ជាតិ
នយោបាយជាតិ
ករណីលោក កែម ឡី៖សម្ដេច ហេង សំរិន បដិសេធសំណើលោក អេង ឆៃអ៊ាង ដែលកោះហៅសម្ដេច ស ខេង
×
ភ្នំពេញ៖ ប្រធានរដ្ឋសភាសម្ដេច ហេង សំរិន បានច្រានចោលសំណើប្រធានគណៈកម្មការទី១រដ្ឋសភាលោក អេង ឆៃអ៊ាង ដែលកោះហៅរដ្ឋមន្ត្រីក្រសួងមហាផ្ទៃសម្ដេច ស ខេង មកសាកសួរព័ត៌មានបន្ថែមជុំវិញករណីឃាតកម្មលោក កែម ឡី។
តាមរយៈលិខិតរបស់អ្នកនាំពាក្យរដ្ឋសភា ចុះថ្ងៃទី២២ ធ្នូនេះ បានបញ្ជាក់ថា៖«សម្ដេច ហេង សំរិន ប្រធានរដ្ឋសភា បានសម្រេចមិនបញ្ជូនលិខិតនេះទៅរាជរដ្ឋាភិបាលដើម្បីអញ្ជើញ សម្តេចក្រឡាហោម មកបំភ្លឺទេ ដោយហេតុថា ករណី លោក កែម ឡី នេះបានធ្លាក់ទៅក្នុងសមត្ថកិច្ចរបស់តុលាការតាំងពីដំណាក់កាលដំបូង និងតាំងពីយូរមកហើយ។ ហើយទាំងរដ្ឋសភា និងទាំងរាជរដ្ឋាភិបាល សុទ្ធតែពុំមានសិទ្ធិអ្វីជ្រៀតជ្រែកចូលកិច្ចការរបស់តុលាការឡើយ»។
ទាក់ទងនឹងការលើកឡើងរបស់ប្រធានរដ្ឋសភានេះ លោក អេង ឆៃអ៊ាង មិនអាចទទួលយកហេតុផលខាងលើនេះបានឡើយ។ លោកថា ការបកស្រាយរបស់ប្រធានរដ្ឋសភានេះ ហាក់ដូចជាផ្ទុយពីតួនាទីគណៈកម្មការរដ្ឋសភា ដែលត្រូវមានភារកិច្ចសួរនាំនីតិប្រតិបត្តិ។ ថ្លែងប្រាប់សារព័ត៌មានថ្មីៗ ប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេតនិងទំនាក់ទំនងរដ្ឋសភា ព្រឹទ្ធសភារូបនេះ បានបញ្ជាក់ដូច្នេះថា៖«ខ្ញុំមានការភ្ញាក់ផ្អើលដែរ។ ខ្ញុំឆ្ងល់ថា តើអគ្គលេខារដ្ឋសភា គាត់បកស្រាយតាមមាត្រាច្បាប់ ឫបញ្ញត្តិណា ដែលមិនឲ្យគណៈកម្មការរដ្ឋសភាកោះហៅរដ្ឋមន្ត្រីមកបកស្រាយ គ្រាន់តែសំណុំរឿងបញ្ជូនទៅតុលាការ។ ព្រោះរដ្ឋសភា គឺជាអ្នកចាំសាកសួរដេញដោល។ ហើយអ្វីដែលខ្ញុំមិនយល់នោះ រដ្ឋសភាបែជាមកឆ្លើយបដិសេធការកោះហៅសម្ដេចក្រឡាហោម ជំនួសនីតិប្រតិបត្តិ ឫនាយករដ្ឋមន្ត្រីទៅវិញ»។
ប៉ុន្តែបើទោះជាមិនអាចកោះហៅរដ្ឋមន្ត្រីក្រសួងមហាផ្ទៃមកសាកសួរក្តី ក៏លោក អេង ឆៃអ៊ាង មិនបញ្ឈប់ការរកយុត្តិធម៌ជូនលោក កែម ឡី ឡើយ។ បើតាមលោក ឆៃអ៊ាង លោកនឹងកោះហៅរដ្ឋមន្ត្រីពាក់ព័ន្ធផ្សេងទៀតមកសួរនាំករណីឃាតកម្មលោក កែម ឡី នេះ។
អ្នកស្រាវជ្រាវ និងជាអ្នវិភាគ លោក កែម ឡី ត្រូវបានឃាតករបាញ់សម្លាប់កាលពីថ្ងៃទី១០ កក្កដា ឆ្នាំ២០១៦ នៅក្នុងស្តាម៉ាតមួយ នាស្ថានីយ៍សាំងកាល់តិច Caltex ក្បែរស្តុបបូកគោ ក្នុងរាជធានីភ្នំពេញ ។ ភ្លាមៗក្រោយឃាតកម្មទៅលើលោក កែម ឡី សមត្ថកិច្ចបានចាប់ខ្លួនឃាតករ ដែលបានអះអាងថាឈ្មោះ ជួប សម្លាប់។ ប៉ុន្តែ ជាង៥ខែហើយ ដែលគ្រួសារសពលោក កែម ឡី នៅតែទាមទាឲ្យសមត្ថកិច្ចជួយរកយុត្តិធម៌ជូន លោក កែម ឡី ព្រមទាំងបញ្ចេញវីដេអូពីកាមេរ៉ាសន្តិសុខរបស់ហាងសាំងកាល់តិចនោះផង ៕
Tag:
កែម ឡី
ហេង សំរិន
ស ខេង
អេង ឆៃអ៊ាង
© រក្សាសិទ្ធិដោយ thmeythmey.com