ក្រសួងបរិស្ថាន គ្រោងលក់កាបូននៅព្រៃឡង់ និងភ្នំក្រវាញ

ជាតិ

ក្រសួងបរិស្ថាន គ្រោងលក់កាបូននៅព្រៃឡង់ និងភ្នំក្រវាញ

29, Dec 2016 , 11:39 pm

រូបភាព

ដោយ: ខន ចំប៉ា

ក្រសួងបរិស្ថានកំពុងចរចាលក់កាបូន នៅតំបន់ព្រៃ២កន្លែងទៀត គឺព្រៃឡង់ និងតំបន់ភ្នំក្រវាញ។ កម្ពុជាបានលក់កាបូន នៅដែនជម្រកសត្វព្រៃកែវសីមា ជាលើកដំបូងទៅឲ្យក្រុមហ៊ុន Disney កាលពីខែសីហាកន្លងទៅក្នុងតម្លៃ៣លានដុល្លារ។

សូមស្ដាប់សំឡេង៖

ក្រសួងបរិស្ថាន កំពុងចរចាលក់កាបូន នៅតំបន់ព្រៃធម្មជាតិពីរកន្លែងទៀតជាមួយវិនិយោគិនបរទេស គឺនៅតំបន់ការពារធម្មជាតិព្រៃឡង់ និងតំបន់ភ្នំក្រវាញ។ នេះជាការបញ្ជាក់របស់លោក សាយ សំអាល់ នៅក្នុងពិធីបើកសន្និបាតបូកសរុបការងារឆ្នាំ២០១៦ និងទិសដៅការងារឆ្នាំ២០១៧ កាលពីថ្ងៃទី២១ ធ្នូកន្លងទៅ។ លោករដ្ឋមន្ត្រីថ្លែងដូច្នេះថា៖«យើងកំពុងតែចចារនៅភ្នំក្រវាញ់ និងនៅព្រៃឡង់។ ពីរបន្ថែមទៀត»។

រដ្ឋមន្ត្រីវ័យក្មេងរូបនេះ ក៏ស្នើឲ្យថ្នាក់ខេត្តខិតខំកសាងសមត្ថភាពដែរ ស្របពេលដែលក្រសួងមានបំណងទម្លាក់ថវិកាដែលបានមកពីការវិនិយោគនេះ ប្រគល់ទៅឲ្យថ្នាក់ខេត្តជាអ្នកចាត់ចែងដែរ។ លោក សាយ សំអាល់បញ្ជាក់ដូច្នេះថា៖«បើសិនជាខេត្តមានសមត្ថភាពគ្រប់គ្រង មានសមត្ថិភាពយកថវិកានេះទៅលើកស្ទួយជីវភាពប្រជាខ្លួនឯង មានសមត្ថភាពយកថវិកានេះទៅវិនិយោគលើហេដ្ឋារចនាសម្ព័ន្ធសាធារណៈ ក្រសួងនឹងប្រគល់ជូន។ ហើយវាអាស្រ័យលើសមត្ថភាពខេត្តអស់ហ្នឹង»។

សូមបញ្ជាក់ថា កម្ពុជា បានចុះហត្ថលេខាលក់ឥណទានកាបូន នៅដែនជម្រកសត្វព្រៃកែវសីមា ទៅឲ្យក្រុមហ៊ុន Disney ក្នុងតម្លៃ៣លានដុល្លារ រយៈពេល២ឆ្នាំ។ ដែនជម្រកសត្វព្រៃកែវសីមាគឺជាជម្រករបស់ពពួកសត្វព្រៃ និងរុក្ខជាតិជាង៦០ប្រភេទដែលជាប្រភេទកំពុងរងគ្រោះ និងជិតផុតពូជ។ ដែនជម្រកសត្វព្រៃកែវសីមា មានផ្ទៃដីប្រមាណ២៩២,០០០ហិចតា ស្ថិតនៅជាប់ខេត្តមណ្ឌលគិរី និងក្រចេះ។

បើតាមលោក សាយ សំអាល់ ថវិកាដែលបានមកពីការលក់កាបូននេះ គឺមួយផ្នែកបានទៅសហគមន៍ដើម្បីលើកស្ទួយជីវភាពរបស់ប្រជាពលរដ្ឋ មួយផ្នែកយកទៅអភិរក្សព្រៃឈើ និងមួយផ្នែកចូលមកក្រសួងដើម្បីចាត់ចែងការងារអភិរក្សព្រៃឈើ៕