អន្តរជាតិ
នយោបាយអន្តរជាតិ
រដ្ឋបាលថ្មីរបស់ ដូណាល់ ត្រាំ ចាប់ផ្ដើមចេញរូបរាង
× ជាងពីរសប្ដាហ៍ក្រោយទទួលជ័យជម្នះលើលោកស្រី ហ៊ីឡារី គ្លីនតុន ប្រធានាធិបតីជាប់ឆ្នោត ដូណាល់ ត្រាំ កំពុងញាប់ដៃក្នុងការជ្រើសរើសបេក្ខជនសម្រាប់តំណែងនៅក្នុងរដ្ឋាភិបាលថ្មីរបស់លោក និងតំណែងសំខាន់ផ្សេងទៀត។ មនុស្សជំនិតរបស់លោក ត្រាំ និងសមាជិកនៃក្រុមការងារអន្តរកាលកំពុងស្ថិតក្នុងរ៉ាដារបស់លោក សម្រាប់តំណែងក្នុងគណៈរដ្ឋមន្ត្រីថ្មីនេះ។
ប្រធានាធិបតីជាប់ឆ្នោតថ្មីអាមេរិក ដូណាល់ ត្រាំ បានសំឡឹងឃើញបេក្ខជនជាច្រើនសម្រាប់តំណែងនៅក្នុងរដ្ឋាភិបាលថ្មីរបស់លោក។ ទាំងសម្ព័ន្ធមិត្តរបស់លោក ទាំងសមាជិកបក្សសាធារណរដ្ឋ គឺស្ថិតក្រោមក្រសែភ្នែករបស់លោក ហើយលោកក៏បានជួបជាមួយបុគ្គលជាច្រើននៅឯតារាងវាយហ្គោលរបស់លោកនៅឯរដ្ឋ New Jersey ។ អ្នកទាំងនោះត្រូវគេជឿថា នឹងមានឈ្មោះក្នុងសមាសភាពគណៈរដ្ឋមន្ត្រីថ្មីមិនខាន។
នៅចុងសប្ដាហ៍មុន ប្រធានាធិបតីជាប់ឆ្នោតរូបនេះ បានជ្រើសរើសឧត្តមសេនីយ៍ចូលនិវត្តន៍ Michael Flynn សម្រាប់តំណែងទីប្រឹក្សាសន្តិសុខជាតិ។ តំណែងទីប្រឹក្សាសន្តិសុខ ជាតួនាទីមួយក្នុងចំណោមតួនាទីសំខាន់ទាំងបីទទួលបន្ទុកសន្តិសុខជាតិ។ តំណែងប្រធានទីភ្នាក់ងារចារកម្មកណ្ដាល (CIA) នឹងធ្លាក់លើលោក Mike Pompeo ឯតួនាទីរដ្ឋអាជ្ញាវិញ លោក ត្រាំ ផ្ដល់ការទុកចិត្តលើសមាជិកព្រឹទ្ធសភា Jeff Sessions ។
មកទល់ពេលនេះ មានស្ត្រីពីររូបហើយដែលទទួលបានការផ្ដល់ទំនុកចិត្តសម្រាប់តំណែងសំខាន់ៗ។ លោក ដូណាល់ ត្រាំ ជ្រើសរើសអភិបាលរដ្ឋ South Carolina លោកស្រី Nikki Haley សម្រាប់តំណែងអគ្គរដ្ឋទូតប្រចាំអង្គការសហប្រជាជាតិ។ អ្វីគួរចាប់អារម្មណ៍ លោក ត្រាំ បានបង្ហាញបំណងជ្រើសរើសលោកស្រី Betsy DeVos ដែលជាសេដ្ឋីមកពីរដ្ឋ Michigan សម្រាប់តំណែងរដ្ឋមន្ត្រីអប់រំផងដែរ។
លើសពីនេះ អតីតបេក្ខជនប្រធានាធិបតីបក្សសាធារណរដ្ឋ លោក Ben Carson ទំនងមានឈ្មោះក្នុងរដ្ឋាភិបាលថ្មីដែរ។ សារព័ត៌មានអាមេរិកជាច្រើនផ្សាយថា លោក ត្រាំ ផ្ដល់តំណែងរដ្ឋមន្ត្រីក្រសួងលំនៅដ្ឋាន និងការអភិវឌ្ឍនគរូបនីយកម្ម សម្រាប់លោក Ben Carson ។ នៅមុននេះ លោក Ben Carson ធ្លាប់បដិសេធទទួលយកតួនាទីក្នុងរដ្ឋាភិបាលថ្មីម្ដងហើយ តែលោកប្រហែលជាបានប្ដូរគំនិតវិញ ក្រោយជួបលោក ត្រាំ ។
ដោយឡែកតំណែងសំខាន់ពីរទៀត គឺរដ្ឋមន្ត្រីការបរទេសនិងរដ្ឋមន្ត្រីការពារជាតិ លោក ដូណាល់ ត្រាំ នៅមិនទាន់សំឡឹងឃើញបេក្ខជនដែលសក្ដិសមនៅឡើយ។ សម្រាប់តួនាទីប្រមុខការទូត គេឃើញមានបេក្ខជនជាច្រើនដែលនឹងកាន់តួនាទីនេះដូចជា អតីតអភិបាលក្រុង New York លោក Rudy Giuliani និងអតីតប្រធានរដ្ឋសភាលោក Newt Gingrich ជាដើម។ នៅចុងក្រោយនេះ អតីតបេក្ខជនប្រធានាធិបតី លោក Mitt Romney ក៏ក្លាយជាបេក្ខជននាំមុខដែលអាចក្លាយជារដ្ឋមន្ត្រីការបរទេសពេលខាងមុខ។ ឯលោកឧត្តមសេនីយ៍ James Mattis វិញ ទំនងក្លាយជាប្រមុខការពារជាតិថ្មីផងដែរ៕
Tag:
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com