ជាតិ
នយោបាយជាតិ
តុលាការចាប់ផ្តើមកាត់ទោសមេបក្សសង្គ្រោះជាតិ ក្រោយការរារាំងមិនឲ្យចូលកម្ពុជា
× ភ្នំពេញ៖ នៅព្រឹកថ្ងៃទី៨វិច្ឆិកានេះ សាលាដំបូងរាជធានីភ្នំពេញបានបើកសវនាការកាត់ទោសឯកឧត្តម សម រង្ស៊ី ទាក់ទងនឹងបណ្តឹងបរិហាកេរ្តិ៍ ដែលប្តឹងដោយលោក សោម សឿន រដ្ឋមន្ត្រីអមប្រតិភូនាយករដ្ឋមន្ត្រី។ ប្រធានគណបក្សប្រឆាំងបានចោទសម្តេចនាយករដ្ឋមន្ត្រីថា បានបញ្ជាឲ្យមន្ត្រីបង្កើតគណនី ហ្វេសប៊ុកក្លែងក្លាយ ដើម្បីចុច like លើទំព័រហ្វេសប៊ុកសម្តេច។
សាលាដំបូងបានបញ្ចប់ការជម្រះក្តីហើយនៅព្រឹកថ្ងៃអង្គារនេះ ដោយអវត្តមានជនជាប់ចោទ គឺឯកឧត្តម សម រង្ស៊ី ប្រធានគណបក្សសង្គ្រោះជាតិ។ សាលក្រមនឹងត្រូវប្រកាសនៅរសៀលម៉ោង៣ថ្ងៃទី៨វិច្ឆិកានេះដដែល។
លោក សោម សឿន ដែលមានឋានៈជារដ្ឋមន្ត្រីអមប្រតិភូនាយករដ្ឋមន្ត្រី បានដាក់ពាក្យបណ្តឹង បរិហាកេរ្តិ៍ជាសាធារណៈ ប្រឆាំងប្រធានគណបក្សសង្គ្រោះជាតិ បន្ទាប់ពីមេដឹកនាំគណបក្សប្រឆាំងរូបនេះបានសរសេរនៅលើទំព័រហ្វេសប៊ុករបស់ខ្លួនចោទប្រកាន់សម្តេច ហ៊ុន សែន ថាបានទិញ like ពីបរទេស និងបានបញ្ជាឲ្យមន្ត្រីបង្កើតគណនីក្លែងក្លាយដើម្បីចុច like ទំព័រហ្វេសប៊ុករបស់សម្តេចនោះ។
សវនការលើសំណុំរឿងថ្មីនេះ បានប្រព្រឹត្តទៅ ក្រោយពីអាជ្ញាធរកម្ពុជាបានហាមក្រុមហ៊ុនអាកាសចរណ៍នានា មិនឲ្យដឹកឯកឧត្តម សម រង្ស៊ី ចូលមកក្នុងប្រទេសកម្ពុជា ក្រោមមូលហេតុ សន្តិសុខ។
នៅពេលដែលសាលាដំបូងកំពុងដំណើរការក្តី ឯកឧត្តម សម រង្ស៊ី បានបន្តសរសេរនៅលើទំព័រហ្វេសប៊ុករបស់លោក ដែលគេអាចអានបានយ៉ាងដូច្នេះ៖«ខ្ញុំមិនខ្វល់ពីពាក្យបណ្តឹងនេះទេ ហើយខ្ញុំនៅតែហ៊ានអះអាងថាលោក ហ៊ុន សែន ប្រើមន្ត្រី និងបុគ្គលិកក្រោមឱវាទគាត់ ឲ្យបង្កើតគណនី Facebook ក្លែងក្លាយ ដើម្បីផ្តល់ Likeក្លែងក្លាយឲ្យទៅទំព័រ Facebook របស់គាត់។ ហើយគាត់ក៏បានទិញ "Like" ក្លែងក្លាយ យ៉ាងសន្ធឹកសន្ធាប់ពីច្រើនប្រទេសទូទាំងពិភពលោក ដើម្បីបង្អួតពីប្រជាប្រិយភាពក្លែងក្លាយរបស់គាត់»៕
© រក្សាសិទ្ធិដោយ thmeythmey.com