គ.ជ.ប ត្រៀមបង្កើតក្រុមចុះឈ្មោះបោះឆ្នោតពិសេស ដើម្បីអនុវត្តសេចក្តីសម្រេចស្ថាពរ

ជាតិ

គ.ជ.ប ត្រៀមបង្កើតក្រុមចុះឈ្មោះបោះឆ្នោតពិសេស ដើម្បីអនុវត្តសេចក្តីសម្រេចស្ថាពរ

29, Dec 2016 , 8:19 pm

រូបភាព

ដោយ:

ភ្នំពេញ៖ គណៈកម្មាធិការជាតិរៀបចំការបោះឆ្នោត (គជប) ត្រៀមបង្កើតក្រុមចុះឈ្មោះបោះឆ្នោតពិសេស ក្រោយពេល គ.ជ.ប បញ្ចប់ការត្រួតពិនិត្យពាក្យបណ្តឹងជំទាស់នឹងបញ្ជីឈ្មោះបោះឆ្នោតពីថ្ងៃទី ៣ ដល់ថ្ងៃទី១៤ ខែមករា ខាងមុខ។

លោក ម៉ៅ សុភារិទ្ធ អគ្គលេខាធិការរង គ.ជ.ប និយាយថា ក្រុមចុះឈ្មោះពិសេស ត្រូវចុះអនុវត្តសេចក្តីសម្រេចស្ថាពររបស់ក្រុមប្រឹក្សាឃុំសង្កាត់ គ.ជ.ប និងក្រុមប្រឹក្សាធម្មនុញ្ញ មុនពេល គ.ជ.ប ផ្តល់សុពលភាព និងប្រកាសផ្សាយបញ្ជីបោះឆ្នោតផ្លូវការ នៅថ្ងៃទី១២ ខែកុម្ភៈ ឆ្នាំ២០១៧ ។

អគ្គលេខាធិការរង គ.ជ.ប រូបនេះ បានពន្យល់ប្រាប់សារព័ត៌មានថ្មីៗពីមូលហេតុនាំឲ្យ គ.ជ.ប បង្កើតក្រុមការងារចុះឈ្មោះពិសេសទៀត ដោយសារច្បាប់ពុំអនុញ្ញាតឲ្យក្រុមចុះឈ្មោះធម្មតា ពីមុន (ក្រុមចុះឈ្មោះបោះឆ្នោត លើកដំបូង ចាប់ពីថ្ងៃទី១ ខែកញ្ញា ដល់ខែ៣០ ខែវិច្ឆិកា) ចុះអនុវត្តសេចក្តីសម្រេចស្ថាពររបស់ក្រុមប្រឹក្សាឃុំសង្កាត់ គ.ជ.ប និងក្រុមប្រឹក្សាធម្មនុញ្ញឡើយ។

ហេតុនេះ លោកបញ្ជាក់ផ្អែកតាមច្បាប់ក្នុងកិច្ចប្រជុំត្រៀមបិទផ្សាយបញ្ជីឈ្មោះបោះឆ្នោតលើកដំបូង នៅថ្ងៃទី២៨ ធ្នូថា ពួកគេជាក្រុមការងារដែលមានសិទ្ធិចុះអនុវត្តសេចក្តីសម្រេចស្ថាពរអំពី ការលុបឈ្មោះ ឬកែតម្រូវឈ្មោះអ្នកចុះឈ្មោះបោះឆ្នោតរបស់ គ.ជ.ប តែមួយគត់។ យ៉ាងណា លោកពុំទាន់អាចបញ្ជាក់ពីចំនួនក្រុមចុះឈ្មោះពិសេសបានឡើយ ដោយសារគ.ជ.ប ពុំទាន់ដឹងពីចំនួនអ្នកប្តឹងជំទាស់ប៉ុន្មាននាក់ មុនពេលគេប្រតិបត្តិការដោះស្រាយស្ថាពរ។

សំឡេងលោក ម៉ៅ សុភារិទ្ធ ពន្យល់ក្នុងកិច្ចប្រជុំ នាទីស្នាក់ការគ.ជ.ប៖

ឱកាសនេះដែរ លោក ទេព នីថា អគ្គលេខាធិការគ.ជ.ប បានថ្លែងបញ្ជាក់ក្នុងកិច្ចប្រជុំ នៅថ្ងៃទី២៨ ធ្នូនេះថា គ.ជ.ប បានរកឃើញឈ្មោះខុសជាង ២៣ម៉ឺននាក់ ដោយក្នុងនោះឈ្មោះស្ទួនជិត២ម៉ឺននាក់ និងឈ្មោះខុសប្រក្រតី ដែលត្រូវលុបចេញចំនួន៨ពាន់នាក់ ក្រោយពីពិនិត្យបញ្ជីឈ្មោះបោះឆ្នោតរួចមក។

ជាមួយគ្នាដែរ លោក ហ៊ីង ឫទ្ធី សមាជិកគ.ជ.ប បានអានសារអំពាវនាវពលរដ្ឋឲ្យទៅពិនិត្យបញ្ជីឈ្មោះបោះឆ្នោតដែលបិទផ្សាយតាមឃុំសង្កាត់ នាពេលខាងមុខ។ ករណីខុសបញ្ជីបោះឆ្នោត ប្រធានដឹកនាំកិច្ចប្រជុំរូបនេះ បញ្ជាក់ថា អ្នកបានចុះឈ្មោះបញ្ជីឈ្មោះឆ្នោត អាច ប្តឹងជំទាស់មកពីក្រុមប្រឹក្សាឃុំសង្កាត់ គ.ជ.ប ឬក្រុមប្រឹក្សាធម្មនុញ្ញ ឲ្យពិនិត្យ និងកែតម្រូវ ទិន្នន័យបោះឆ្នោតឡើងវិញ ចាប់ពីថ្ងៃទី៣ ដល់ថ្ងៃទី ១៤ ខែមករា ខាងមុខ។

សំឡេងលោក ហ៊ីង ឫទ្ធី៖

គួរបញ្ជាក់ជូនថា ក្រោយបញ្ចប់ការចុះឈ្មោះបោះឆ្នោតថ្មី ប្រជាពលរដ្ឋខ្មែរ ចំនួន ៧,៨៧៣,១៩៤ ស្នើនឹង៨១ភាគរយ បានទៅចុះឈ្មោះបោះឆ្នោត ក្នុងចំណោមប្រជាពលរដ្ឋដែលមានអាយុគ្រប់បោះឆ្នោតចំនួន ៩,៦៦៤,២១៦ លាននាក់។ ចំនួនដែលចុះឈ្មោះបានក្នុងបញ្ជីថ្មីនេះ ថយចុះជិត ២លាននាក់ ធៀបទៅនឹង ៩លាន ២ សែននាក់ដែល គ.ជ.ប បានចុះឈ្មោះសម្រាប់ការបោះឆ្នោតជ្រើសរើសក្រុមប្រឹក្សា ឃុំ-សង្កាត់ កាលពីឆ្នាំ២០១២ ៕