឱកាសបន្ថែមទៀត ដើម្បីទទួលបានការអប់រំកម្រិតមធ្យមសិក្សាទុតិយភូមិ ប្រកបដោយគុណភាព»។
បើតាម ADB វិធានការជាក់លាក់ រួមមានការពង្រីកសម្ភាររូបវ័ន្តសម្រាប់ការអប់រំកម្រិតមធ្យមសិក្សាទុតិយភូមិ ដូចជាមន្ទីរពិសោធន៍វិទ្យាសាស្ត្រ និងការបំពាក់សម្ភាររូបវ័ន្តសម្រាប់សិក្សាពីបច្ចេកវិទ្យាព័ត៌មាន និងសារគមនាគមន៍ (ICT) ក៏ដូចជាបរិក្ខារ និងសង្ហារឹមផ្សេងទៀត នៅក្នុងមជ្ឈមណ្ឌលធនធានមធ្យមសិក្សាទុតិយភូមិចំនួន ១២ ។ ការផ្តល់ផ្ទះសំណាក់គ្រូ នៅតាមតំបន់ ដែលមានតម្រូវការខ្ពស់ ក៏ដូចជាអាហារូបករណ៍សម្រាប់សិស្សមធ្យមសិក្សាទុតិយភូមិ ដែលសិក្សាបណ្តុំមុខវិជ្ជាវិទ្យាសាស្ត្រ និងគរុសិស្សដែលកំពុងរៀនក្នុងកម្មវិធីបណ្តុះបណ្តាលដំបូង ដែលផ្តោតលើមុខវិជ្ជាវិទ្យាសាស្ត្រ និងគណិតវិទ្យា។ ការពិនិត្យឡើងវិញ និងកែលំអកម្មវិធីសិក្សាមុខវិជ្ជាវិទ្យាសាស្ត្រ គណិតវិទ្យា និង ICT នៅកម្រិតមធ្យមសិក្សាទុតិយភូមិ ហើយសៀវភៅសម្រាប់សិស្សថ្នាក់ទី១២ និងសៀវភៅណែនាំគ្រូ នឹងត្រូវផ្គត់ផ្គង់ សម្រាប់គ្រប់មុខវិជ្ជាទាំងអស់។
លើសពីនេះ ក៏នឹងមានការពង្រឹងសមត្ថភាពរបស់បុគ្គលិក និងថ្នាក់គ្រប់គ្រងសាលារៀន ក្នុងការវាយតម្លៃលើប្រសិទ្ធភាព នៃការប្រើប្រាស់ធនធានសិក្សា និងមូលនិធិកែលំអសាលារៀនផងដែរ។
ADB បានដើរតួនាទីយ៉ាងសំខាន់ក្នុងវិស័យអប់រំ និងអប់រំបណ្តុះបណ្តាលបច្ចេកទេសវិជ្ជាជីវៈ នៅកម្ពុជា ក្នុងរយៈពេល ១៥ ឆ្នាំចុងក្រោយនេះ។ ADB បានផ្តល់ការគាំទ្រសំខាន់ៗក្នុងការវិភាគតាមវិស័យ និងក្នុងការអនុវត្តកំណែទម្រង់អប់រំ តាមរយៈការវិនិយោគ និងការផ្តល់ជំនួយបច្ចេកទេស៕
© រក្សាសិទ្ធិដោយ thmeythmey.com