កីឡាជាតិ
×![]()
កីឡាករ ចាន់ វឌ្ឍនាកា បានអះអាងថា សមត្ថភាពលេងរបស់កីឡាករលីកកំពូលរបស់កម្ពុជា និងលីកលំដាប់ទី ៣ របស់ជប៉ុន គឺប្រដំប្រសងគ្នា។ ការថ្លែងបែបនេះ ធ្វើឡើងនៅពេលខ្សែប្រយុទ្ធក្រុមជម្រើសជាតិកម្ពុជារូបនេះ ត្រឡប់មកពីហ្វឹកហាត់ ជាមួយក្រុមលីកលំដាប់ទី ៣ របស់ជប៉ុន។ 
ខ្សែប្រយុទ្ធឆ្នើមរបស់ក្រុមជម្រើសជាតិកម្ពុជា ចាន់ វឌ្ឍនាកា បានត្រឡប់មកដល់កម្ពុជាវិញហើយ ក្រោយហាត់មួយសប្តាហ៍នៅជប៉ុន។ នៅចំពោះមុខអ្នកកាសែត នៅព្រលានយន្តហោះ នៅថ្ងៃទី៨ ខែវិច្ឆិកា ចាន់ វឌ្ឍនាកា ថ្លែងថាការហ្វឹកហាត់លើកនេះ គឺជា បទពិសោធន៍ថ្មីមួយទៀត ដែលអាចជួយក្រុមជម្រើសជាតិ និងបង្កើនសមត្ថភាពខ្លួនឯងផ្ទាល់។
តាមរយៈការហ្វឹកហាត់ និងចូលរួមលេងជាមួយក្រុមលីកលំដាប់ទី៣នៅជប៉ុន ចាន់ វឌ្ឍនាកា សង្កេតឃើញថា សមត្ថភាពរបស់កីឡាករនៅលីកទី៣ របស់ជប៉ុន និងកីឡាករលីកកំពូលរបស់កម្ពុជា គឺប្រហាក់ប្រហែលគ្នា។ ចាន់ វឌ្ឍនាកា បញ្ជាក់យ៉ាងដូច្នេះ៖«និយាយទៅ គឺអត់ខុសគ្នាប៉ុន្មានទេ គ្រាន់តែស្តាយលេងខុសគ្នា។ គុណភាពគឺប្រហាក់ប្រហែលគ្នា អាចប្រដំប្រសងគ្នា។ ខុសគ្នា គឺស្តាយលេងរបស់គេ គឺប៉ះខ្លីៗ»។
ខ្សែប្រយុទ្ធឆ្នើមរបស់ក្រុមជម្រើសជាតិកម្ពុជារូបនេះ ក៏លើកសរសើរពីទំនួលខុសត្រូវរបស់ក្រុមលីកទី៣ របស់ជប៉ុនផងដែរ។ ចាន់ វឌ្ឍនាកា បញ្ជាក់ថា កីឡាករម្នាក់ៗនៅលីកទី៣ របស់ជប៉ុន គេមានការទទួលខុសត្រូវខ្ពស់ ហើយការលេងជាក្រុម ក៏មានចង្វាក់ល្អ និងការសហការគ្នាល្អដែរ។ ជាមួយគ្នានោះ ក៏បញ្ជាក់ថាវិស័យកីឡាបាល់ទាត់នៅកម្ពុជា នៅមានចំណុចខ្វះខាតច្រើន ប៉ុន្តែកីឡាកររូបនេះ មិនបញ្ជាក់ថាចំណុចអ្វីខ្លះនោះទេ។
កីឡាករ ចាន់ វឌ្ឈនាកា បានចេញទៅហ្វឹកហាត់នៅក្លិបលីកលំដាប់ទី ៣ នៅប្រទេសជប៉ុន Fujieda MYFC តាំងពីថ្ងៃទី៣១ ខែតុលា។ ការហ្វឹកហាត់នេះក្នុងគោលបំណង ដើម្បីត្រៀមប្រកួតដណ្តើមពានរង្វាន់ AFF Suzuki Cup 2016 ៕
Tag:
បាល់ទាត់
ចាន់ វឌ្ឍនាកា
ក្រុមជម្រើសជាតិកម្ពុជា
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
2 ថ្ងៃ
