ជាតិ
ស្ថានីយ៍បណ្តុះកូនឈើ៨ហិកតាកន្លែងបណ្តុះពូជឈើប្រណិតៗនៅកម្ពុជា
×
សៀមរាប៖ ស្ថានីយ៍បណ្តុះកូនឈើ៨ហិកតា គឺជាកន្លែងមួយក្នុងចំណោមទីតាំង៤ទៀត ដែលស្ថិតក្រោមការគ្រប់គ្រងរបស់នាយកដ្ឋានគ្រប់គ្រងព្រៃឈើនៃអាជ្ញាធរជាតិអប្សរា។ ស្ថានីយ៍នេះមានផ្ទៃដី៨ហិកតា សម្រាប់បណ្តុះពូជឈើប្រណិតៗដែលមាននៅក្នុងប្រទេសកម្ពុជា។
លោក និន ចាន់សាមៀន ប្រធាននាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរា បានឲ្យដឹងថា ស្ថានីយ៍បណ្តុះកូនឈើ៨ហិកតា ត្រូវបានបង្កើតឡើងនៅឆ្នាំ២០០៨ ក្រោយទីតាំងនេះគ្រប់គ្រងដោយនាយកដ្ឋានគ្រប់គ្រងទឹក។ នៅក្នុងស្ថានីយ៍នេះ មានបណ្តុះពូជឈើប្រណិតៗរួមមាន គ្រញូង បេង នាងនួន ឆ្នង់ ច្រេះ ជើងចាប ។ល។ ដែលសរុបទាំងអស់មានប្រមាណ១០ប្រភេទ។
តាមលោក និន ចាន់សាមៀនដដែល ក្នុងមួយឆ្នាំៗសួនបណ្តុះកូនឈើ៨ហិកតា បានបណ្តុះកូនឈើប្រណិតចំនួន ២ម៉ឺនកូន ហើយនៅឆ្នាំនេះបានបង្កើនបរិមាណដល់ទៅ ២៥០០០កូន។ គោលដៅចំណងសម្រាប់ការបណ្តុះ គឺផ្តោតលើការដាំឡើងវិញនៅលើផ្ទៃដីក្នុងឧទ្យានអង្គរ។ នេះបើតាមការបញ្ជាក់របស់លោក ចាន់សាមៀន។
យ៉ាងណាក៏ដោយ គោលបំណងខាងលើក៏មានការប្រែប្រួលដែរ ដោយក្នុងនោះទាំងរដ្ឋបាលព្រៃឈើខេត្តសៀមរាប អង្គការ និងស្ថាប័នមួយចំនួន តែងសុំកូនឈើទៅដាំនៅកន្លែងផ្សេងៗទៀតក្រៅពីតំបន់អង្គរផងដែរ។ លោក ចាន់សាមៀនបន្ថែម។
នាយកដ្ឋានព្រៃឈើរបស់អាជ្ញាធរជាតិអប្សរា មានស្ថានីយ៍បណ្តុះកូនឈើចំនួន៤ទីតាំងផ្សេងៗគ្នា។ ទីមួយ ស្ថានីយ៍បណ្តុះកូនឈើប្រាសាទតាកែវ ដែលបណ្តុះពូជឈើលេខ១ និងលេខ២ មានគគីរ កកោះ។ល។ ទីពីរ ស្ថានីយ៍បណ្តុះកូនឈើមណ្ឌលបី ដែលបណ្តុះពូជកូនឈើហូបផ្លែ។ ទីបី ស្ថានីយ៍បណ្តុះកូនឈើ៨ហិកតា ដែលបណ្តុះពូជឈើប្រណិត។ និងទីបួន ស្ថានីយ៍សួនគ្រឿងទេស ដែលអភិរក្សគ្រឿងទេសសរុបទាំងអស់មានចំនួន ៧៣ប្រភេទ ហើយស្ថានីយ៍នេះពុំមានការចែកចាយកូនសម្រាប់ដាំនៅកន្លែងផ្សេងទៀតនោះទេ។
គួរបញ្ជាក់ថា ស្ថានីយ៍ចំនួន៣របស់នាយកដ្ឋានព្រៃឈើដោយមិនរាប់បញ្ចូលសួនគ្រឿងទេសច បានបណ្តុះកូនឈើចំនួន ៧០ពាន់ដើមជារៀងរាល់ឆ្នាំ។ ហើយកូនឈើទាំងអស់ ត្រូវមានអាយុកាលចំនួន ២ឆ្នាំទើបអាចយកទៅដាំបាន៕
Tag:
ព្រៃឈើ
និន ចាន់សាមៀន
អាជ្ញាធរជាតិអប្សរា
© រក្សាសិទ្ធិដោយ thmeythmey.com