អ៊ុងសាន ស៊ូជី៖ ពីវីរៈនារីប្រជាធិបតេយ្យទៅជាខ្លាក្រដាស (ភាគ ២)

អន្តរជាតិ

អ៊ុងសាន ស៊ូជី៖ ពីវីរៈនារីប្រជាធិបតេយ្យទៅជាខ្លាក្រដាស (ភាគ ២)

31, Dec 2016 , 11:59 am

រូបភាព

ដោយ: តន ចាន់រិទ្ធារ៉ា

ការប្រែក្លាយខ្លួនជាមេដឹកនាំជាក់ស្តែងរបស់មីយ៉ាន់ម៉ា របស់លោកស្រី អ៊ុងសាន ស៊ូជី ជាសញ្ញាវិជ្ជមានមួយសម្រាប់ដំណើរការប្រជាធិតេយ្យូបនីយកម្មនៅមីយ៉ាន់ម៉ា។ ប៉ុន្តែប្រទេសនេះប្រឈមមុខបញ្ហាច្រើនជាពិសេសការប្រយុទ្ធគ្នារវាងក្រុមឧទ្ទាម និងជម្លោះសាសនា។ ថ្វីបើមានអំណាចក្នុងដៃក៏ដោយ លោកស្រី អ៊ុងសាន ស៊ូជី ដែលសន្យាដោះស្រាយបញ្ហាប្រទេសជាតិជាពិសេសជម្លោះប្រដាប់អាវុធនោះក៏មិនមានលទ្ធភាពដោះស្រាយបានដែរ។ ដូច្នេះហើយគេរិះគន់ថា លោកស្រី មិនខុសពីប្រែកាយពីវីរៈនារីប្រជាធិបតេយ្យទៅជាខ្លាក្រដាសឡើយ។

-លោកស្រី ស៊ូជី បានត្រឹមសន្យា តែមិនអាចដោះស្រាយបញ្ហាក្នុងស្រុកបាន
កាលពីយុទ្ធនាការស្វែងរកសំឡេងឆ្នោត គណបក្សសម្ព័ន្ធជាតិដើម្បីប្រជាធិបតេយ្យ បានសន្យាដោះស្រាយបញ្ហាធំៗរបស់ប្រទេសដូចជា ការកសាងប្រទេស លុបបំបាត់អំពើពុករលួយ បញ្ចប់ជម្លោះប្រដាប់អាវុធនៅក្នុងស្រុកជាដើម។ ប៉ុន្តែចាប់ពីពេលឈ្នះឆ្នោតបង្កើតរដ្ឋាភិបាលមកនោះ គេមិនឃើញមានលទ្ធផលជាដុំកំភួនពីសំណាក់រដ្ឋាភិបាលលោកស្រី អ៊ុងសាន ស៊ូជី នៅឡើយទេ។

-មិនអាចបញ្ឈប់ការប្រយុទ្ធគ្នា ព្រោះកងទ័ពស្ថិតក្នុងដៃយោធា
ជាការពិតមិនអាចប្រកែកបាន យោធាមីយ៉ាន់ម៉ា នៅតែមានឥទ្ធិពលក្នុងនយោបាយ និងវាសនាអនាគតរបស់ប្រទេសអតីតអាណានិគមអង់គ្លេសមួយនេះ។ និយាយឲ្យខ្លីទៅ រដ្ឋាភិបាលស៊ីវិល ត្រូវចាំមើលទឹកមុខរបស់ក្រុមយោធានៅពេលមានរឿងអ្វីមួយកើតឡើង បើទោះជាមេទ័ពមីយ៉ាន់ម៉ាធ្លាប់ប្រកាសថា ខ្លួនស្ថិតក្រោមរដ្ឋាភិបាលក៏ដោយចុះ តែការពិតមិនដូច្នោះឡើយ។

