គ.ជ.ប រើទីតាំងពីក្រសួងមហាផ្ទៃ នៅដើមឆ្នាំក្រោយ

ជាតិ

គ.ជ.ប រើទីតាំងពីក្រសួងមហាផ្ទៃ នៅដើមឆ្នាំក្រោយ

20, Dec 2016 , 2:38 pm

រូបភាព

ដោយ:

ភ្នំពេញ៖ គណៈកម្មាធិការជាតិរៀបចំការបោះឆ្នោត(គ.ជ.ប) នឹងរើការិយាល័យចាស់ដែលស្ថិត នៅក្នុងក្រសួងមហាផ្ទៃទៅទីតាំងថ្មីដែលមានអគារកម្ពស់ ១២ជាន់ ទល់មុខវិទ្យាស្ថានពុទ្ធសាសនបណ្ឌិត្យ នៅខែមីនា ឆ្នាំ២០១៧ ខាងមុខ។ នេះបើតាមអ្នកនាំពាក្យ គ.ជ.ប។

លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត ឲ្យសារព័ត៌មានថ្មីៗដឹងថា អគារ គ.ជ.ប ថ្មីកម្ពស់ ១២ ជាន់ នឹងបញ្ចប់រួចរាល់នៅដើមឆ្នាំក្រោយនេះ ហើយស្ថាប័នដែលដើរតួនាទីជាអាជ្ញាកណ្តាលក្នុងការរៀបចំការបោះឆ្នោតមួយនេះ នឹងរើទីតាំងពីក្នុងបរិវេណក្រសួងមហាផ្ទៃទៅការិយាល័យថ្មី នៅទល់មុខពុទ្ធសាសនបណ្ឌិត្យ ក្នុងមីនា ឆ្នាំ ក្រោយតែម្តង។

អតីតនាយកប្រតិបតិ្តនៃអង្គការឃ្លាំមើលការបោះឆ្នោត ឬនិចហ្វិករូបនេះ ឆ្លៀតឆ្លើយប្រាប់សារព័ត៌មានថ្មីៗ ពេលគ.ជ.ប ទទួលជំនួយសម្ភារសម្រាប់បម្រើឲ្យការបោះឆ្នោតឆ្នាំ ២០១៧ និង២០១៨ នៅថ្ងៃទី២០ ខែធ្នូ ឆ្នាំ២០១៦នេះ ពីរដ្ឋាភិបាលចិន ក្នុងបរិវេណឃ្លាំងសម្ភារគ.ជ.ប ដែលស្ថិតក្នុងសង្កាត់គីឡូម៉ែត្រលេខ ៦ ខណ្ឌឫស្សីកែវ។ «យើងគ្រោងប្តូរទៅទីតាំងថ្មី នៅខែមីនា ខាងមុខ ក្រោយការសាងសង់រួចរាល់»។ លោក ហង្ស ពុទ្ធា បញ្ជាក់មុនបន្ថែមថា ទីតាំងថ្មីមានការិយាល័យទូលាយជាងមុន។

លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត ធ្លាប់ប្រាប់សារព័ត៌មានភ្នំពេញប៉ុស្តិ៍ថា អគាររបស់គ.ជ.ប ថ្មី កម្ពស់ ១២ ជាន់នេះ ចំណាយទឹកប្រាក់ ១២ លានដុល្លារ។ ថវិកា ដែលសាងសង់អគារនេះ បានមកពីថ្លៃជួលដីរដ្ឋឲ្យម្ចាស់សណ្ឋាគារ និងកាស៊ីណូ Naga World រយៈពេល ៩៩ ឆ្នាំ ដែលមានតម្លៃជាង ១៣ លានដុល្លារ។ ទឹកប្រាក់ដែលនៅសល់ជាង ១ លានដុល្លារ គ.ជ.ប បង្វិលទៅឲ្យរដ្ឋាភិបាលវិញ។ នេះបើតាមលោក ទេព នីថា ដែលបានថ្លែងប្រាប់កាសែតភ្នំពេញប៉ុស្តិ៍កាលពីពេលកន្លងទៅ។