ជាតិ
គ.ជ.ប ប្រកាសថា ឈ្មោះពលរដ្ឋខុសជាង២៣ម៉ឺននាក់ ក្នុងបញ្ជីបោះឆ្នោត
× ភ្នំពេញ៖ គណៈកម្មាធិការជាតិរៀបចំការបោះឆ្នោត (គជប) ពិនិត្យឃើញថា ឈ្មោះប្រជាពលរដ្ឋខុសជាង២៣ម៉ឺននាក់ ក្នុងបញ្ជីឈ្មោះបោះឆ្នោត ដែលគជប នឹងពិចារណាលុបចេញ។
ថ្លែងក្នុងសន្និសីទកាសែតថ្ងៃទី២៨ ធ្នូនេះ អគ្គលេខាធិការគ.ជ.ប លោក ទេព នីថា បានបញ្ជាក់ថា ក្រោយពីពិនិត្យបញ្ជីឈ្មោះបោះឆ្នោតរួចមក គ.ជ.ប ឃើញមានឈ្មោះខុសជាង២៣ម៉ឺននាក់ ដោយក្នុងនោះឈ្មោះស្ទួនជិត២ម៉ឺននាក់ និងឈ្មោះខុសប្រក្រតី ដែលត្រូវលុបចេញចំនួន៨ពាន់នាក់។ បើតាមលោក ទេព នីថា គ.ជ.ប នឹងពិភាក្សាគ្នាម្ដងទៀត នៅថ្ងៃទី៣០ធ្នូ មុននឹងសម្រេចថា តើគួរតែលុបឈ្មោះទាំងនេះចេញពីបញ្ជីឈ្មោះបោះឆ្នោត ឬយ៉ាងណា?
លោក ទេព នីថា និយាយថា គ.ជ.ប បានពិនិត្យឃើញឈ្មោះ និងអត្តញ្ញាណដែលស្ថិតក្នុងទិន្នន័យដែលបញ្ជូនមក គ.ជ.ប ជាង ២០ម៉ឺននាក់នោះ មាន ខុសឈ្មោះ ខុសថ្ងៃខែឆ្នាំកំណើត ខុសស្នាមផ្តិតមេដៃ ខុសអត្តសញ្ញាណបណ្ណ ពេលចុះឈ្មោះក្នុងបញ្ជីបោះឆ្នោត។ គ.ជ.ប ចាត់ទុកករណីខុសឈ្មោះនិងឈ្មោះស្ទួននេះ អាចមកពីបញ្ហាបច្ចេកទេស និងភាពខ្វះចន្លោះរបស់មន្ត្រីបច្ចេកទេស គ.ជ.ប។
គ.ជ.ប នឹងបិទផ្សាយឈ្មោះពលរដ្ឋដែលបានចុះឈ្មោះរួច នៅតាមការិយាល័យចុះឈ្មោះកន្លងមក នៅថ្ងៃទី៣ ដល់១៤ មករា ដើម្បីឲ្យពួកគេត្រួតពិនិត្យឈ្មោះរៀងខ្លួនៗ។ ហើយពួកគេអាចដាក់ពាក្យមក គ.ជ.ប ឲ្យកែតម្រូវបាន បើសិនជាពួកគេរកឃើញភាពមិនត្រឹមត្រូវនៃឈ្មោះខ្លួន។
សូមបញ្ជាក់ថា ក្រោយបញ្ចប់ការចុះឈ្មោះបោះឆ្នោតថ្មី មានប្រជាពលរដ្ឋខ្មែរ ចំនួន ៧,៨៧៣,១៩៤ ស្នើនឹង៨១ភាគរយ បានទៅចុះឈ្មោះបោះឆ្នោត ក្នុងចំណោមប្រជាពលរដ្ឋដែលមានអាយុគ្រប់បោះឆ្នោតចំនួន ៩,៦៦៤,២១៦ លាននាក់។ ចំនួនដែលចុះឈ្មោះបានក្នុងបញ្ជីថ្មីនេះ ថយចុះជិត ២លាននាក់ ធៀបទៅនឹង ៩លាន ២ សែននាក់ដែល គ.ជ.ប បានចុះឈ្មោះសម្រាប់ការបោះឆ្នោតជ្រើសរើសក្រុមប្រឹក្សា ឃុំ-សង្កាត់ កាលពីឆ្នាំ២០១២ ។
ពាក់ព័ន្ធនឹងបញ្ហានេះសមាជិកគណៈកម្មាធិការរៀបចំការបោះឆ្នោត គជប ធ្លាប់បានបញ្ជាក់ថា មូលហេតុដែលពលរដ្ឋចុះឈ្មោះមិនគ្រប់ចំនួនតាមការប៉ាន់ស្មានស្ថិតិនោះ បណ្ដាលមកពី ពលរដ្ឋដែលចំណាកស្រុកបម្រើការងារនៅក្រៅប្រទេសទាំងស្របច្បាប់ និងខុសច្បាប់នោះមានចំនូនជាង១លាននាក់។ ចំណែកពលរដ្ឋពលរដ្ឋមិនអាចទៅចុះឈ្មោះបាននោះ មកពី កំពុងស្ថិតនៅក្នុងស្ថានភាពជាប់ពន្ធនាគារ កំពុងសម្រាកព្យាបាលជំងឺនៅតាមមន្ទីពេទ្យ ជនចាស់ជរា ឬជនពិការ ដែលពិបាកធ្វើដំណើរការ និងករណីទទួលមរណភាពជាដើម។ បើតាមលោក សូ សុផាត ពលរដ្ឋដែលមានសិទ្ធិបោះឆ្នោតមួយចំនួន ក៏ពុំសូវយកចិត្តទុកដាក់ក្នុងការចុះឈ្មោះបោះឆ្នោត បើទោះជាមានការជំរុញ និងបង្កលក្ខណៈងាយស្រួលយ៉ាងណាក៏ដោយ។ តែយ៉ាងណាសមាជិក គ.ជ.ប រូបនេះ ចាត់ទុកការចុះឈ្មោះបោះឆ្នោតថ្មី ប្រព្រឹត្តិទៅដោយសុវត្ថិភាព និងលទ្ធផលល្អ៕
Tag:
ទេព នីថា
គជប
ពលរដ្ឋ
© រក្សាសិទ្ធិដោយ thmeythmey.com