លោក ស៊ុន ចាន់ថុល ព្រមានដាក់ពិន័យអ្នកបើករថយន្តដឹកកម្មករ ដែលគ្មានប័ណ្ណបើកបរ

ជាតិ

លោក ស៊ុន ចាន់ថុល ព្រមានដាក់ពិន័យអ្នកបើករថយន្តដឹកកម្មករ ដែលគ្មានប័ណ្ណបើកបរ

21, Dec 2016 , 1:46 pm

រូបភាព

រូបលោក ស៊ុន ចាន់ថុល ពេលទៅចូលរួមសន្និបាតបញ្ញវន្តពិភពលោកនៅរាជធានីភ្នំពេញ កាលពីខែមករា ឆ្នាំ ២០១៦

ដោយ: ធឿន បញ្ញាឬទិ្ធ

ភ្នំពេញ៖ ក្រសួងសាធារណៈការនិងដឹកជញ្ជូន ប្រកាសមិនអនុញ្ញាតឲ្យអ្នកបើករថយន្តដឹកកម្មករ ដែលគ្មានប័ណ្ណបើកបរ អាចបន្តការងារដឹកជញ្ជូនកម្មករឡើយ នៅឆ្នាំ២០១៧ខាងមុខនេះ។

រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានបញ្ជាក់ថា ក្រសួងបានសហការរួមគ្នាជាមួយក្រសួងមហាផ្ទៃ ,ក្រសួងការងារ និងបណ្ដុះបណ្ដាលវិជ្ជាជីវៈ ដើម្បីត្រួតពិនិត្យនិងពង្រឹងការអនុវត្ដច្បាប់ចរាចរណ៍ឲ្យបានម៉ឺងម៉ាត់ ចំពោះអ្នកបើករថយន្តដឹកកម្មករដែលគ្មានប័ណ្ណបើកបរនេះ ដើម្បីចៀសវាងការបង្កគ្រោះថ្នាក់ចរាចរណ៍។

បើតាមទីភ្នាក់ងារសារព័ត៌មានជាតិកម្ពុជា ដែលបានស្រង់សម្ដីលោក ស៊ុន ចាន់ថុល នោះបានបញ្ជាក់ដូច្នេះថា៖« គ្រោះថ្នាក់ចរាចរណ៍ចំពោះកម្មករកន្លងមក ដោយសារតែអ្នកបើកបរមិនគោរពច្បាប់ ការយល់ដឹងតិចតួច និងមិនមានប័ណ្ណបើកបរស្របតាមប្រភេទយានយន្ដ ពិសេសមធ្យោបាយដឹកជញ្ជូនកម្មករ កម្មការិនី ប្រើប្រាស់ប្រភេទរថយន្ដដឹកទំនិញ ចាស់ទ្រុឌទ្រោម និងមិនបានត្រួត ពិនិត្យលក្ខណៈបច្ចេកទេសយានយន្ដឲ្យបានត្រឹមត្រូវ។ក្នុងករណីអ្នកបើករថយន្តដឹកកម្មករ ដែលគ្មានប័ណ្ណបើកបរ សមត្ថកិច្ចនគរបាលចរាចរណ៍ នឹងចាប់ផ្ដើមអនុវត្ដន៍ និងត្រូវប្រឈមមុខក្នុងការដាក់ពិន័យ ឬទទួលទោសទណ្ឌយ៉ាងធ្ងន់ធ្ងរ ទៅតាមច្បាប់ស្ដីពីចរាចរណ៍ផ្លូវគោក»។

បន្ថែមពីលើនេះក្រសួងសាធារណការ និងដឹកជញ្ជូន ក៏បានសហការជាមួយសមាគមរោងចក្រកាត់ដេរកម្ពុជា ដើម្បីជួយសម្របសម្រួលដល់ម្ចាស់រថយន្តនិងកម្មករ បញ្ចៀសការជិះបញ្ជ្រៀតគ្នាដោយគ្មានរបៀបរៀបរយ ដែលអាចបង្កឲ្យមានគ្រោះថ្នាក់ចរាចរណ៍ផងដែរ។

អគ្គស្នងការរងនគរបាលជាតិលោក ហ៊ឹម យ៉ាន បាននិយាយថា អ្នកបើករថយន្តដឹកកម្មករ ឬយានយន្ដដែលគ្មានប័ណ្ណបើកបរ នឹងត្រូវឃាត់ខ្លួនបញ្ជូនទៅតុលាការ ដោយអនុវត្តច្បាប់ឃុំខ្លួនចាប់ពី៦ថ្ងៃ រហូតដល់១ខែ និងពិន័យជាប្រាក់ទៀតផង។

កន្លងមកគណៈកម្មការចរាចរណ៍ផ្លូវគោកអន្ដរក្រសួង បានចុះបង្រៀនដល់អ្នកបើករថយន្តដឹកកម្មករនៅតាមរោងចក្រផ្ទាល់ ដើម្បីឲ្យពួកគេប្រឡងយកប័ណ្ណបើកបរ បានចំនួន៧៨ ភាគរយ ពោលគឺនៅសល់តែ២២ភាគរយទៀត ដែលត្រូវប្រឡងយកប័ណ្ណបើកបរបញ្ចប់ នៅដើមឆ្នាំ២០១៧នេះ៕