កម្ពុជាធ្វើជាម្ចាស់ផ្ទះលើកទី២រៀបចំព្រឹត្តិការណ៍សម្តែងសិល្បៈរួមអាស៊ាន-ចិន

ជាតិ

កម្ពុជាធ្វើជាម្ចាស់ផ្ទះលើកទី២រៀបចំព្រឹត្តិការណ៍សម្តែងសិល្បៈរួមអាស៊ាន-ចិន

27, Dec 2016 , 8:59 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ សិក្ខាសាលាស្តីពីការសម្តែងសិល្បៈរួមអាស៊ាន-ចិន ត្រូវបានធ្វើឡើងមុនមួយថ្ងៃ នៃការចាប់ផ្តើមព្រឹត្តិការណ៍សម្តែងរួមដ៏ធំមួយ ដែលគ្រោងធ្វើឡើងនៅបរិវេណប្រាសាទបាយ័ន។ ព្រឹត្តិការណ៍ដ៏ធំនេះ គឺមានការចូលរួមពីសិល្បករ សិល្បការិនី ក្នុងប្រទេសអាស៊ាន-ចិន ដែលនឹងមកសម្តែងរួមគ្នាបង្កើតជាផ្ទាំងទស្សនីយភាពដ៏អស្ចារ្យ ដែលគេរំពឹងថានឹងមានការផ្សព្វផ្សាយពីប្រទេសកម្ពុជាកាន់តែច្រើននៅទូទាំងសកលលោក។

សិក្ខាសាលាដែលមានការចូលរួមពីសិល្បករ សិល្បការិនី ប្រទេសអាស៊ាន-ចិន ត្រូវបានរៀបចំឡើងនៅសណ្ឋាគារសុខាអង្គរ នាព្រឹកថ្ងៃទី២៧ ខែធ្នូ ឆ្នាំ២០១៦។ នៅទីនោះ ពួកគេនឹងជជែកពិភាក្សាគ្នាលើការងារមួយចំនួនដែលទាក់ទងនឹងវិស័យវប្បធម៌ សិល្បៈ ក៏ដូចជាហាត់សមសម្តែងរួមគ្នាលើទម្រង់សិល្បៈមួយចំនួន។

លោកស្រី សឿង រដ្ឋចាវី រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ដែលបានចូលរួមក្នុងពិធីបើកសិក្ខាសាលានៅពេលនោះបានលើកឡើងថា ព្រឹត្តិការណ៍សម្តែងសិល្បៈរួមអាស៊ាន-ចិន ក្រោមប្រធានបទ «ករតភា្ជប់ក្នុងភាពចម្រុះគ្នា» គឺមានភាពពិសេស ដោយសារមានការគាំទ្រពីថ្នាក់ដឹកនាំកំពូលប្រទេសអាស៊ាន-ចិន។ លោកស្រីបន្តថា ព្រឹត្តិការណ៍នេះផ្តល់សារប្រយោជន៍ច្រើនក្នុងការបង្កើនទំនាក់ទំនងយុវជនចិន-អាស៊ាន ហើយវានឹងផ្តល់ឳកាសឲ្យអ្នកសិល្បៈទាំងអស់ ចូលរួមពិភាក្សា ស្វែងយល់ពីគ្នា រៀនពីគ្នា បង្កើតមិត្តភាព យោគជ័យ និងស្វែងយល់ពីវប្បធម៌ពីគ្នាទៅវិញទៅមក។

លោកស្រី សឿង រដ្ឋចាវី បានសង្កត់ទៀតថា៖« សារសំខាន់ជាងគេគឺកម្ពុជា។ ក្រៅពីផ្សព្វផ្សាយពីវិស័យវប្បធម៌ ទេសចរណ៍ ជាពិសេសនោះផ្នែកនយោបាយ ក្នុងន័យថាកម្ពុជាកំពុងជួយជំរុញពង្រឹងទំនាក់ទំនងកម្ពុជា-ចិន និងអាស៊ាន-ចិន កម្ពុជាចំណេញទាំងផ្នែកនយោបាយ និងសេដ្ឋកិច្ច»។

អគ្គនាយកបច្ចេកទេសវប្បធម៌នៃក្រសួងវប្បធម៌ និងវិចិត្រសិល្បៈ លោក ហាប់ ទូច បានឲ្យដឹងដែរថា ក្រសួងវប្បធម៌ពិតជាមានចិត្តសប្បាយរីករាយណាស់ ដែលបានឃើញការសម្តែងរួមគ្នារបស់សិល្បករ សិល្បការិនីចម្រុះ។ លោកបន្ថែមថា វាជាឳកាសដើម្បីពង្រឹងវិស័យវប្បធម៌ ហើយមានឳកាសបង្ហាញជូនសាធារណជនឲ្យបានឃើញសិល្បៈចម្រុះនេះនៅលើទឹកដីដ៏អច្ឆរិយៈរបស់ខ្មែរ។

តាមការបញ្ជាក់របស់លោក ហាប់ ទូច ក្នុងការសម្តែងរួមគ្នាដែលគ្រោងធ្វើនៅយប់ថ្ងៃទី២៨ ធ្នូ នៅប្រាសាទបាយ័ន កម្ពុជាក៏មានឆាកដ៏អស្ចារ្យដើម្បីយកមកសម្តែងផងដែរ ក្នុងនោះមានរបាំកូរសមុទ្រទឹកដោះ ដែលរបាំនេះមានអត្ថន័យធំធេងក្នុងវប្បធម៌ និងសង្គមរស់នៅនាពេលបច្ចុប្បន្ន។

គួររម្លឹកថា ការព្រឹត្តិការណ៍សម្តែងសិល្បៈរួមអាស៊ាន-ចិនដែលធ្វើនៅពេលនេះ គឺជាលើកទី២ហើយ ហើយកម្ពុជាបានទទួលធ្វើជាម្ចាស់ផ្ទះទាំង២លើក។ លើកទី១ ត្រូវបានធ្វើឡើងអំឡុងឆ្នាំ២០០៦ ដើម្បីអបអរខួបលើកទី១៦ នៃទំនាក់ទំនងអាស៊ាន-ចិន ហើយទទួលបានជោគជ័យលើសពីការរំពឹងទុក។ ភាពខុសគ្នាជាមួយព្រឹត្តិការណ៍លើកទី២ គឺថាលើកទី១ វាគ្រាន់តែជាការសម្តែងសិល្បៈរួមគ្នាតែប៉ុណ្ណោះ ដោយពុំមានសិក្ខាសាលាដូចដែលបានរៀបចំនៅពេលនេះនោះទេ។ ព្រឹត្តិការណ៍នេះត្រូវបានបង្កើតឡើងដោយគំនិតផ្តួចផ្តើមរបស់សម្តេច ហ៊ុន សែន ដើម្បីប្រារព្ធខួបអនុស្សាវរីយ៍លើកទី២៥ នៃកិច្ចសន្ទនាដៃគូ អាស៊ាន-ចិន និងទទួលបានការគាំទ្រពីថ្នាក់ដឹកនាំកំពូលបណ្តាប្រទេសជាសមាជិក៕