ឧទាហរណ៍ជាក់ស្ដែង គឺករណីប្រយុទ្ធគ្នារវាងកងកម្លាំងឧទ្ទាម និងកងទ័ពរដ្ឋាភិបាល។ កងទ័ពមីយ៉ាន់ម៉ា ហាក់ដូចជាមិនស្ដាប់បញ្ជារបស់រដ្ឋាភិបាលឡើយ ខណៈដែលរដ្ឋាភិបាលស៊ីវិល បានត្រឹមតែអំពាវនាវឲ្យមានការឈប់បាញ់ប៉ុណ្ណោះ។ កងទ័ពមីយ៉ាន់ម៉ា នៅតែបន្តប្រតិបត្តិការវាយបង្ក្រាបក្រុមឧទ្ទាម ចំណែកឯលោកស្រី ស៊ូជី ឯណេះព្យាយាមរកច្រកចេញបញ្ចប់ជម្លោះរ៉ាំរ៉ៃនេះ តាមរយៈការប្រមូលក្រុមឧទ្ទាមដើម្បីចរចារកសន្តិភាព។

មកដល់ត្រឹមនេះ គេក៏មិនអាចទម្លាក់ការទទួលខុសត្រូវទាំងអស់លើរដ្ឋាភិបាលស៊ីវិលនេះដែរ ដ្បិតអំណាចបញ្ជាទ័ពនៅតែស្ថិតដៃប្រមុខកងទ័ព។ រដ្ឋធម្មនុញ្ញឆ្នាំ២០០៨ បានផ្ដល់អំណាចយ៉ាងច្រើនដល់អគ្គបញ្ជាការកងទ័ពមីយ៉ាន់ម៉ា ជាពិសេសសិទ្ធិនៃការដឹកនាំប្រទេសក្នុងស្ថានភាពអាក្រក់ជាដើម។ ក្នុងស្ថានភាពបែបនេះ ប្រធានាធិបតីត្រូវប្រកាសដាក់ប្រទេសក្នុងស្ថានភាពអាសន្ន ហើយអំណាចដឹកនាំរដ្ឋទាំងបី ត្រូវផ្ទេរទៅឲ្យប្រមុខយោធា។

សន្និសីទ Palong សតវត្សរ៍ទី២១ គឺជាការប្រឹងប្រែងរបស់រដ្ឋាភិបាលមិយ៉ាន់ម៉ា ក្នុងការដោះស្រាយជម្លោះបង្ហូរឈាមដែលអូសបន្លាយជាងកន្លះសតវត្សរ៍មកហើយនោះ។ ប៉ុន្តែសន្និសីទដ៏ធំនេះ បញ្ចប់ទៅដោយគ្មានបានផលអ្វីទាំងអស់។ ចំណុចខ្សោយជាច្រើនដែលធ្វើឲ្យសន្និសីទនេះបរាជ័យជាពិសេសការការផាត់ចោលក្រុមឧទ្ទាមតូចៗចេញពីសន្និសីទស្វែងរកសន្តិភាពនេះ និងការមិនសហការពីសំណាក់យោធាផងដែរ។

-វិបត្តិជនមូស្លីមរ៉ូហ៊ីងយ៉ា ធ្វើឲ្យរដ្ឋាភិបាលស៊ូជី បាក់មុខ?
ងាកមកបញ្ហាជនភៀសខ្លួនរ៉ូហ៊ីងយ៉ាវិញ រដ្ឋាភិបាលស៊ីលមីយ៉ាន់ម៉ាកំពុងក្រពុលខ្លាំងលើបញ្ហានេះ។ តទៅនេះ បញ្ហារ៉ូហ៊ីងយ៉ា មិនមែនជារឿងផ្ទាល់ខ្លួនរបស់មីយ៉ាន់ម៉ាទៀតឡើយ។ សហគមន៍អន្តរជាតិ និងសមាជិកអាស៊ានខ្លះ ចាប់ផ្ដើមបង្កើនការដាក់សម្ពាធលើរដ្ឋាភិបាលលោកស្រី ស៊ូជី ដើម្បីរកដំណោះស្រាយលើបញ្ហាជនមូស្លីមរ៉ូហ៊ីងយ៉ា ដែលសហគមន៍អន្តរជាតិព្រមានថាអាចក្លាយជាអំពើប្រល័យពូជសាសន៍ទៀតផង។

