ជាតិ
ពិព័រណ៍ការងារថ្នាក់ជាតិឆ្នាំ២០១៦ នឹងផ្តល់ឱកាសការងារ ៩ ពាន់កន្លែងដល់សាធារណជន
× ភ្នំពេញ៖ ពិព័រណ៌ការងារថ្នាក់ជាតិឆ្នាំ ២០១៦ នឹងត្រូវរៀបចំឡើងរយៈពេល២ថ្ងៃ គឺនៅថ្ងៃទី៥ ទី៦ ខែវិច្ឆិកា ខាងមុខ នៅមជ្ឈមណ្ឌលសន្និបាតកោះពេជ្រ។ តាមរយៈពិព័រណ៌នេះ អ្នកចូលរួមនឹងមានឱកាសជួបផ្ទាល់ជាមួយក្រុមហ៊ុនធំៗជាង៩០ និងការជ្រើសរើសបុគ្គលិកផ្ទាល់ ប្រមាណ ៩ ពាន់កន្លែង។
ពិព័រណ៍ការងារថ្នាក់ជាតិឆ្នាំ ២០១៦ នឹងត្រូវរៀបចំឡើងរយៈពេល ២ថ្ងៃ គឺនៅថ្ងៃទី៥ ទី៦ ខែវិច្ឆិកា ខាងមុខ។ ពិព័រណ៌ការងារថ្នាក់ជាតិឆ្នាំ ២០១៦នេះ រៀបចំឡើងក្នុងគោលបំណងបង្កើនឱកាសដល់សិស្ស និស្សិត និងសាធារណជន ស្វែងរកការងារ និងផ្ដល់ភាពងាយស្រួលដល់អ្នករកការងារ ទទួលបានព័ត៌មានពីទីផ្សារការងារនៅកម្ពុជា។ ពិព័រណ៍នេះ នឹងប្រព្រឹត្តិទៅនៅថ្ងៃទី ៥ ដល់ ៦ ខែវិច្ឆិកា ឆ្នាំ២០១៦ នាមជ្ឈមណ្ឌលសន្និបាតកោះពេជ្រ ចាប់ពីម៉ោង ៨ព្រឹក ដល់៨យប់។
លោក គន់ សម្បត្តិ អនុប្រធានផ្នែកប្រមូល និងផ្សព្វផ្សាយ នៃទីភ្នាក់ងារជាតិ មុខរបរនិងការងារ បានប្រាប់សារព័ត៌មានថ្មីៗថា ពិព័រណ៍ការងារថ្នាក់ជាតិនេះ ផ្តោតទៅលើវិស័យអប់រំ ទូរគមនាគមន៍ សំណង់ បដិសណ្ឋារកិច្ច និងធនាគារ។ បើតាម លោក គន់ សម្បត្តិ អ្នកចូលរួមពិព័រណ៌ការងារនេះ នឹងមានឱកាសជួបផ្ទាល់ជាមួយក្រុមហ៊ុនធំៗជាង៩០ ការណែនាំអំពីអាជីព និងជំនាញបច្ចេកទេស និងការសម្ភាសការងារ និងជ្រើសរើសបុគ្គលិកផ្ទាល់ ប្រមាណ ៩ ពាន់កន្លែង។
នេះជាឆ្នាំទី៦ហើយ ដែលទីភ្នាក់ងារជាតិ មុខរបរ និងការងារ បានរៀបចំពិព័រណ៌នេះឡើង។ កាលពីឆ្នាំ២០១៥ ពិព័រណ៌ការងារថ្នាក់ជាតិ មានក្រុមហ៊ុនចូលរួមត្រឹមតែ ៧៥ ក្រុមហ៊ុន។
ពិព័រណ៌ការងារថ្នាក់ជាតិឆ្នាំ២០១៦ រយៈពេល២ថ្ងៃនេះ នឹងបើកឲ្យចូលរួមដោយសេរី ចាប់ពីម៉ោង ៨ព្រឹក ដល់៨យប់ ។ សាធារណជនដែលកំពុងស្វែងរកការងារធ្វើ សូមភ្ជាប់ទៅជាមួយប្រវត្តិរូបសង្ខេបផង ដើម្បីទទួលបានឱកាសការងារភ្លាមៗ នៅក្នុងអំឡុងពេលពិព័រន៍នេះ៕
© រក្សាសិទ្ធិដោយ thmeythmey.com