ជាតិ
យុទ្ធនាការប្រឆាំងគ្រឿងញៀនខុសច្បាប់ទ្រង់ទ្រាយធំ ចាប់ផ្តើមនៅដើមឆ្នាំ២០១៧
×
ភ្នំពេញ៖ ប្រធានអាជ្ញាធរជាតិប្រយុទ្ធប្រឆាំងគ្រឿងញៀន លោក កែ គឹមយ៉ាន បានបង្ហើបឲ្យដឹងថា សមត្ថកិច្ចត្រៀមចាប់ខ្លួនអ្នកប្រើប្រាស់គ្រឿងញៀនជាង៥ពាន់នាក់ នៅទូទាំងប្រទេស ដើម្បីនាំខ្លួនពួកគេចូលមណ្ឌលកែប្រែបន្សាបសារធាតុញៀន។
ថ្លែងក្នុងពិធីប្រជុំផ្សព្វផ្សាយផែនការស្តីពី យុទ្ធនាការប្រយុទ្ធប្រឆាំងគ្រឿងញៀនខុសច្បាប់ នៅព្រឹកថ្ងៃទី២២ ធ្នូ នេះ លោក កែ គឹមយ៉ាន បាននិយាយថា អ្នកប្រើប្រាស់គ្រឿងញៀនជាង៥ពាន់នាក់នេះ ត្រូវបានសមត្ថកិច្ចកំណត់មុខសញ្ញារួចរាល់ហើយ ដោយក្នុងនោះមានអ្នកកំពុងប្រើប្រាស់សារធាតុញៀនជាង៣ពាន់ នៅក្នុងរាជធានីភ្នំពេញ ។
បើតាមលោក កែ គឹមយ៉ាន ក្រសួងមហាផ្ទៃ និងអាជ្ញាធរជាតិប្រយុទ្ធប្រឆាំងគ្រឿងញៀននឹងបើកយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទីមួយនេះ រយៈពេល៦ ខែ ចាប់ពីថ្ងៃទី១ ខែមករា ដល់ថ្ងៃទី៣០ ខែមិថុនា ឆ្នាំ២០១៧ នៅទូទាំងប្រទេស។
សម្តេចនាយករដ្ឋមន្ត្រី ហ៊ុន សែន បានចេញផែនប្រឆាំងគ្រឿងញៀនលើកទីមួយ ដោយសម្តេច ស ខេង រដ្ឋមន្ត្រីក្រសួងមហាផ្ទៃ ជាប្រធានដឹកនាំផ្ទាល់និងលោក កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនជាអនុប្រធាន។ នេះបើតាមផែនការរដ្ឋាភិបាលចុះថ្ងៃទី១៣ ធ្នូនេះ។
គួរបញ្ជាក់ថា នៅឆ្នាំ២០១៦នេះ សមត្ថកិច្ចបង្ក្រាបបានបទល្មើសគ្រឿងញៀន ៤,១៩១ ករណី ក្នុងនោះបទល្មើសប្រើប្រាស់គ្រឿងញៀនជាង១ពាន់ករណី។ ចាប់ខ្លួនជនសង្ស័យសរុប៩,៨០២ នាក់ ក្នុងនោះអ្នកប្រើប្រាស់មានគ្រឿងញៀន ៣,៦១១នាក់ និងរឹបអូសគ្រឿងញៀនជាង១៧៥គីឡូក្រាម។ បើតាមអាជ្ញាធរជាតិប្រយុទ្ធប្រឆាំងគ្រឿងញៀន តួលេខនៃការសម្រង់អ្នកប្រើប្រាស់គ្រឿងញៀន មានចំនួន១៨,៥៥៤នាក់ កើនឡើង៤,២៤២នាក់ ស្មើនឹង២៩,៦៣ភាគរយ ធៀបនឹងពេលមុន៕
Tag:
កែ គឹមយ៉ាន
ស ខេង
គ្រឿងញៀន
© រក្សាសិទ្ធិដោយ thmeythmey.com