ក្នុងនាមជាសមាជិកអាស៊ាន ម៉ាឡេស៊ី ចេញមុខចេញមាត់ខ្លាំង រិះគន់ចំណាត់ការរបស់រដ្ឋាភិបាលលោកស្រី ស៊ូជី ។ បញ្ហានេះ ក៏បានបង្កទៅជាជម្លោះពាក្យសម្ដីរវាងរដ្ឋាភិបាលណៃពិដោរ និងក្រុងកូរឡាឡាំពួរទៀតផង។ រដ្ឋាភិបាលមីយ៉ាន់ម៉ា បានសម្តែងការមិនសប្បាយចិត្តជាមួយនឹងរដ្ឋាភិបាលក្រុងកូរឡាឡាំពួរដែលបានដឹកនាំការប្រមូលផ្តុំទ្រង់ទ្រាយធំមួយនៅកូរឡាឡាំពួរប្រឆាំងមីយ៉ាន់ម៉ារឿងជនជាតិរ៉ូហ៊ីងយ៉ានេះ។

រដ្ឋាភិបាលមីយ៉ាន់ម៉ា ចោទនាយករដ្ឋមន្ត្រីម៉ាឡេស៊ីថាជ្រៀតជ្រែកផ្ទៃក្នុងរបស់មីយ៉ាន់ម៉ា និងធ្វើដើម្បីផលប្រយោជន៍នយោបាយក្នុងស្រុករបស់ខ្លួនប៉ុណ្ណោះ។ លោកនាយករដ្ឋមន្ត្រី ណាជីប រ៉ាហ្សាក់ បានដឹកនាំបាតុកម្ម ដែលមានការចូលរួមពីប្រជាជនម៉ាឡេស៊ីរាប់ពាន់នាក់ និងបានលើកឡើងថា មីយ៉ាន់ម៉ា ត្រូវតែបញ្ឈប់ការបង្ក្រាបបង្ហូរឈាមនោះ។ លោក ថែមទាំងប្រើពាក្យវាយប្រហារខ្លាំងទៅកាន់លោកស្រី អ៊ុងសាន ស៊ូជី ផងដែរ។

ជាងនេះទៅទៀតនោះ មន្ត្រីរដ្ឋបាលលោកស្រី ស៊ូជី ថែមទាំងអះអាងទៀតថា ឥរិយាបថរបស់លោកនាយករដ្ឋមន្ត្រី ណាជីប ប៉ះពាល់មិនត្រឹមតែមីយ៉ាន់ម៉ាប៉ុណ្ណោះនោះទេ តែ ប៉ះពាល់ដល់តំបន់អាស៊ានទាំងស្រុងតែម្តង។ ការប៉ះពាល់ដល់អាស៊ាននោះគឺ អាស៊ាន បានកំណត់រួចទៅហើយនៅក្នុងធម្មនុញ្ញរបស់ខ្លួន ដោយ មិនអនុញ្ញាតឲ្យរដ្ឋសមាជិកណាមួយជ្រៀតជ្រែកកិច្ចការផ្ទៃក្នុងនៃរដ្ឋសមាជិកផ្សេងទៀតបានឡើយ។

ជុំវិញបញ្ហានេះដែរ ទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី ក៏អញ្ជើញរដ្ឋមន្ត្រីការបរទេសការបរទេសអាស៊ានទាំង១០ មកប្រជុំបិទទ្វារនៅទីក្រុងយ៉ាំងហ្គោន ដើម្បីរៀបរាប់ពីស្ថានការណ៍នៅរដ្ឋ Rakhine នៅថ្មីៗនេះ។ អំឡុងកិច្ចប្រជុំនេះ រដ្ឋមន្ត្រីការបរទេសម៉ាឡេស៊ី ក៏ឆ្លៀតវាយប្រហាររដ្ឋាភិបាលមីយ៉ាន់ម៉ា និងបានប្រកាសចំៗថា បញ្ហារ៉ូហ៊ីងយ៉ា ជាបញ្ហារួមរបស់អាស៊ាន៕