លោក ខៀវ កាញារីទ្ធ កុំឲ្យបារម្ភពីឥទ្ធិពលរដ្ឋាភិបាល ពេលសម្តេចជួបអ្នកកាសែត

ជាតិ

នយោបាយជាតិ

លោក ខៀវ កាញារីទ្ធ កុំឲ្យបារម្ភពីឥទ្ធិពលរដ្ឋាភិបាល ពេលសម្តេចជួបអ្នកកាសែត

28, Dec 2016 , 6:13 pm

រូបភាព

ដោយ:

សម្តេចនាយករដ្ឋមន្ត្រី ហ៊ុន សែន នឹងជួបអ្នកកាសែតរៀងរាល់ឆ្នាំនៅថ្ងៃទី ១៤ ខែមករា ចាប់ពីឆ្នាំ ២០១៧ ទៅ ។ នេះបើតាមរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ដែលបានថ្លែងនៅក្នុងវេទិកានិពន្ធនាយកលើកទី ១៣ ដែលរៀបចំដោយក្លិបអ្នកកាសែតកម្ពុជា កាលពីថ្ងៃទី ២៦ ខែធ្នូ កន្លងទៅ។

គម្រោងរបស់សម្តេច ហ៊ុន សែន ជួបអ្នកកាសែតនៅថ្ងៃទី ១៤ ខែមករា ឆ្នាំ ២០១៧ នេះហើយ ទើបធ្វើឲ្យអ្នកមួយចំនួន បារម្ភពីឥទ្ធិពលរបស់រដ្ឋាភិបាលមកលើអ្នកកាសែតខ្មែរ ដែលលោក ខៀវ កាញារីទ្ធ យកមកបរិយាយនៅលើទំព័ហ្វេសប៊ុករបស់លោកនៅថ្ងៃទី ២៨ ខែធ្នូ។ សំណេររបស់លោករដ្ឋមន្ត្រីក្រសួងព័ត៌មាន មានខ្លឹមសារបែបនេះថា៖«នៅអាមេរិកប្រធានាធិបតីអាមេរិកមានកម្មវិធីជួបអ្នកកាសែតប្រចាំឆ្នាំ អត់មានឮអ្នកស្រែកបារម្ភអីសោះ។ ដល់នាយករដ្ឋមន្ត្រីខ្មែរទទួលយកសំណូមពរអ្នកកាសែតសូមមានកម្មវិធីដូចគ្នានេះ ស្រាប់តែមានអ្នកបារម្ភថារដ្ឋាភិបាលអាចជះឥទ្ធិពលមកលើអ្នកកាសែតស្រុកខ្មែរ»។

មិនត្រឹមតែលើកឡើងដូច្នេះទេ លោក កាញារីទ្ធ ក៏សរសេរហាក់ឌឺដងទៅអ្នកបារម្ភនោះយ៉ាងនេះទៀតថា៖« ចុះមើលងាយអ្នកកាសែតខ្មែរដល់បែបហ្នឹង? សូមអ្នកបារម្ភកុំបារម្ភអី ពួកយើងខ្ញុំមិនហ៊ានអញ្ជើញក្រុមលោកទៅទេ ព្រោះបើចៅហ្វាយនាយលោកដឹងគេច្បាស់ជាផ្តាច់លុយអត់អីចិញ្ចឹមប្រពន្ធកូនហើយ ។ យោគយល់គ្នាប៉ុណ្ណឹងគ្រប់គ្រាន់ទេ»?

ការអត្ថាធិប្បាយរបស់លោករដ្ឋមន្រ្តីក្រសួងព័ត៌មានពីចំណុចខាងលើ ធ្វើឡើងបន្ទាប់ពីវិទ្យុសំឡេងសហរដ្ឋអាមេរិក(VOA) បានចុះផ្សាយនូវអត្ថបទមួយមានចំណងជើងថា« លោក ហ៊ុន សែន ប្រកាសជួបអ្នកសារព័ត៌មាន តែអ្នកជំនាញបារម្ភថា វាអាចធ្វើឲ្យប៉ះពាល់វិជ្ជាជីវៈនេះ»។